މާލެ ސަރަހައްދަށް މިވަގުތު ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަކަމަށާއި އެހެންނަމަވެސް ސިޔާސީ ބޭނުމަކަށްޓަކައި ބޯހިޔާވަހިކަމުގެ ވާހަކަ ދައްކާ މީހުންވެސް އެބަ އުޅޭކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ.
ފެނާއި ނަރުދަމާ ގާއިމް ނުކުރެވި ހުރި ހުރިހާ ރަށެއްގައި އެ މަޝްރޫއު އިފްތިތާހު ކުރުމުގެ ގޮތުން ބުދަ ދުވަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ މިވަގުތު ރާއްޖޭގެ ތަރައްގީއަށް އެންމެ މުހިންމު އެއް މަސައްކަތަކީ މާލޭގެ ރައްޔިތުންގެ ގޯތި ގެދޮރުގެ މަސައްކަތް ކަމަށެވެ. ހަގީގަތުގައިވެސް މިއީ ބޮޑުކަމެއްގެ ގޮތުގައި ދެކި މިވާހަކަ ދައްކާ ވަރަށް ގިނަ ރައްޔިތުން އެބަ ތިބި ކަމަށާއި އެހެންނަމަވެސް ސިޔާސީ ބޭނުމުގައި ބޯހިޔާވަހިކަމުގެ ވާހަކަ ދައްކާ މީހުންވެސް އެބަ ތިބިކަމަށް ރައީސް ވިދާޅުވި އެވެ.
"ސިޔާސީ އެކި އެކި ފައިދާ ހޯދުމަށްޓަކައި ކަނޑައެޅިގެން ކަން އޮތްގޮތް އެނގިހުރެ އެވާހަކަ ދައްކާ މީހުން އެބަ އުޅޭ. އަޅުގަނޑުމެން އެހުރިހާ ވާހަކައެއްވެސް އަޑުއަހަން. އިރާދަކުރެއްވިއްޔާ މިސަރުކާރުގަ މާލޭގެ ރައްޔިތުންގެ ބޯހިޔާވަހިކަމާއި ގޯތި ގެދޮރުގެ މައްސަލައަށްވެސް ހައްލެއް ހޯދައިދޭނަން" ރައީސް ވިދާޅުވި އެވެ.
ސިޔާސީ ބޭނުމަށްޓަކައި ބޯހިޔާވަހިކަމުގެ ވާހަކަ ދައްކާ މީހުންނަށް ރައީސް އިޝާރާތް ކުރެއްވިއިރު އިދިކޮޅު ޕީޕީއެމްގެ މެޖޯރިޓީ އޮންނަ މާލެ ސިޓީ ކައުންސިލުން ދަނީ ސަރުކާރުގެ ބޯހިޔާވަހިކަމުގެ ސިޔާސަތަށް ވަރަށް ބޮޑަށް ފާޑުވިދާޅުވަމުންނެވެ. އެގޮތުން ހުޅުމާލޭ ދެވަނަ ފިޔަވަހިން ބިން ވިއްކަން އެޗްޑީސީން ހުޅުވައިލުމުން ސިޓީ ކައުންސިލުން ވަނީ ކަންބޮޑުވުން ފާޅުކޮށްފަ އެވެ. އެކައުންސިލުން ބުނަނީ މާލޭގެ ރައްޔިތުންނަށް ބޯހިޔާވަހިކަމުގެ ދަތިކަން ކުރިމަތިވެފައި ވަނިކޮށް މުއްސަނދިންނަށް ބިން ވިއްކަން ހުޅުވައިލުން ބަލައިނުގަނެވޭކަމަށެވެ.
ރައީސް ވިދާޅުވީ މިހާރުވެސް ހުޅުމާލޭގައި 5،000 ހައުސިންގް ޔުނިޓު އެޅުމުގެ މަސައްކަތް ކުރިއަށް ދާކަމަށެވެ. އަދި މާލޭގެ ރައްޔިތުންނަށް ހާއްސަކޮށްގެން ގޯތި ދިނުމުގެ މަޝްރޫއެއް ސަރުކާރުން ރާވާފައި އެބަ އޮތްކަމަށް ވިދާޅުވި އެވެ. ރައީސް ވިދާޅުވީ ގޯތި ދޭނީ ގުޅިފަޅުން އެކަނި ނޫން ކަމަށާއި، ހުޅުމާލެއިންވެސް ގޯތި ދޫކުރާނެކަމަށެވެ. މީގެ އިތުރުން މާލެ ސަރަހައްދުގެ އެހެން ފަޅުތަކުންވެސް މާލެ ރައްޔިތުންނަށް ގޯތި ލިބޭނެކަމަށް ރައީސް ވިދާޅުވި އެވެ.
"އަޅުގަނޑުމެން މިދައްކަނީ 1،000 ގޯތީގެ ވާހަކައެއް ނޫން. އޭގެ ދެގުނަ ތިންގުނަ އިރާދަކުރެއްވިއްޔާ ހަތަރު ގުނަ މާލޭގެ ރަށްވެހިންނަށް، މާލޭގެ ރައްޔިތުންނަށް އަމާޒުކޮށްގެން އަޅުގަނޑުމެން ކޮށްދޭނަން" ރައީސް ވިދާޅުވި އެވެ.
މާލޭގެ ރައްޔިތުންނަށް އަމާޒުކޮށްގެން ބޯހިޔާވަހިކަމުގެ މަޝްރޫއުތައް ފައްޓަވާނެކަމަށް ރައީސް ވިދާޅުވިއިރު ހުޅުމާލެ ދެވަނަ ފިޔަވަހިން 60 ބިން ވިއްކަން އެޗްޑީސީން ހުޅުވައިލުމުން ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުވެސް ވަނީ ފާޑު ވިދާޅުވެފަ އެވެ. އެމަނިކުފާނު ވިދާޅުވީ މާލޭގެ ރައްޔިތުންނަށް ގޯތި ނުދީ ބޮޑު އާމްދަނީ ލިބޭ ފަރާތްތަކަށް ބިން ވިއްކަން ހުޅުވައިލުމަކީ ރަނގަޅު ކަމެއް ނޫންކަމަށެވެ.
