އެމްއެންޑީއެފްގެ ޑޯނިއާ މަތިންދާބޯޓު ދުއްވުމުގެ ހުއްދަ ދިވެހި ސިފައިންގެ ޕައިލެޓުންނަށް ލިބިއްޖެއެވެ.
އެމްއެންޑީއެފްގެ 2 ޕައިލެޓުންނަށް ކޯސްޓްގާޑު އޭވިއޭޝަން ސްކޮޑްރަންގެ ބެޖު ހަވާލުކޮށްދެއްވީ ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލްއެވެ. އެމްއެންޑީއެފްގެ ސިފައިންނަށް ފުރަތަމަ ފަހަރަށް ޑޯނިއާ މަތިންދާ ބޯޓު ދުއްވުމަކީ ލިބުނު ޝަރަފެއް ކަމަށް މޭޖާ ޖެނެރަލް ޝަމާލް ވިދާޅުވިއެވެ. މި ޕައިލެޓުން ތަމްރީންކޮށްދީފައިވަނީ އިންޑިއާގެ ސިފައިން ކަމުން އެމީހުންނަށް ޝަމާލް ވަނީ ޝުކުރު އާދަކުރައްވާފައެވެ.
އެމްއެންޑީއެފްގެ ޑޯނިއާ މަތިންދާބޯޓު ދުއްވުމުގެ ހުއްދަ ލިބުނީ ފަސްޓް ލެފްޓިނެންޓް އިބްރާހީމް ޝަރީފާއި ލެފްޓިނެންޓް އަޙްމަދު އަލީއެވެ.
ދިވެހި ޕައިލެޓުންނަށް އެއާކްރާފްޓް ދުއްވޭގޮތަށް އިންޑިއާ އާއެކު ދިވެހި ސަރުކާރުން އެއްބަސްވީ 2019ވަނަ އަހަރު ބަދަލުކުރެވުނު ލެޓާ އޮފް އެކްސްޗޭންޖްގެ ދަށުންނެވެ. އެގޮތުން ފަސް ޕައިލެޓުން ތަމްރީނުކޮށް އޭގެތެރެއިން 4 ޕައިލެޓުން ވަނީ ޑޯނިއާ މަތިންދާބޯޓު ދުއްވުމުގެ ކޯސް ފުރިހަމަކޮށްފައެވެ. އޭގެތެރެއިން މިއަދު ބެޖު ލިބުނު ދެ ސިފައިން މިހާރު ވަނީ މި ޚިދުމަތާ ގުޅިފައެވެ.
