ޝާހިދުގެ ދައުރުގައި ރާއްޖޭގެ ޒުވާނުންނަށް އިތުރު ފުރުސަތު ފަހިވެގެން ދާނެކަމަށް އުންމީދުކުރައްވާ ކަމަށާއި، އ.ދ. އޮފީހުގައި ދިވެހި ޒުވާނުން މަސައްކަތްކުރަން ފުރުސަތު ލިބިގެން ދާނެކަމަށް އުންމީދުކުރައްވާކަމުގައި ރައީސުލްޖުމުހޫރިއްޔާ އިބްރާހިމް މުހައްމަދު ސާލުހު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހްގެ ދައުވަތަކަށް އ.ދ.ގެ އާންމު މަޖިލީހުގެ 76 ވަނަ ސެޝަނުގެ ރައީސް ޢަބްދުﷲ ޝާހިދު ރާއްޖެއަށް ކުރެއްވި ރަސްމީ ދަތުރުފުޅުގައި ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ، އ.ދ. އިސްލާހުކުރުމުގެ މަސައްކަތްތައް އަބްދުﷲ ޝާހިދުގެ ޒައާމަތުގައި އިތުރަށް ހަލުވިކޮށްދެއްވުމަށް ދަންނަވާފައިވާނެ ކަމަށާ، ހާއްސަ ގޮތެއްގައި އ.ދ. ގެ އާންމު މަޖިލީހާއި ސަލާމަތީ މަޖިލިސް އިސްލާހުކުރުމުގެ މަސައްކަތްތަކަށް ކުރިއެރުމެއް ލިބުމަކީ މުހިންމު ކަމެއްކަމުގައެވެ.
ރައީސް ވަނީ އަދި ރާއްޖެއަކީ ކުޑަ ޤައުމެއްކަމުގައިވިޔަސް ރާއްޖެއަށް އ.ދ. ގެ ޢާންމު މަޖިލީހުގެ 76 ވަނަ ސެޝަނުގެ ރައީސްކަމުގެ ގޮނޑި ކާމިޔާބުވުމަކީ ބައިނަލްއަޤުވާމީ ކޮމިއުނިޓީގައި ރާއްޖެ ބަލައިގެންފައިވާކަމުގެ ހެއްކެއްގެ ގޮތުގައި ފާހަގަކުރައްވާފައެވެ. އަދި ރާއްޖެއަކީ އަބަދުވެސް ޖޯޝާ ފޯރީގައި އުންމީދާއެކު ކުރިމަގު އުޖާލާކުރުމަށް ވަރަށް ބުރަކޮށް މަސައްކަތްކުރާ ޤައުމެއްކަން އެމަނިކުފާނުގެ ވާހަކަފުޅުގައި ވަނީ ފާހަގަކުރައްވާފައެވެ. އަދި އެގޮތަށް ޖޯޝާ ފޯރީގައި އުންމީދާއެކު އެމަނިކުފާނު މަސައްކަތް ކުރައްވާނެކަމުގައި ވިދާޅުވިއެވެ.
