ދަރިވަރުންނަށް ކިޔަވައިދިނުމަށް ތައްޔާރުކޮށްފައިވާ ހުރިހާ ކީ ސްޓޭޖްތަކެއްގެ އިސްލާމް އަދި ގުރްއާން ފޮތްތައް އަލުން ބަލައި ޕްރޫފްރީޑް ކުރުމުގެ މަސައްކަތް ކުރުމަށް މިނިވަން ކޮމެޓީއެއް އެކުލަވާލައި، އެ ކޮމެޓީގެ މަސައްކަތް ފަށާފައިވާ ކަމަށް މިނިސްޓްރީ އޮފް އެޑިއުކޭޝަނުން ހާމަކޮށްފިއެވެ.
އެ މިނިސްޓްރީން ބުނީ ކޮމެޓީ އެކުލަވާލާފައިވަނީ ކޮންމެ ގްރޭޑަކަށް 3 މެންބަރުންގެ މައްޗަށް އެކުލެވޭ ޓީމެއް ހިމެނޭގޮތަށް ކަމަށެވެ. މި ޓީމް ތަކުގެ މަސައްކަތް އަންނަ ހަފްތާގެ ނިޔަލަށް ނިންމައި ކޮންމެ ޓީމަކުންވެސް، ފޮތްތަކުގައި ހުރި ކުށްތައް ފާހަގަކޮށް ތަފްސީލް ރިޕޯޓެއް އެކުލަވާލާނެ ކަމަށް އެޑިއުކޭޝަނުން ހާމަކުރެއެވެ.
މިނިސްޓްރީން މީގެ ކުރިން ބުނެފައިވަނީ ފޮތްތަކުގައި ހުރި މައްސަލަތައް ދިމާވި ގޮތް ދެނެގަތުމަށް އެކުލަވާލި ކޮމިޓީގެ މަސައްކަތް ފަށައިފައިވާ ކަމަށެވެ.
މިނިސްޓްރީ އޮފް އެޑިއުކޭޝަނުން ބުނީ، ދަރިވަރުންނަށް ކިޔަވައިދިނުމަށް ތައްޔާރުކޮށްފައިވާ އިސްލާމް އަދި ގުރްއާން ފޮތްތަކުގައި ހުރި މައްސަލަތައް ދިމާވާން މެދުވެރިވި ގޮތް ދެނެގަތުމަށް އެކުލަވާލެވުނު ކޮމެޓީގެ މަސައްކަތް ފަށާފައިވާ ކަމަށެވެ.
އެގޮތުން މި ކޮމެޓީގެ މަސައްކަތް ނިންމައި 7 ދުވަހުގެ ތެރޭގައި މިނިސްޓަރަށް ރިޕޯޓު ހުށަހަޅާނެ ކަމަށާއި ރިޕޯޓުގެ ނަތީޖާއަށް ބަލައި ބަދަލު ގެންނަންޖެހޭ ކަންކަމަށް ބަދަލު ގެންނާނެ ކަމަށް އެޑިއުކޭޝަނުން ވަނީ ބުނެފައެވެ.
