ހޯމް މިނިސްޓްރީގެ ދަށުން ފުލުހުންގެ މުއައްސަސާ ވަކިކުރުމުން ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ސަރުކާރަށް ފާޑު ވިދާޅުވެއްޖެއެވެ.
ޖަމީލް ކުރެއްވި ޓުވީޓެއްގައި ވިދާޅުވީ، މިއީ ކަނޑައެޅިގެން ބޮޑު އޮޅުވާލުމެއް ކަމަށެވެ. އަދި މިއީ ދުސްތޫރީ ހަމަތައް ކަފުންކޮށް ޗާޓުން ބޭރުން ސަރުކާރުން ކުޅެން ފެށި ކަމެއްގެ އަލާމާތެއް ކަމަށެވެ. މީގެ އިތުރުން ޖަވާބުދާރީވާން ދެން ވަޑައިގަންނަވާނީ ރައީސްތޯ؟ ޖަމީލް ވަނީ ސުވާލު އުފައްދާފައެވެ.
ޖަމީލް ވަނީ ގާނޫނުގައި އޮތް ވަޒީރުންގެ މަސްއޫލިއްޔަތު ދެން އަދާކުރައްވާނީ ރައީސް އޮފީހުގެ ވަޒީރުންތޯވެސް ސުވާލު ކުރައްވާފައެވެ. ޖަމީލް ވިދާޅުވީ މިއީ ވާނުވާ ނޭނގޭ ސަރުކާރެއް ކަމަށެވެ.
ހޯމް މިނިސްޓްރީގެ އިހުތިސާސުން ފުލުހުންގެ މުއައްސަސާ ވަކިކޮށް ރައީސް އޮފީހުން ފޮނުއްވި ސިޓީގައި ބުނެފައިވަނީ، ދިވެހި ފުލުހުންގެ ގާނޫނުގެ ދަށުން އުފައްދާފައިވާ މިނިސްޓްރީ އޮފް ހޯމް އެފެއާޒުގެ ދަށުން ކުރިން ހިގަމުންދާގޮތަށް ހަމަޖައްސާފައިވާ "މޯލްޑިވްސް ޕޮލިސް ސާވިސް" އަކީ ދިވެހި ފުލުހުންގެ ހިދުމަތުގެ ގާނޫނުގެ ދަށުން އުފައްދާފައިވާ "ދިވެހި ފުލުހުންގެ ހިދުމަތް" ކަމުގައި އެ ގާނޫނުގައި ބަޔާން ކުރާތީއާއި، އެ ގާނޫނުގައި ދިވެހި ފުލުހުންގެ ހިދުމަތަކީ ވަކި މިނިސްޓްރީއެއްގެ ދަށުން ހިންގުމަށް ކަނޑައަޅާފައިވާ މުއައްސަސާއަކަށް ނުވާތީ މިނިސްޓްރީ އޮފް ހޯމް އެފެއާޒްގެ ދަށުން މޯލްޑިވްސް ޕޮލިސް ސާވިސް ހިންގަމުން ދާގޮތަށް ހަމަޖައްސާފައި އޮތް އޮތުން މިއަހަރުގެ މާޗު 27 ވަނަ ދުވަހުގެ ފެށިގެން ނިމުމަކަށް ގެނެސްފައިވާ ކަމަށެވެ.
