ރާއްޖެއަށް، 60 ސްކޮލާޝިޕް ދިނުމަށް ހަންގޭރީގެ ސަރުކާރުން ނިންމައިފިއެވެ.
މި ސްކޮލާޝިޕްތައް ދިނުމަށް ނިންމާފައިވަނީ ހަތަރު އަހަރަށް ބަހާލައިގެންނެވެ. މިކަމުގެ އެއްބަސްވުމުގައި ރާއްޖޭގެ ހަޔަރ އެޑިއުކޭޝަން މިނިސްޓްރީން ސޮއިކުރެއްވީ މިނިސްޓަރ ޑރ.އިބްރާހީމް ހަސަނެވެ. އަދި ހެންގޭރީ ސަރުކާރުގެ ފަރާތުން ސޮއިކުރެއްވީ އެގައުމުގެ މިނިސްޓްރީ އޮފް ފޮރިން އެފެއަރޒް އެންޑް ޓްރޭޑްގެ ސްޓޭޓް ސެކެޓްރީއެވެ.
މިނިސްޓްރީން ބުނީ މި 60 ސްކޮލަރޝިޕްގެ ތެރެއިން މިއަހަރަށް މި އަހަރަށް ކަނޑައަޅާފައިވާ ސްކޮލާޝިޕްތަކަށް މިމަހުގެ ފަހުކޮޅު ހުޅުވާލާނެކަމަށެވެ. މިނިސްޓްރީން ބުނީ މިއީ ރާއްޖެއާއި ހަންގޭރީ އާއި ދެމެދުގައި އޮތް އެކުވެރިކަމުގެ ގުޅުން ބަދަހިކޮށް، މަތީ ތައުލީމާ ބެހޭ ކަންކަމުގައި ގުޅިގެން މަސައްކަތް ކުރުމާއި ތައުލީމީ މުޖުތަމައެއް ބިނާކުރުމަށް މަސައްކަތް ކުރަން އެއްބަސްވި އެއްބަސްވުމެއްކަމަށެވެ.
މި އެއްބަސްވުމުގެ ދަށުން ކޮންމެ އަހަރަކު ވެސް 15 ސްކޮލާޝިޕް ހަންގޭރިން ރާއްޖެއަށް ދިނުމަށް ވަނީ ނިންމާފައެވެ. މި 60 ސްކޮލަރޝިޕްގެ ތެރެއިން މިއަހަރު ހުޅުވާލާ 15 ފުރުސަތުގައި ފުރަތަމަ ޑިގްރީގެ 6 ފުރުސަތު ހިމެނޭ އިރު މާސްޓާސް ޑިގްރީގެ 7 ފުރުސަތު ހިމެނެއެވެ. އަދި ޕީއެޗްޑީގެ 2 ފުރުސަތުވެސް ހިމެނެއެވެ. މި ސްކޮލަރޝިޕްތަކުގެ ތެރޭގައި އެގްރިކަލްޗާ ސައިންސް، އާޓްސް އެންޑް ހިއުމެނިޓީޒް، ސޯޝަލް ސައިންސް، ޓީޗިން ޓްރެއިނިން އާއި ސްޕޯޓް ސައިންސް އަދި ނޭޗަރަލް ސައިންސް ފަދަ ދާއިރާތަކުން ކޯސްތަކެވެ.
