އަތޮޅު ހޮސްޕިޓަލް ތަރައްގީކުރުން އަވަސްކޮށްދެއްވުމަށް އަރިއަތޮޅު އުތުރުބުރީ ކައުންސިލުން ރައީސްގެ އަރިހުން އެދިއްޖެއެވެ.
އއ. އަތޮޅަށް ކުރައްވަމުން ގެންދަވާ ދަތުރުފުޅުގައި އަރިއަތޮޅު އުތުރުބުރީ އަތޮޅު ކައުންސިލާ ރައީސް ބައްދަލުކުރެއްވުމުން އަތޮޅު ކައުންސިލުން ވަނީ ސޯލަފ ޕަވަރ ޕްރޮޖެކްޓް ނުފެށޭތީ ހުރި ކަންބޮޑުވުންތަކާއި، އަތޮޅު ފިހާރައިން ލިބޭ އާމްދަނީ ލިބެނީ ކޮން އުސޫލަކުން ކިހިނެއްކަން އޮޅުންނުފިލުމުގެ ސަބަބުން ދިމާވާ ދަތިތަކާ، އެތަނުގެ އާމްދަނީ ލިބޭނެ ގޮތް ހައްދަަވައިދެއްވުމަށް އެދިފައެވެ.
މީގެ އިތުރުން ވެސް އަތޮޅު ކައުންސިލްގެ އިދާރީ މުވައްޒަފުން މަދުވުމުގެ ސަބަބުން ދޭންޖެހޭ ޚިދުމަތްތައް ދިނުމުގައި ދިމާވާ ދަތިތަކާއި، އަތޮޅުގައި ސީ އެމްބިއުލާންސް އެއް ނެތުމުން ދިމާވާ ގޮންޖެހުންތައް އެބޭފުޅުން ފާހަގަކުރެއްވިއެވެ. މީގެ އިތުރުންވެސް އަތޮޅުކައުންސިލުން ވަނީ އަތޮޅުގެ ހުރިހާ ރަށެއް ހަމަހަމަކޮށް ތަރައްޤީކޮށްދެއްވުމަށާއި މަޑިވަރު ފިނޮޅުގެ މައްސަލައިގައި ހުރި ކަންބޮޑުވުންތަކާއި، ރަށްރަށުގެ ދަފްތަރެއް އޮތުމުގެ މުހިންމުކަމާގުޅޭގޮތުން މަޝްވަރާކުރައްވާފައެވެ.
ރައީސުލްޖުމްހޫރިއްޔާ ވަނީ އއ. އަތޮޅު ކައުންސިލްގެ މެންބަރުން ދެންނެވި ކަންކަމުގައި ކަމާގުޅޭ ފަރާތްތަކާ މަޝްވަރާކުރެއްވުމަށް ފަހު އެދެވޭ ގޮތަކަށް އެކަންކަން ފަހިކޮށްދެއްވާނެކަމުގައި ވިދާޅުވެފައެވެ. މިގޮތުން ރައީސުލްޖުމްހޫރިއްޔާ ވަނީ ކުވެއިތު ފަންޑުގެ އެހީގައި އަތޮޅު ހޮސްޕިޓަލް ތަރައްޤީކުރުމުގެ މަޝްރޫޢު ކުރިޔަށްގެންދިޔުމަށް ހަމަޖެހިފައިވާކަމަށާއި، ސީ އެމްބިއުލާސް އަންނަ އަހަރު ލިބޭނެކަމަށާއި، ރާއްޖޭގެ ހުރިހާ ރަށެއްގެ މަޢުލޫމާތު އެއްތަނަކުން އެނގޭނެގޮތަށް ދަފްތަރެއް ތައްޔާރުކުރުމުގެ މަސައްކަތް ސަރުކާރުން މިހާރު ކުރައްވަމުންގެންދަވާ ކަމުގައި ވިދާޅުވެފައެވެ.
