އިޖުތިމާއީ ބޯހިޔާވަހިކަމުގެ ދަށުން ކުރީގެ ރައީސް އަބްދުﷲ ޔާމީންގެ ވެރިކަމުގައި ތަރައްގީކުރި ހިޔާ މަޝްރޫއުން ލިބުނު ފްލެޓުތައް، ކުއްޔަށް ދޫކުރަން ބައެއް ފަރާތްތަކުން އިޝްތިހާރު ކުރަން ފަށައިފި އެވެ.
ސޯޝަލް މީޑިއާގެ އެކި ޕްލެޓްފޯމުތަކުގައި މިހާރުވެސް ދަނީ ބައެއް ފްލެޓުތައް ކުއްޔަށް ދޫކުރަން އިޝްތިހާރު ކުރަމުންނެވެ. ސޯޝަލް ހައުސިންގެ ދަށުން ދޫކުރާ މިފަދަ ތަންތަން ކުއްޔަށް ދިނުމަކީ ގަވާއިދާއި ހިލާފު ކަމެކެވެ.
މިކަންކަން ރެގިއުލޭޓު ކުރެވޭނެ ހަރުދަނާ އުސޫލެއް ނެތުމާއިއެކު ގިނަ ބަޔަކަށް ލިބުނު ފްލެޓުތައް ކުއްޔަށް ދޫކުރާއިރު، ކުލީގެ ގޮތުގައި އެ ފްލެޓުތަކުން އެކި މީހުން ނަގަނީ އެކި އަދަދުތަކެވެ. ދެ ކޮޓަރީގެ މި އެޕާޓްމެންޓުތައް އެންމެ ކުޑަކޮށް ކުއްޔަށް ދޫކުރަނީ 9،500 ރުފިޔާ އަށެވެ. ބައެއް މީހުން 10،000 ރުފިޔާއަށް ކުއްޔަށް ދޭންވެސް ދަނީ އިޝްތިހާރު ކުރަމުންނެވެ.
ސަރުކާރުން ހިޔާ ފްލެޓުތަކަށް ނަގަނީ މަހަކު 7،500 ރުފިޔާ އެވެ.
މިސަރުކާރުން މީގެ ކުރިން ބުނެފައިވަނީ ހިޔާ ފްލެޓުތައް ކުއްޔަށް ދޫކުރާނަމަ އެތަންތަން އަތުލާނެ ކަމަށެވެ. އެެންނަމަވެސް މީގެ ކުރިންވެސް އިޖުތިމާއީ ފްލެޓުތައް ކުއްޔަށް ދޫކުރި އެވެ. އެކަން ހައްލުކުރާނެ ގޮތެއް ސަރުކާރަށް ފެނިފައެއް ނުވެ އެވެ.
ހިޔާ ފްލެޓުތަކުގައި މިހާރު ބައެއް މީހުން ގެންދަނީ ދިރިއުޅެމުންނެވެ. އެހެންނަމަވެސް ގިނަ ފްލެޓުތަކުގައި އަދި ދަނީ ފިނިޝިން މަސައްކަތް ކުރަމުންނެވެ. ފިނިޝިން މަސައްކަތް ކުރަން ޖެހެނީ ފްލެޓުވެރިން އަމިއްލައަށެވެ.
ހިޔާ ފްލެޓުތައް ލިބުނު ފަރާތްތަކުގެ ތެރެއިން 20 އިންސައްތަ މީހުން އަދިވެސް އެއްބަސްވުމުގައި ސޮއި ނުކުރެ އެވެ. ސޮއިކުރީ 5،519 މީހުނެވެ.
މިމަހުން ފެށިގެން 4 މަސްދުވަހުގެ މުއްދަތަކަށް ހިޔާ ފްލެޓުތަކުން ސަރުކާރަށް ކުލި ނުނަގާނެ އެވެ. މިމުއްދަތަކީ ފިނިޝިން މަސައްކަތަށް ކުރަންޖެހޭ ހަރަދުތައް ކުރަން ސަރުކާރުން ދިން މުއްދަތެކެވެ.
