މުއްދަތު ހަމަވެފައިވާ ޓްރެވަލް ޑޮކިއުމަންޓްވެސް އެތެރޭގެ އުދުހުންތަކުގައި ބޭނުން ކުރެވޭ ގޮތަށް ހަމަޖައްސައިފިއެވެ.
ޑައިރެކްޓަރ ޖެނެރަލް އޮފް އޭވިއޭޝަން ސެކިއުރިޓީ ހުސެއިން ނަޒީފު ސޮއިކުރައްވާ ނެރުއްވި ސާރކިއުލަރއެއްގައި ބުނެފައިވަނީ ކޮވިޑް ހާލަތާއި ގުޅިގެން އައިޑެންޓިފިކޭޝަންގެ ގޮތުގައި ބޭނުން ކުރެވޭ ލިޔެކިޔުން ހޯދުމުގައި ދަތިކަން މެދުވެރިވާކަމުގެ މައުލޫމާތު ދަނީ ލިބެމުން ކަމަށާއި މިމައްސަލަ ހައްލު ކުރުމަށްޓަކައި ޕާސްޕޯޓް، އައިޑީކާރޑް، ވާރކް ވިސާ ކާރޑް، ލައިސެންސް ކާރޑް، އެއަޕޯޓް ސެކިއުރިޓީ ފާހުގެ މުއްދަތު ހަމަވެފައިވާ ނަމަަވެސް އޭގައި ހިމެނޭ މައުލޫމާތު ސާފުކޮށް އެނގޭނަމަ ދިވެހިރާއްޖޭގެ ވައިގެ ބަނދަރުތަކުން ދަތުރުކުރާ ފަރާތްތަކުން އެއަރލައިން ޓިކެޓް ގަތުމަށާއި އެއަރލައިން އަށް ޗެކިން ކުރުމަށާއި އަދި ސެކިއުރިޓީ ޗެކް ޕޮއިންޓްތަކުން ކާކުކަން ދެނެގަތުމަށްޓަކައި އެލިޔުންތައްވެސް ބޭނުން ކުރެވޭ ގޮތަށް ހަމަޖަައްސާފައިވާ ކަމަށެވެ.
އެހެންކަމުން މިނިސްޓްރީ އޮފް ޑިފެންސުން އެހެން ގޮތެއް ހަމަޖެއްސުމާއި ހަމައަށް މިގޮތުގެ މަތިން އަމަލު ކުރުމަށް ވަނީ އަންގާފައެވެ.
