ހުޅުމާލެ ފޭސް 1ގައި ޑްރައިވިން ލައިސެންސް ޓެސްޓް ހެދުމަށް ޓްރާންސްޕޯޓް މިނިސްޓްރީ އާއި ބިން ހަވާލުކޮށްފިއެވެ.
އެގޮތުން ހަވާލުކޮށްފައިވަނީ ހުޅުމާލެ ފޭސް 1 ލޮޓް ނަމްބަރު 10909 ގައި ޑްރައިވިން ލައިސެންސް ނެގުމަށް ބޭނުންކުރާ ސަރަހައްދެއް ގާއިމު ކުރުމަށެވެ. މި އެއްބަސްވުމުގެ ދަށުން ކަނޑައެޅިފައިވާ ސަރަހައްދަކީ ޖުމުލަ 20.163.58 އަކަފޫޓުގެ ބިމެއް ކަމަށް އެޗްޑީސީން ހާމަކުރެއެވެ.
މިއަދު ބޭއްވުނު ރަސްމިއްޔާތެއްގައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރ އާއިޝަތު ނަހުލާއެވެ. އަދި އެޗްޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ ސުހައިލް އަހުމަދުއެވެ.
މިރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ނަހުލާ ވިދާޅުވީ، މިހާރު ލައިސެންސް ނެގުމަށް ބޭނުން ކުރަމުންދާ ސަރަހައްދުތަކުގައި ގިނަ ދަތިތަކެއް ހުރި ކަމަށާއި ހުޅުމާލޭގައި ގާއިމުކުރެވިގެންދާ މި ސަރަހައްދުން މިހުރިހާ ކަމަކަށް ވެސް ހައްލު ތަކެއް ލިބިގެންދާނެ ކަމަށެވެ. ހުޅުމާލެ ފޭސް 1 ގައި ހިންގަމުންދާ ޕޯޓް އާއި ޖެހިގެން އޮންނަ މިބިމުގައި ކުރިއަށް އޮތް މަހެއްހާ ދުވަހުގެ ތެރޭގައި ޓެސްޓްތައް ހެދުމުގެ ކަންކަން ހަމަޖެހިގެންދާނެ ކަމަށް އެޗްޑީސީން ހާމަކުރެއެވެ.
