އެންމެ އިސްކަންދޭ ސިޔާސަތަކީ ރާއްޖޭގެ ހުރިހާ ހިސާބެއްގައި އަސާސީ ހިދުމަތް ގާއިމުކުރުން ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
އެމްޓީސީސީއަށް 41 އަހަރު ފުރުމުގެ ގޮތުން ރޭ ބޭއްވި ހަފުލާގައި ވާހަކަފުޅު ދައްކަވަމުން ރައީސް ސާލިހު ވިދާޅުވީ،
ބަނދަރު ހެދުން، ބިން ހިއްކުން، ގޮނޑުދޮށް ޙިމާޔަތްކުރުން، ޝީޓް ޕައިލްކުރުން، މިއީ އެ ކުންފުނީގެ އެންމެ ޒަމާންވީ މަސައްކަތްތައް ކަމަށާއި މިއީ ރަށްރަށުގެ ރައްޔިތުން އެންމެ ބޭނުންވާ ލަފާފުރުމުގެ ޚިދުމަތާ ގުޅިފައި ހުރި މަޝްރޫޢުތައް ކަމަށެވެ. އަދި އެއަރޕޯޓް ހެދުމާއި، މަގު ހެދުމާއި، ފެނާއި ނަރުދަމާ ނިޒާމު ގާއިމުކުރުމަކީވެސް، ރަށްރަށާއި މާލެއާ ދެމެދު ހުރި އަސާސީ ހިދުމަތުގެ ތަރައްގީގެ ފަރަގު ނައްތައިލުމަށްޓަކައި ހިންގާ ވަރަށް މުހިންމު މަޝްރޫޢުތަކެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ، މި ސަރުކާރުން އެންމެ ބޮޑަށް އިސްކަންދޭ ސިޔާސަތަކީ އެއީ ތަރައްގީވެސް ލާމަރުކަޒުވުން ކަމަށާއި ރާއްޖޭގެ ހުރިހާ ހިސާބެއްގައިވެސް އަސާސީ ހިދުމަތްތައް ގާއިމުކުރުމާއެކު ކޮންމެ ކަމެއްގައި މާލެ އަންނަން ނުޖެހި، އެމީހަކު ދިރިއުޅޭ ރަށަކުން ނުވަތަ އެ ސަރަޙައްދަކުން، އަސާސީ ހިދުމަތްތައް ލިބޭނެގޮތް ހެދުން ކަމަށެވެ.
އަދި ރާއްޖެ ތަޖުރިބާކުރަމުން މިދާ ކޯވިޑް-19ގެ ދަތިކަމުގެ ތެރޭގައި، ތަރައްގީގެ ބައެއް ސިޔާސަތުތަކަށް ބަދަލުތަކެއް ގެންނަން ޖެހުނު ނަމަވެސް ރައްޔިތުންގެ އަސާސީ ޚިދުމަތްތަކާ ގުޅިފައިވާ ތަރައްގީގެ މަޝްރޫޢުތައް މެދުކަނޑާނުލައި ކުރިއަށް ގެންދިޔުމަށް ވަރަށް ބޮޑަށް ސަމާލުކަން ދިން ކަމަށް ވިދާޅުވިއެވެ.
ރައީސް ވިދާޅުވީ، އެ އަސާސީ ޚިދުމަތްތަކާ ގުޅިފައިވާ އެއް ދާއިރާއަކީ، ދަތުރުފަތުރުގެ ދާއިރާ ކަމަށްވާއިރު ހައި ސްޕީޑް ފެރީ ނިޒާމަކުން މުޅި ރާއްޖެ ގުޅައިލުމަށް، މި އަހަރުގެ ކުރީކޮޅު އެމް.ޓީ.ސީ.ސީ.އާ ބޮޑު މަޝްރޫޢެއް ޙަވާލުކޮށްފައިވާނެ ކަމަށާއި އެ މަޝްރޫޢުގެ ޒޯން 1 ގައި ހިމެނޭ، ހއ. ހދ. އަދި ށ. އަތޮޅުގެ ރަށްތަކުގެ މެދުގައި، ފެރީގެ ޚިދުމަތް ފެށުމަށް، އެ ކުންފުނިން އަންނަނީ ތައްޔާރުވަމުން ކަމަށް ރައީސް ވިދާޅުވިއެވެ.
ތަރައްޤީގެ މަޝްރޫޢުތަކާ ގުޅިގެން، ވަޒީފާގެ އެތައް ބައިވަރު ފުރުޞަތުތަކެއް ސަރަޙައްދުތަކުގައި އުފެދިގެންދާނެ ކަމަށާއި ރަށްރަށުގައި އުފެދޭ އެ ވަޒީފާތަކަށް ބޭނުންވަނީ ދިވެހިން، ހުނަރުވެރި ކެރޭ ދިވެހި ޒުވާނުން، މިއީ ސްކޫލްތަކުން ނިމިގެން ނުކުންނަ ދަރިވަރުންވެސް، އަދި ބެލެނިވެރިންވެސް މިހާރަށްވުރެ ބޮޑަށް ވިސްނަންވީ ކަމެއް ކަމަށް ރައީސް ވިދާޅުވިއެވެ.
