ކަމާގުޅޭ ހުރިހާ ފަރާތްތަކުގެ މަޝްވަރާއާއެކު، އެންމެ ކުޑަ އުޖޫރަ ކަނޑައެޅުމުގެ މަސައްކަތް މިހާރުވަނީ ނިމުމަކާ ހަމައަށް އައިސްފައިކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ދިވެހިރާއްޖޭގެ ފަތުރުވެރިކަމުގެ ސިނާއަތަށް 50 އަހަރު ފުރޭ މުނާސަބަތުގެ ކައުންޓްޑައުން ފެށުމުގެ ހަފްލާގައި ރައީސް ވިދާޅުވީ، ފަތުރުވެރި ކަމުގެ ސިނާއަތުގައި ވަޒީފާ އަދާކުރާ މީހުންނަކީ، މި ސިނާއަތު މިއަދާ ހަމައަށް ދެމެހެއްޓުމުގެ އެންމެ މުހިންމު އެއް ބައިވެރިޔާ ކަމަށާއި ވަޒީފާ އަދާކުރާ މީހުންގެ ހައްގުތައް ރައްކާތެރިކޮށްދިނުމަކީ، ސަރުކާރުން މިއަދު ވަރަށް ބޮޑު އިސްކަމެއްދީގެން ކުރާ ކަމަށެވެ.
މީގެ އިތުރުން ރައީސް ވިދާޅުވީ އަދި ކޮންމެ އަހަރަކުވެސް، ދިވެހިރާއްޖޭގެ ގައުމީ ފަތުރުވެރިކަމުގެ ދުވަހުގެ ގޮތުގައި ފާހަގަކުރާނީ ރާއްޖޭގައި ފުރަތަމަ ރިޒޯޓް ހުޅުވުނު ދުވަސް ކަމަށާއި އެއީ 3 އޮކްޓޫބަރު ކަމަށެވެ.
ރައީސް ވިދާޅުވީ، ރާއްޖޭގެ ފަތުރުވެރިކަން ފެށިގެން އައީ، 30 ކޮޓަރިން ޖުމްލަ 60 އެނދާއެކު ކަމަށާއި ނަމަވެސް ފަތުރުވެރިކަމުގެ ރަން ޔޫބީލް ގުނަން ފަށާއިރު، ރާއްޖޭގައި މިހާރު 156 ރިޒޯޓާއި، 582 ޓޫރިސްޓް ހޮޓާ/ގެސްޓްހައުސް އަދި 144 ސަފާރީގައި، ފަތުރުވެރިންނަށް ޚިދުމަތް ރާއްޖޭގައި ދެމުން ގެންދާ ކަމަށެވެ. އެއީ ޖުމްލަ 51038 އެނދެވެ. އަދި ދުނިޔޭގައި ނަން ހިނގާ ހުރިހާ ބްރޭންޑެއްގެ ރިޒޯޓުތައް މިހާރު ރާއްޖޭގައި އެބަހުރި ކަމަށާއި އަދި މިއަދު ރާއްޖޭގެ ޖީ.ޑީ.ޕީ.ގައި ފަތުރުވެރިކަމުގެ ހިއްސާއަކީ، 44.5 އިންސައްތަ ކަމަށް ރައީސް ވިދާޅުވިއެވެ.
ސަރުކާރުގެ މިއަދުގެ ސިޔާސަތަކީ މުޅި ރާއްޖެއަށް ފަތުރުވެރިކަން ފަތުރައިލުން ކަމަށްވާއިރު އެކަން ކުރުމަށްޓަކައި، ކޮންމެހެން ކުރަންޖެހޭ ވަރަށް މުހިންމު އެހެން ކަންތައްތަކެއް އެބަހުރި ކަމަށާއި ރަށްރަށަށް ފަސޭހައިން ދަތުރުކުރެވޭނެ އިންތިޒާމެއް ހަމަޖައްސަންޖެހޭއިރު ސާފު ބޯފެނާއި، ނަރުދަމާ ނިޒާމެއް، ކޮންމެ ރަށެއްގައި ޤާއިމުވެފައި އޮންނަން ޖެހޭ ކަމަށާއި އެ ހުރިހާ ރަށެއްގައި، ޒަމާނީ މުވާސަލާތީ ޚިދުމަތްތައް ތަރައްޤީކުރަން ޖެހޭ ކަމަށް ރައީސް ވިދާޅުވިއެވެ.
