މަސްތުވާތަކެތި ބޭނުންކުރާ މީހުންނަށް މުޖުތަމައުގައި ތިބެގެން ފަރުވާލިބޭ ޕްރޮގްރާމެއް ފެށުމުގެ މަސައްކަތް ކުރަމުންދާ ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ކުޅުދުއްފުށި ސިޓީގައި މިރޭ ެޮތް ޒުވާނުންގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، ސަރުކާރުގެ އަމާޒަކީ އެމީހަކު ހުރި ރަށަކުން މަސްތުވާތަކެއްޗަށް ފަރުވާ ކުރެވޭނެ އިންތިޒާމު ހަމަޖެއްސުން ކަމަށާއި އެކަމަށްޓަކައި މުޖުތަމައުގައި ތިބެގެން، ފަރުވާ ހޯދޭނެ ވަށާޖެހޭ ޕްރޮގްރާމުތަކެއް ވަރަށް އަވަހަށް ފެށުމަށް އަންނަނީ މަސައްކަތް ކުރަމުން ކަމަށެވެ.
ރައީސް ވިދާޅުވީ ރާއްޖޭގެ ޒުވާނުންގެ ކުރިއެރުމާއި ތަރައްގީއަށް ގާނޫނީ ހިމާޔަތާއި ރައްކާތެރިކަން ހޯދައިދިނުމަކީ ވެސް ކޮންމެހެން ކުރަންޖެހޭ ކަމެއްކަމަށް ގަބޫލުފުޅުކުރައްވާ ކަމަށެވެ. ސަރުކާރުން މިހާރު ޑްރާފްޓުކޮށްފައިވާ "ޒުވާނުން ބިނާކުރުމާއި ހުނަރުވެރިކުރުމުގެ ބިލު"ގެ އެންމެ މުހިންމު މަގުސަދަކީ އިސްލާމް ދީނަށް ލޯބިކުރާ ދީނުގެ އަސާސްތަކަށް ހުރުމަތްތެރިކޮށް ހިތާ، އަދި ދިވެހި ގައުމިއްޔަތުގެ ސިފަތައް ލިބިގެންވާ ޒުވާނުންތަކެއް ބިނާކުރުން ކަމަށެވެ.
މި ބިލުގެ އަނެއް އަމާޒަކީ ޒިންމާދާރު ހުނަރުވެރި ޒުވާން ރައްޔިތުންތަކެއް ބިނާކުރުން ކަމަށާއި ޒުވާނުންގެ އުންމީދުތައް ހަގީގަތަކަށް ހެދުމަށް މަގު ދައްކައިދީ، ކުރިމަގުގެ ފުރުސަތުތަކަށް މަގުފަހުކޮށްދިނުމަކީ ވެސް މި ބިލުގެ ވަރަށް މުހިންމު މަގުސަދެއް ކަމަށް ރައީސް ވިދާޅުވިއެވެ.
