ކުރީގެ ރައީސް އަބްދުﷲ ޔާމީންގެ ސަރުކާރުން ހުޅުމާލޭ ދެވަނަ ފިޔަވަހީގައި ތަރައްގީ ކުރި ހިޔާ ފްލެޓުތަކުގެ ކުލި ކުޑަކުރަން ޖެހޭކަމަށް ހޯރަފުށި ދާއިރާގެ މެމްބަރު އަހުމަދު ސަލީމް ގޮވާލައިފި އެވެ.
ހިޔާ ފްލެޓުގެ ކުލި ކުޑަކުރުމާއި ގުޅޭގޮތުން ރައްޔިތުންގެ މަޖިލީހަށް ހުށަހެޅި ޕެޓިޝަނާއި ގުޅޭގޮތުން ކަމާއި ގުޅުންހުރި އިދާރާތައް ހާޒިރުކޮށް މިއަދު ވަނީ ސުވާލުކޮށްފަ އެވެ.
ސަލީމް ވަނީ ހިޔާ ފްލެޓުތަ ތަރައްގީކުރުމުގައި ހިޔާނާތް އޮތްކަމަށް ވިދާޅުވެފަ އެވެ. އަދި ކުލި ބޮޑުވީ އެހެންވެގެން ކަމަށްވެސް އޭނާ ވިދާޅުވި އެވެ. އެހެންނަމަވެސް ހުސް ފާރުތަކެއް ހުރި ތަނެއް، ކުލި ބޮޑުކޮށް ނިކަމެތި ރައްޔިތުންނަށް ދިނުމަކީ ވަރަށް ބޮޑު އަނިޔާއެއް ކަމަށްވެސް ސަލީމް ވިދާޅުވި އެވެ. އޭނާ ވިދާޅުވީ ހިޔާގެ ކުލި 5،000 ރުފިޔާއަށްވުރެއް ކުޑަކުރަން ޖެހޭކަމަށެވެ.
މީގެ އިތުރުން ފްލެޓުތަކަށް ކުލި ދައްކަން ފެށުމުގެ ކުރިން ރައްޔިތުންނަށް އެއް އަހަރު ދުވަހުގެ މުއްދަތެއް ދޭން ޖެހޭކަމަށްވެސް ސަލީމް ވިދާޅުވި އެވެ. ސަބްސިޑީގެ ކަންކަން ސަރުކާރުން އިންތިޒާމު ކުރާކަން ފާހަގަކުރައްވައި ސަލީމް ވިދާޅުވީ ހިޔާ ފްލެޓުތަކުގައި ދިރިއުޅޭ ފަރާތްތަކަށްވެސް ލުއި ގޮތްތަކެއް ސަރުކާރުން ހޯދައިދޭން ޖެހޭކަމަށެވެ.
ހިޔާ ފްލެޓުތައް ލިބުނު މީހުންގެ ތެރެއިން ބައެއް މީހުން މިހާރުވެސް ދަނީ އެތަނުގައި ދިރިއުޅެމުންނެވެ. ކުލި ދައްކަން ފެށުމުގެ ތެރެއިން ސަރުކާރުން ވަނީ ހިޔާ ފްލެޓުވެރިންނަށް ހަތަރު މަހުގެ މުއްދަތެއް ދީފަ އެވެ.
ކިޔާ ފްލެޓުތަކުގެ ކުލީގެ ގޮތުގައި ސަރުކާރުން ނަގަން ނިންމާފައިވަނީ 7،500 ރުފިޔާ އެވެ. އަދި މެއިންޓެނެންސް ފީގެ ގޮތުގައި 1،000 ރުފިޔާ ނަގާނެ އެވެ.
ކުރީގެ ރައީސް ޔާމީންގެ ސަރުކާރުން ހިޔާ ކުލީގެ ގޮތުގައި ކަނޑައެޅީ 5،000 ރުފިޔާ އެވެ. ހިޔާ ޔޫނިއަންއިން މަޖިލީހަށް ހުށަހެޅި ޕެޓިޝަންގައި ވަނީ އެންމެ ބޮޑުވެގެން ފްލެޓުތަކުގެ ކުލި 5،519 ރުފިޔާއަށް ކުޑަކޮށްދޭން އެދިފަ އެވެ.
