ރާއްޖޭގެ އިޖުތިމާއީ ދުޅަހެޔޮ ކަމަށްޓަކާ، ހޭދަކުރަންޖެހޭ ވަގުތާ ހަކަތައިގެ މިންވަރު ބޮޑު ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ޖުމުހޫރީ ދުވަހުގެ މުނާސަބަތުގައި މިރޭ ދެއްވި ހިތާބުގައި ރައީސް ވިދާޅުވީ، ސިޔާސީ ފަލްސަފާ އަކީ، ދެބަސްވުމަށް އެއްބަސްވުން ކަމަށާއި ހުރި ތަފާތުތަކާ، ފުށުއެރުމާ، ފަރަގުތައް ހިފައިގެން ވެސް އެކުގައި ކުރިއަށް ދިއުން ކަމަށެވެ. އަދި އިޖުތިމާއީ މަސްލަހަތު ހިފަހައްޓައި ދެމެހެއްޓުމަށް ވޭތުވެދިޔަ 3 އަހަރު ވަރަށް ބޮޑު އިސްކަމެއް ދީފައިވާނެ ކަމަށާއި ކުރިއަށް އޮތް ދެއަހަރު ސަރުކާރުން އެންމެ ބޮޑު އިސްކަމެއް ދޭނެ އެއްކަމަކީ، ޖަމާއަތުގެ މަސަލަސްކަން ހިފެހެއްޓުން. ކަމަށްވެސް ރައީސް ވިދާޅުވިއެވެ.
ރައީސްގެ ވާހަކަފުޅުގައި ރާއްޖޭގެ ސިޔާސީ، އަދި އިޖްތިމާއީ މަސްރަހުގައި އުފެދިފައިހުރި ހަލަބޮލިކަމާއި ނުތަނަވަސްކަން، މީގެ 3 އަހަރު ކުރިން ފެނިފައިވާކަމަށެވެ. މިއާއެކު ސިޔާސީ ވާދަވެރިކަން ފެނުނީ، ހަތުރުވެރިކަމާއި އަދާވާތްތެރި ކަމުގެ ގޮތުގައިކަމަށާ، އެންމެ ހެޔޮކަމަކީ އަނެކާއާމެދު އެންމެ ނުބައިކޮށް ކަންކުރުން ކަމުގައި އޭރު ބަޔަކަށް ގަބޫލުކުރެވިފައި އޮތްކަމަށް ރައީސް ވިދާޅުވިއެވެ. އެހެންނަމަވެސް މިއީ ގައުމެއްވިއަސް، ޖަމާއަތެއްވިއަސް އަދި ޖުމްހޫރިއްޔަތެއްވިއަސް ދެމެހެއްޓޭނެ ގޮތެއްނޫންކަމަށް ރައީސް ވިދާޅުވިއެވެ.
މީގެއިތުރުން ރައީސް ވިދާޅުވީ، ގިނަޕާޓީ އެކުލެވޭ ވާދަވެރި ސިޔާސީ ނިޒާމަކީ، ހަތުރުވެރިކަމާ އަދާވާތްތެރިކަން ނޫންކަން، ދައްކަން ޖެހޭ ކަމަށާއި އެއީ ވަކިވެ ގަތުމާ، ބައިބައިވެ މުޖުތަމައު ރޫޅި ދިއުން ނޫންކަން، ލޯތަކަށް ފެންނަން ޖެހޭ ކަމަށެވެ. އަދި ޑިމޮކްރަސީ އަކީ މައިނޯރިޓީއާ، އެންމެ ދުރުގައި އޮތް ގާމަތީ ރަށްވެސް ޝާމިލްވާ ނިޒާމެއްކަން ދުނިޔެ ދަންނަތާ، އެތަށް އަހަރެއް ވެފައިވާއިރު މިކަމަށް އަލަކަސް، ދުނިޔެއަށް އެފިލާވަޅު ދަސްވެ ބާވެއްޖެ ކަމަށް ރައީސް ވިދާޅުވިއެވެ.
