ވިލުފުށީގައި އަޅާ ހޮސްޕިޓަލުގެ ފަންޑިންގ އެއްބަސްވުމުގައި ވަރަށް އަވަހަށް ސޮއިކުރާނެ ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވަނީ މިއަދު ތ ވިލުފުށީ ކައުންސިލާއި ބައްދަލު ކުރައްވާފައެވެ.
މިބައްދަލު ކުރެއްވުމުގައި ވާހަކަފުޅު ދައްކަވަމުން ރައީސް ވަނީ، އެރަށުގައި އަޅަންހަމަޖެހިފައިވާ ހޮސްޕިޓަލްގެ ފަންޑިންގ އެއްބަސްވުމުގައި ވަރަށް އަވަހަށް ސޮއިކުރުމަށް ހަމަޖެހިފައިވާކަން ހާމަކުރައްވައި އެއާރޕޯޓާއި، ބަނދަރު ފުންކުރުންފަދަ މަސައްކަތްތައް ކުރިޔަށްގެންދިއުމަށް ސަރުކާރުން ރާއްވަވާފައިވާ ގޮތްތަކުގެ މަޢުލޫމާތުވެސް ކައުންސިލަރުންނާ ހިއްސާކުރައްވާފައެވެ.
އަދި މީގެ އިތުރުން ކައުންސިލަރުން ފާހަގަކުރެއްވި ކަންކަމުގައި ސަރުކާރުގެ ކަމާގުޅޭ އިދާރާތަކާ މަޝްވަރާ ކުރައްވާނެކަމުގައި ވިދާޅުވިއެވެ. ރައީސް ވިދާޅުވީ ކޯވިޑްގެ ޙާލަތާއެކު ކުރިމަތިވި ބަޖެޓުގެ ދަތިކަމާއެކު ބައެއް މަޝްރޫޢުތައް މަޑުޖައްސާލަން ޖެހުނު ކަމަށެވެ. ނަމަވެސް އަންނަ އަހަރުގެ ބަޖެޓުގައި ވިލުފުށީގެ ގިނަ މަޝްރޫޢުތަކެއް ހިމެނިފައިވާކަން ފާހަގަކުރައްވައި ކައުންސިލުން ފާހަގަކުރެއްވި މަޝްރޫޢުތަކުގެ އެންމެފަހުގެ މަޢުލޫމާތުތައް ރައީސުލްޖުމްހޫރިއްޔާ ކައުންސިލަރުންނާ ޙިއްޞާކުރެއްވިއެވެ.
މި ބައްދަލުކުރެއްވުމުގައި ވިލުފުށީ ކައުންސިލުން ވަނީ އެރަށުގައި އަޅަންހަމަޖެހިފައިވާ ހޮސްޕިޓަލާ ބެހޭގޮތުންނާއި، އެއާރޕޯޓް އެޅުމާއި ބަނދަރު ފުންކުރުމާއި ގިރާސަރަޙައްދު ހިމާޔަތްކުރުމާއި އަދި ސިއްހީ ދާއިރާއާ ތަޢުލީމީ ދާއިރާއާއި ރަށުގެ އިޖްތިމާޢީ އިގްތިޞާދީ ތަރައްޤީއަށް އެރަށުގެ ކައުންސިލާ ރައްޔިތުން ބޭނުންވާ ކަންކަން ފާހަގަ ކުރައްވާފައެވެ. މީގެ އިތުރުން ރަށުގެ ތަރައްޤީއަށް ކުރިޔަށްގެންދިއުމަށް ހަމަޖެހިފައިވާ ބައެއް މަޝްރޫޢުތަކާ ގުޅޭގޮތުން މި ބައްދަލުކުރެއްވުމުގައި ކައުންސިލަރުން މަޝްވަރާކުރެއްވިއެވެ.
