ސިޓީ ކައުންސިލްގެ ނިންމުން ބާތިލްކޮށްދިނުމަށް އެދި ސިވިލްކޯޓަށާއި އެލްޖީއޭއަށް މައްސަލަ ހުށަހަޅާފައިވާ ކަމަށް އެޗްޑީސީން ހާމަކޮށްފިއެވެ.
ހައުސިން ޑިވޮލޮޕްމަންޓް ކޯޕަރޭޝަނުން ބުނީ ހުޅުމާލެ ފޭސް 1 އަދި ފޭސް 2 ގެ ރަޖިސްޓްރީ ބާތިލް ކޮށްފައިވާކަން އަންގާ މާލެ ސިޓީ ކައުންސިލުން ވަނީ އެ ކޯޕަރޭޝަނަށް އަންގާފައި ކަމަށެވެ. އަދި އެ ނިންމެވުމަކީ ދިވެހިޖުމުހޫރިއްޔާގެ ގާނޫނުއަސާސިން ކަށަވަރުކޮށްދީފައިވާ މުދާ ހޯދުމާއި މުދާ ގެންގުޅުމުގެ ހައްގާއި ބިމާބެހޭ ގާނޫނުގެ 24 ވަނަ މާއްދާގެ (ށ) އާއި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ (ށ) އާ ހިލާފަށް ނިންމަވާފައިވާ ނިންމެވުމެއް ކަމަށް އެ ކޯޕަރޭޝަނުން ދެކޭ ކަމަށެވެ.
އެހެންކަމުން މިކަން ބައްލަވާދެއްވާ މި ނިންމެވުމަކީ ގާނޫނާއި ހިލާފު ނިންމެވުމަށް ކަމަށް ކަނޑައަޅައި ދެއްވައި، އެނިންމެވުން ބާތިލްކޮށްދެއްވައި، ގާނޫނީ އިމުގެ ތެރެއިން މަސައްކަތް ކުރެއްވުމަށް މާލެ ސިޓީ ކައުންސިލަށް އަންގަވައިދެއްވުމަށް އެދި ސިވިލް ކޯޓަށާއި ލޯކަލް ގަވަރމަންޓް އޮތޯރިޓީއަށް މިއަދު ހުށަހަޅާފައިވާ ކަމަށެވެ.
