އެކި ގޮތްގޮތުން ނަގާފައިވާ ލޯނުތަކުގެ ސަބަބުން ދައްކަންޖެހޭ ދަރަނިތައް ދެއްކުމަށް ބޭނުންވާ ވަގުތުގައި އެ އަދަދަށް ދައުލަތުގެ ހަޒާނާގައި ފައިސާ ހުންނާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ، 2022 ވަނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓާމެދު ރައްޔިތުންގެ މަޖިލީހުގެ މެންބަރުންގެ އޮތް އެންމެ ބޮޑު ކަންބޮޑުވުމަކީ ދައުލަތުގެ ދަރަނި ދެއްކުމަށް އޮތް ކަންބޮޑުވުމާއި އެކަމަށް ބޭނުންވާ ފައިސާގެ މިންވަރު ނެތިދާނެ ކަމުގެ ކަންބޮޑުވުން ކަމަށެވެ.
ނަޝީދު ވިދާޅުވީ ދަރަނީގެ އަދަދު ބޮޑުވާ ކަމީ އެންމެންވެސް ކަންބޮޑުވާ ކަމެއް ކަމަށާއި ދައުލަތުގެ އާމްދަނީގެ ހިސާބަށް ބަލާއިރު ދަރަނި އަނބުރާ ދެއްކުމަށް އަންނަ އަހަރުގެ ބަޖެޓްގައި އޮތީ 2.9 ބިލިއަން ރުފިޔާ ކަމަށްވާއިރު ދަރަނި ދައްކަންޖެހޭއިރު އެ މިންވަރަށް ޓްރެޒަރީގައި ފައިސާ ހުންނާނެ ކަމަށެވެ. އަދި މަޖިލީހުންވަނީ ދަރަންޏާ ގުޅޭގޮތުން ވަރަށް ފުން ދިރާސާއެއް ކޮށްފައި ކަމަށް ނަޝީދު ވިދާޅުވިއެވެ. އެގޮތުން މަޖިލީހުން ދެކެނީ ދަރަނި ރީ ސްޓްރަކްޗަރ ކުރަންޖެހޭ ކަމަށް ކަމަށާއި 2022 އަދި 2023 ގައި ދައްކަންޖެހޭ ދަރަނި ނުދައްކާ އިތުރު ގްރޭސް ޕީރިއަޑެއް ހޯދުމަށް ޖުމުލަ އަދަދަށް އުނި ކަމެއް ގެނައުމަށް އަދި އިންޓަރެސްޓް ރޭޓަށްވެސް ކުޑަ ބަޖެޓެއް ގެނައުމަށް މަސައްކަތް ކުރުން ކަމަށެވެ. މިގޮތަށް ކަންކުރުމަށް ސަރުކާރަށް ވަނީ މަޖިލީހުން ވަނީ ލަފާ ދީފައި ކަމަށާއި ދައުލަތަށް ދިމާވާނެ އެންމެ ބޮޑު ބުރަ އަކީ ޝައްކެއްވެސް ނެތް ގޮތުގައި ދަރަނި އަނބުރާ ދެއްކުން ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ ދަރަނި އަނބުރާ ދެއްކުމަށް ނަގާފައިވާ މަސައްކަތްތަކުން ދަރަނި ދައްކަން ފައިސާ ނުލިބޭ ކަމީ އެންމެ ކަންބޮޑުވާންޖެހޭ ކަންތައް ކަމަށެވެ. އެހެންވީމާ އެހެނިހެން ގޮތް ގޮތުން ލިބޭ އާމްދަނީ ވަރަށް ބޮޑުތަނުން އިތުރުވެގެން ނޫނީ ދަރަނި އަނބުރާ ދެއްކުން އުދަނގޫ ވާނެ ކަމަށް ނަޝީދު ވިދާޅުވިއެވެ.
