ދެ މަގާމު ފުރުއްވުމުން ރާއްޖެއަށް ލިބޭ ގެއްލުން ބޮޑު ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.
އާދަމް ޝަރީފް މިގޮތަށް އިޝާރާތް ކުރައްވާފައި މިވަނީ ރާއްޖޭގެ ހާރިޖީ ވަޒީރުގެ މަގާމުގައި ހުންނެވި އަބްދުﷲ ޝާހިދު އ.ދ. ގެ އާންމު މަޖިލީހުގެ 76 ވަނަ ބައްދަލުވުމުގެ ރައީސްގެ މަގާމު ފުރުއްވަމުން ގެންދަވާތީއެވެ. ޝާހިދު މިއަދު ވަނީ ރައީސުލްޖުމުހޫރިއްޔާގެ ދައުވަތަކަށް އދގެ އާއްމު މަޖިލީހުގެ ރައީސްގެ ހައިސިއްޔަތުން ރާއްޖެއަށް ރަސްމީ ޒިޔާރަތެއް ކުރައްވާފައެވެ.
މިކަމާ ގުޅިގެން އާދަމް ޝަރީފް މިއަދު ކުރެއްވި ޓުވީޓެއްގައި ވިދާޅުވީ، ފޮރިން މިނިސްޓަރުގެ ފަހަތްޕުޅުގައި ރައީސުލްޖުމުހޫރިއްޔާ ހުންނެވުމަކީ ސީރިއަސް ހައިރާކީ މައްސަލައެއް ކަމަށެވެ. އަދި ރާއްޖޭގެ ހާރިޖީ ވަޒީރަކަށް ޒުވާން ގާބިލް ބޭފުޅަކު އައްޔަން ކުރުމަށް އާދަމް ޝަރީފް ވަނީ ގޮވާލައްވާފައެވެ.
ޝާހިދު ދެ މަގާމު ފުރުއްވަމުން ދާތީ އިދިކޮޅު ފަރާތްތަކުން ދަނީ ތަކުރާރުކޮށް ފާޑު ވިދާޅުވަމުންނެވެ. ނަމަވެސް ސަރުކާރުންވެސް އަދި ރައީސް އިބްރާހިމް މުހައްމަދު ސާލިހުވެސް މިކަމަށް މާބޮޑު ސަމާލު ކަމެއް ނުދެއްވައެވެ.
