އަތޮޅުތެރޭގައި ދިރިއުޅޭ ފަރާތްތަކުން އަމިއްލަ ރަށުގައި ވަޒަންވެރިވެގެން ދިރިއުޅެން އިހުތިޔާރު ކުރުމުގެ ފުރުސަތު ދިނުމުގެ ގޮތުން 700،000 ރުފިޔާ އާއި ހަމަށް ދޫކުރާ ލޯން ސްކީމެއް ސަރުކާރުން ތައާރަފުކޮށްފި އެވެ.
ހައުސިންގް މިނިސްޓްރީ އާއި އެޗްޑީއެފްސީ ގުޅިގެން "ގެދޮރުވެރިޔާ ލޯނު" ގެ ނަމުގައި ހިންގާ މި ލޯނު ދޫކުރަން ހަމަޖެހިފައިވަނީ މާލެ ނޫން ރަށްރަށުގައި ދިރިއުޅޭ ފަރާތްތަކަށެވެ. މި ލޯނު ތައާރަފުކުރުމަށް ރޭ ބޭއްވި ރަސްމިއްޔާތެއްގައި ހައުސިންގް މިނިސްޓަރު މުހައްމަދު އަސްލަމް ވިދާޅުވީ މިލޯނަކީ ދިގުމުއްދަތުގެ ލޯނަކަށްވުމުން ލޯނު އަނބުރާ ދެއްކުމުގައި ގިނަ ލުއިފަސޭހަތަކެއް އެބަހުރި ކަމަށެވެ. އެގޮތުން އިންޓަރެސްޓު ރޭޓުގެ ގޮތުގައި ނަގަން ހަމަޖެހިފައިވަނީ 6 އިންސައްތަ ކަމަށް އަސްލަމް ވިދާޅުވި އެވެ. މިއީ މިހާރު ގެދޮރުވެރިކަމަށް ދޫކުރާ ލޯނުތަކުގެ އިންޓަރެސްޓު ރޭޓާއި އަޅާ ބަލާއިރު ގާތްގަނޑަކަށް ދެބައިކުޅަ އެއްބައި ކުޑަ އަދަދެކެވެ.
ލޯނުގެ އެންމެ ބޮޑު އަދަދަކީ 700،000 ރުފިޔާ އެވެ. އަސްލަމް ވިދާޅުވީ އެ އަދަދަކީ އަތޮޅު ތެރޭގައި ފެންވަރު ރަނގަޅު ގެއެއް އެޅޭނެވަރުގެ އަދަދެއް ކަމަށެވެ.
"ގެދޮރުވެރިޔާ ލޯނު" 20 އަހަރަށް ބަހާލައިގެން ދެއްކޭނެ އެވެ. އެހެންކަމުން މަހަކު ދައްކަން ޖެހޭނީ ވަރަށް ކުޑަ އަދަދެކެވެ.
އަސްލަމް ވިދާޅުވީ މިހާރު ލިބެން ހުރި ލޯނުތަކުގެ އިންޓްރެސްޓް ބޮޑުވުމަކީ އަތޮޅުތެރޭގައި ގެދޮރުވެރިކަމަށް އޮތް އެންމެ ބޮޑު ހުރަސް ކަމަށެވެ. އަދި މިފަދަ ލޯނެއް ތައާރަފުކުރުމުން މާލެއަށް ހިޖުރަ ކުރުމަށް އޮންނަ ޝައުގުވެރިކަން ކުޑަކުރެވިދާނެކަމަށް ގަބޫލު ކުރެވޭކަމަށް އަސްލަމް ވިދާޅުވި އެވެ.
އަސްލަމް އިތުރަށް ވިދާޅުވީ މި ލޯނުތަކަށް އެޗްޑީއެފްސީން ކަނޑައަޅާފައިވާ ޝަރުތުތައް ހަމަވާ ހުރިހާ ފަރާތްތަކަށް ލިބޭނެ ކަމަށެވެ. އަދި މިއީ އަތޮޅުތެރޭގައި ވަޒީފާ އަދާކުރާ ޒުވާނުންނަށް އެ މީހުންގެ ގެދޮރު އިމާރާތްކުރުމަށާއި ބާވެފައިވާ އިމާރާތްތައް އާކުރަން ބޭނުންވާ މީހުންނަށް ލިބޭ ފުރުސަތެއް ކަމަށް އޭނާ ވިދާޅުވި އެވެ.
އަލަށް ގެ އިމާރާތް ކުރާ ފަރާތްތަކުގެ އިތުރުން ގެ މަރާމާތު ކުރުމަށާއި ހަދަން ފަށާފައިވާ އިމާރާތްތައް ނިންމުމަށްވެސް މި ލޯނު ދޫކުރާނެ އެވެ.
+1
+1
+1
+1
+1
+1
