ރައީސް ޔާމީން ފިއްލަވަން ނޫޅުއްވާ ކަމަށާއި ޖަލަށްލީމަވެސް ހުންނެވީ ރައްޔިތުންނާއެކު ރާއްޖޭގައި ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.
ފުލުހުން ތަހުގީގު ކުރަމުންދާ މައްސަލައަކާ ގުޅިގެން ކުރީގެ ރައީސް އަބްދުﷲ ޔާމީން އަބްދުއްގައްޔޫމް ރާއްޖޭން ބޭރަށް ފުރުން މަނާކުރަން ފުލުހުންގެ އިދާރާ އިން އަމުރަކަށް އެދުނު ހަބަރާއި ގުޅިގެން ކުރެއްވި ޓުވީޓެއްގައު ވިދާޅުވީ، ދެންވެސް ހުންނަވާނީ ރައްޔިތުންނާއެކު ކަމަށެވެ. އަދި ދައުލަތުގެ މުއައްސަސާތަކުން މުސްތަގިއްލު ކަމާއެކު ވާޖިބު އަދާކޮށް އަދާލަތާއި ހަމަޖެހުން ދެމެހެއްޓުމަށް މަސައްކަތް ކުރުމަށް އާދަމް ޝަރީފު ވަނީ ގޮވާލައްވާފައެވެ.
ރައީސް ޔާމީން ރާއްޖެއިން ފުރުން މަނާކުރުމުގެ އަމުރަކަށް ފުލުހުން އެދުނީ އެމަނިކުފާނުގެ މައްޗަށް ކޮށްފައިވާ ފަސް އަހަރުގެ ހުކުމް ބާތިލް ކުރުމަށް ސުޕްރީމް ކޯޓުން މިއަދު ހުކުމް ކުރުމާއި ގުޅިގެންނެވެ. ރައީސް ޔާމީން އަށް ހުކުމްކޮށް ޖަލަށްލިތާ 732 ދުވަސް ފަހުން އެމަނިކުފާނު މިނިވަން ވުމުން އިދިކޮޅު ފަރާތްތަކުން ދަނީ އުފާ ފާޅު ކުރަމުންނެވެ.
