ހިޔާ މަޝްރޫއުގެ ދަށުން އަޅާފައިވާ ފްލެޓްތަކަށް މަހަކު ދައްކަންޖެހޭ އަދަދު ކުޑަކުރުމަށް އެދި އަނެއްކާވެސް ރައީސްއަށް ސިޓީ ފޮނުވާފައިވާ ކަމަށް މާލެ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
މޭޔަރު ކުރެއްވި ޓުވީޓެއްގައި ވިދާޅުވީ، ހިޔާ ފްލެޓްތަކަށް ދައްކަން ޖެހޭ އަދަދު 5600 އަށްވުރެ ކުޑަކޮށް ދެއްވުމަށް އެދި 3 ވަނަ ފަހަރަށް ރައީސް އޮފީހަށް ނިމިގެންދިޔަ ހަފްތާގައި ސިޓީ ފޮނުވާފައިވާނެ ކަމަށެވެ.
އަދި ފްލެޓްތަކުގެ ފިނިޝިންގ މަސައްކަތަށް މަދުވެގެން 9 މަސްދުވަސް ދިނުމަށް ތަކުރާރުކޮށް އެ ސިޓީގައި އެދިފައިވާނެ ކަމަށްވެސް މޭޔަރު ވިދާޅުވިއެވެ. ޑރ މުއިއްޒު އިތުރަށް ވިދާޅުވީ، ހިޔާ ފްލެޓްތަކުގެ ފިނިޝިންގ މަސައްކަތަށް ހަރަދު ކުރާނޭ ފައިސާ ނެތްކަމަށް ބުނި ކުންފުނިން ތިލަފުށި ބިން ހިއްކަން ބޮޑު ހޭދައެއް ކުރަން ނިންމާ އެ ހޭދަ ދަނީ ކުރަމުން ކަމަށާއި އެޗް.ޑީ.ސީ ގައި ފައިސާ ނެތީ ހަމައެކަނި ހިޔާ ފްލެޓްތައް ނިންމަން ކަމަށެވެ.
ސަރުކާރުން ބުނެފައިވަނީ ހިޔާ ފްލެޓްތަކަށް މަހަކު ދައްކަން ޖެހޭނީ 7500 ރުފިޔާ ކަމަށާއި ގްރޭސް ޕީރިއަޑްގެ ގޮތުގައި ދޭނީ ތިން މަސް ދުވަހުގެ މުއްދަތެއް ކަމަށެވެ. އަދި ކުލި ނަގަން ފަށާނީ ޖެނުއަރީ 2022 އިން ފެށިގެން ކަމަށެވެ.
