އަރިއަތޮޅު އުތުރުބުރީގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އެއަތޮޅު ބޮޑުފުޅަދޫގައި އަލަށް ބިނާކުރި މަސްޖިދުއް ތަގްވާ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު މިއަދު ހުޅުވައިދެއްވައިފިއެވެ.
މިއީ 300 މީހުންގެ ޖާގައިގެ މިސްކިތެކެވެ. މި މިސްކިތާއި ގުޅޭގޮތުން އިސްލާމިކް މިނިސްޓަރ ވިދާޅުވީ، ބޮޑުފުޅަދޫގައި މިއަދު ހުޅުވުނު މަސްޖިދުއް ތަގުވާއަކީ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވެރިކަމަށް ވަޑައިގެން އިމާރާތް ކުރަން ހަވާލު ކުރެވުނު މިސްކިތެއް ކަމަށާއި މި މިސްކިތް ނިންމަން ފުރަތަމަ ހަވާލު ކުރި ކުންފުންޏަށް މަސައްކަތް ނުނިމި ލަސްވުމުން މުޅިން މިސްކިތުގެ މަސައްކަތް ނިންމާލާފައިވަނީ އެހެން ކުންފުންޏަކާއި ހަވާލު ކޮށްގެން ކަމަށެވެ.
ޒަމާނީ ފެންވަރަށް ބޮޑުފޮޅުދޫގައި ބިނާކުރި މި މިސްކިތުގައި މުންނާރަކާއި ވުޟޫ ކުރާތަނެއްގެ އިތުރުން އަންހެނުންނަށް ވެސް ނަމާދުކުރެވޭނެ އިންތިޒާމު ހުރެއެވެ.
ބޮޑުފުޅަދޫގައި 800 އަށްވުރެ ގިނަ މީހުން ދިރިއުޅެއެވެ. އއ. ބޮޑުފުޅަދޫގައި މިހާރު 3 މިސްކިތް އެބަހުއްޓެވެ.
