ޓުއަރިޒަމް ޕްރޮމޯޓް ކުރަން ދުބާއީގެ އެމިރޭޓްސް އެއަރލައިން އާއެކު ސޮއިކޮށްފިއެވެ.
އެގޮތުން ގްލޯބަލް މާކެޓުގައި ރާއްޖޭގެ ޓުއަރިޒަމް ޕްރޮމޯޓްކުރަން މިނިސްޓްރީ އޮތް ޓުއަރިޒަމް އާއި ވިޒިޓް މޯލްޑިވްސް އިން ޔުނައިޓެޑް އަރަބި އެމިރޭޓްސްގެ ގައުމީ އެއާލައިން، އެމިރޭޓްސް އެއާލައިނާއެކު އެމްއޯޔޫއެއްގައި ސޮއިކޮށްފައިވާ ކަމަށް ސަރުކާރުގެ ތަރުޖަމާނު މަބްރޫކް އަޒީޒް ވަނީ ހާމަކުރައްވާފައެވެ.
ދުބާއީގައި ކުރިއަށް ގެންދާ އެކްސްޕޯ 2020 ގެ ތެރެއިން މި އެމްއޯޔޫގައި ސޮއިކޮށްފައިވީ ނަމަވެސް ރައީސުލްޖުމުހޫރިއްޔާގެ އޮފީހުންވެސް އަދި ޓުއަރިޒަމް މިނިސްޓްރީންވެސް މިހާތަނަށް މި އެމްއޯޔޫގެ ތަފްސީލް ހާމަކޮށްފައެއް ނުވެއެވެ. މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ރައީސުލްޖުމުހޫރިއްޔާވެސް ވަނީ ބައިވެރިވެފައެވެ.
ރައީސް ވަނީ އިއްޔެ، ޔުނައިޓެޑް އެރެބް އެމިރޭޓްސް (ޔޫ.އޭ.އީ)ގެ ބޮޑުވަޒީރު، މިނިސްޓަރ އޮފް ޑިފެންސް އަދި ދުބާއީގެ ވެރިޔާ ޝައިޚް މުޙައްމަދު ބިން ރާޝިދު އަލް މަކްތޫމްއާ އެކު ދުބާއީ އެކްސްޕޯ 2020ގައި ބަހައްޓާފައިހުރި ރާއްޖޭގެ ޕެވިލިއަންއަށް ޒިޔާރަތްކުރައްވާފައެވެ.
