ތިމާވެށީގެ ނުރައްކަލާ މެދު އަބަދު އެއްވާހަކަތަކެއް ދައްކަވަން ޖެހިވަޑައިގަންނަވާއިރުވެސް ގައުމުތަކަށް މިކަމުގެ ނުރައްކަލާއި، ހުރި ބިރުވެރިކަން ވަޒަން ނުކުރެވޭތީ އެކަމާއި ކަންބޮޑުވާ ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ގްލާސްގޯވގައި މިހާރު ކުރިއަށްދާ ތިމާވެށީގެ އެންމެ ބޮޑު ބައްދަލުވުން، ކޮޕް26ގައި ތަގުރީރުކުރައްވަމުން ރައީސުލްޖުމްހޫރިއްޔާވަނީ މޫސުމީ ބަދަލުތަކާ ދެކޮޅަށް ގައުމުތަކުން ކުރާ މަސައްކަތުގައި ބަހާއި އަމަލާ ދިމާކުރުމަށް ގައުމުތަކުގެ ވެރިންނަށް ގޮވާލައްވާފައެވެ. ރައީސް ވަނީ ދުނިޔެއަށް އަންނަ މޫސުމީ ބަދަލުތަކާ ދެކޮޅަށް ގައުމުތަކުން ގެންގުޅޭ ފިނި ވިސްނުމާމެދު ވަރަށްބޮޑަށް ކަންބޮޑުވެވަޑައިގަންނަވާކަން ފާހަގަކުރައްވައި އެކަމަށް ފާޑުވިދާޅުވެފައެވެ.
ރައީސް ވިދާޅުވީ، މިވަގުތަކީ ހަމައެކަނި ވާހަކަދައްކައިގެން ހަމަޖެހޭނެ ވަގުތެއް ނޫންކަމަށެވެ. އެގޮތުން ގައުމުތަކުން ހާސިލުކުރުމަށް ނިންމާ ލަނޑުދަނޑިތައް ހާމަކުރުމަކުން މިދަނޑިވަޅުގައި ނުފުދޭނެކަމަށް ރައީސް ވިދާޅުވިއެވެ. ރައީސްގެ ވާހަކަފުޅުގައިވަނީ ރާއްޖެ ފަދަ ކުޑަ ގައުމަކުން މިކަމުގައި ދައްކަމުންދާ ނަމޫނާ ފާހަގަކޮށް ބޮޑެތި ގައުމުތަކުން މިއަށްވުރެ ބޮޑު އަދި ހަރުދަނާ ފިވަޅުތަކެއް އަޅަންޖެހޭކަން ވަނީ ފާހަގަކުރައްވާފައެވެ.
އަދި ދުނިޔޭގެ ބޮޑެތި ބާރުތަކުން މީގެ ހަ އަހަރުކުރިން ތިމާވެށީގެ ދާއިރާއިން ކުދި ޖަޒީރާ ގައުމުތަކަށް އެހީވުމަށް އެއްބަސްވި އެއްބަސްވުމާ ގާތަށްވެސް އަމަލުކުރެވިފައި ނުވާތީ ރައީސްވަނީ އެކަމަށް ވަރަށް ބޮޑަށް ފާޑުވިދާޅުވެފައެވެ. ތިމާވެށީގެ ކުއްލި ހާލަތެއްގައި ގައުމުތަކުން ނިންމާ ފިޔަވަޅުތައް ވަޒަންކޮށް މޮނީޓަރ ކުރެވޭނެ ހަރުކަށި އުސޫލުތަކެއް އެކުލަވާލަންޖެހޭކަމަށްވެސް ރައީސް ވަނީ ވިދާޅުވެފައެވެ.
