ކ ގާފަރަށް ބޭނުންވާ ގިނަ ކަންކަން ކުރުމަށް ވަނީ ބަޖެޓްގައި ހިމަނާފައި ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
މަސްވެރިންގެ ދުވަހުގެ ޙަރަކާތްތަކުގައި ބައިވެރިވެވަޑައިގަތުމަށް ކ. ގާފަރަށް ކުރެއްވި ދަތުރުފުޅުގައި، މިއަދު ހެނދުނު ގާފަރު ކައުންސިލް އިދާރާގައި ބޭއްވެވި މި ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ހުރި ކަންބޮޑުވުންތަކާއި ރަށުގެ ތަރައްޤީއަށް ބޭނުންވާ ކަންތައްތައް ރައީސުލްޖުމްހޫރިއްޔާއާ ހިއްސާ ކުރައްވައި އެކަންކަމާ ގުޅޭގޮތުން މަޝްވަރާކުރައްވާފައެވެ. މިގޮތުން، ކައުންސިލުން ފާހަގަކުރައްވައިފައިވާ ކަންކަމުގެ ތެރޭގައި، ރަށުގެ ރައްޔިތުން ބިން ހިއްކުމަށް ބޭނުންވާކަމާއި، ބަނދަރުގެ ޖާގައިގެ ދަތިކަމާއި، ޞިއްޙީ މަރުކަޒު އަޕްގްރޭޑްކުރުމަށް ބަޖެޓުގައި ހިމެނިފައިވީ ނަމަވެސް މަސައްކަތް ނުފެށި ލަސްވުމުން ހުރި ކަންބޮޑުވުންތަކާއި، ރަށްގިރުމުގެ މައްސަލައާއި، ފެނާއި ނަރުދަމާގެ މަސައްކަތް ބަޖެޓުގައި ހިމެނުނު ނަމަވެސް މަސައްކަތް ނުފެށި ލަސްވާ މައްސަލަ ހިމެނެއެވެ. މީގެ އިތުރުން ވެސް ކައުންސިލުން ވަނީ ކުނި މެނޭޖްކުރުމުގައި ދިމާވާ ދަތިތަކާއި، ސްކޫލްގެ ޖާގައިގެ ދަތިކަން އަދި ބޭންކިންގ ގެ ޚިދުމަތް ބޭނުންވާކަން ފާހަގަކުރައްވާފައެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވަނީ އޮފީސް މަސައްކަތްކުރުމަށް ވަކި ޚާއްޞަ ޖާގައެއް ނެތުމުގެ ސަބަބުން ދިމާވާ ދާތިކަން ފާހަގަކުރައްވައިފައެވެ.
ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި ކަންކަމާ ގުޅޭ އެންމެ ފަހުގެ މަޢުލޫމާތު ބައްދަލުވުމުގެ ބައިވެރިންނާ ހިއްސާކުރައްވާފައެވެ. މިގޮތުން ސްކޫލްގެ މައްސަލަ ނޫން އެހެން ހުރިހާ ކަމެއް ވަނީ ބަޖެޓުގައި ހިމެނިފައިކަމަށާއި އަދި ކޮންމެވެސް އެއް މަރުޙަލާއެއްގައި މަސައްކަތް ކުރިޔަށް ހިނގަ ހިނގާ އޮތްކަން އެމަނިކުފާނު ފާހަގަކުރެއްވިއެވެ.
