އަންނަ މަހު އެންމެނަށް ކޮވިޑް ދިފާއު ވެކްސިންގެ ބޫސްޓަރ ޑޯޒް ދޭން ފަށާނެކަން ރައީސް އިބްރާހިމް މުހައްމަދު ސާލިހު އިއުލާން ކުރައްވައިފިއެވެ.
ރައީސުލްޖުމުހޫރިއްޔާ ކުރެއްވި ޓުވީޓްގައި ވަނީ، އަނެއްކާވެސް ދެކުނު އެފްރިކާއިން ކޮވިޑް-19 ގެ އާ ވޭރިއަންޓް އޮމިކްރޮން ފެނިފައިވާތީ ކަންބޮޑުވުން ފާޅުކުރައްވާފައެވެ. މިކަމާ ގުޅިގެން ރައީސް ވިދާޅުވީ މި އައު ވޭރިއަންޓާ ދެކޮޅަށް އެޅިދާނެ ފިޔަވަޅުތަކާ ބެހޭ ގޮތުން މަޝްވަރާ ކުރުމަށް ޓެކްނިކަލް އެޑްވައިޒަރީ ގްރޫޕުން މިއަދު މަޝްވަރާ ކުރަން ފަށާފައިވާ ކަމަށެވެ.
ރާއްޖޭގައި ވެކްސިންގެ ބޫސްޓަ ޑޯޒެއް 50 އަހަރުން މަތީގެ މީހުންނަށް މިހާރު އަންނަނީ ދެމުންނެވެ. އެގޮތުން ހެލްތް ޕްރޮޓެކްޝަން އެޖެންސީން އިއުލާން ކޮށްފައިވާ ގޮތަށް މިހާރުވެސް އަންނަނީ ސިއްހީ ހިދުމަތްތެރިންނަށް ބޫސްޓަރ ޑޯޒް ޖަހަމުންނެވެ. ރައީސް މިއަދު ވިދާޅުވީ އަންނަ ހަފުތާއިން ފެށިގެން ފަތުރުވެރިކަމުގެ ދާއިރާގައި އާއި އެއާޕޯޓުގައި މަސައްކަތް ކުރާ ފްރަންޓްލައިން މަސައްކަތްތެރިންނަށް ބޫސްޓަ ޑޯޒް ޖެހުމުގެ މަސައްކަތް ކުރާނެ ކަމަށެވެ.
މިއާއެކު އަންނަ މަހުން ފެށިގެން ވެކްސިން ޖެހޭ އުމުރުގެ އެންމެނަށް ބޫސްޓަރ ޖެހުމަށް ހަމަޖެހިފައިވާކަން ރައީސް އިއުލާން ކުރެއްވިއެވެ.
ރާއްޖެއިން ވަނީ މިހާތަނަށްވެސް 9،058 މީހުންނަށް ވެކްސިންގެ ބޫސްޓަރ ޑޯޒް ޖަހާފައެވެ. ވެކްސިން ޖެހި ޖުމުލަ އަދަދަކީ 395،586 މީހުންނެވެ. މީގެ ތެރޭގައި ހިމެނެނީ ދެ ޑޯޒް ޖަހާފައިވާ 363،150 މީހުންނެވެ.
