ސިޔާސީ މައިދާނުން އަންހެނުންނަށް ފުރުސަތު ހޯދައިދިނުމަށް ކުރެވުނު އެންމެ މުހިންމު އެއް ކަމަކީ، ގާނޫނުގެ އަތުން އަންހެނުންގެ އަތުގައި ހިފައިގެން، މަގާމުތަކަށް ގެންގޮސްދިނުން ކަމަށާއި ލާމަރުކަޒީ ގާނޫނަށް ގެނައި އިސްލާހުގެ ސަބަބުން އެކަން ވެއްޖެ ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
2020 - 2021 ވަނަ އަހަރުގެ ރެހެންދި އެވޯޑު ދިނުމަށްޓަކައި މިރޭ ރެހެންދި ސްކޫލުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ގާނޫނަށް ގެނެވުނު ބަދަލާއެކު އެ ބަދަލުގެ ނަތީޖާއަކަށްވީ، އެއްވެސް ރަށެއް، އެއްވެސް ސިޓީއެއް އިސްތިސްނާ ނުވެ، ކޮންމެ ކައުންސިލެއްގައިވެސް މެންބަރުންގެ 33 އިންސައްތައަކީ، އަންހެނުން ކަމުގައި ވެގެންދިޔުން ކަމަށާއި މި ބަދަލާއެކު، ލޯކަލް ކައުންސިލް އިންތިހާބުގައި، ޖުމްލަ 39.5 އިންސައްތަ ގޮނޑި އަންހެނުން ކާމިޔާބު ކޮށްފައިވާ ކަމަށެވެ.
މީގެ އިތުރުން، ގާނޫނީ ހައިސިއްޔަތު ލިބިގެން، އަދި މެންބަރުންނަށް ދައުލަތުގެ ބަޖެޓުން އުޖޫރަ ކަނޑައަޅައިގެން، ރާއްޖޭގައި އިންތިހާބުކުރި ފުރަތަމަ އަންހެނުންގެ ކޮމިޓީތައްވެސް އުފެދިގެން އެދިޔައީ މި އަހަރުގެ ތެރޭގައި ކަމަށާއި މި ބަދަލުތަކުގެ ސަބަބުން، ތަރައްގީގެ ސިޔާސަތުތައް ކަނޑައެޅުމުގަޔާއި، ކަންކަން ނިންމުމުގައި، އަންހެނުންގެ ބައިވެރިވުން ޢަމަލީގޮތުން މިހާރު އިތުރުވެފައިވާ ކަމަށް ރައީސް ވިދާޅުވިއެވެ.
ހަގީގަތުގައި ގައުމު ބިނާކުރުމުގައި، މިހާރުވެސް އެންމެ މުހިންމު ދައުރެއް އަދާކުރާ ބަޔަކީ ދިވެހި އަންހެނުން ކަމަށާއި ސަބަބަކީ، ގައުމުގެ ތަރައްގީ އެބައެއްގެ އަތްމަތިން ބައްޓަންވެގެން އަންނަ ގައުމުގެ ޒުވާން ޖީލަށް، އެންމެ ޅަފަތުން ފެށިގެންވެސް އިލްމު އުނގަންނައިދިނުމުގައި، އެންމެ ގިނައީ އަންހެނުން ކަމަށްވާތީ ކަމަށް ރައީސް ވިދާޅުވިއެވެ. ރާއްޖޭގެ ތައުލީމީ ދާއިރާގައި ހިދުމަތް ކުރައްވާ ގާތްގަނޑަކަށް 78 އިންސައްތައަކީ އަންހެން ބޭފުޅުން. ކަމަށް ރައީސް ވިދާޅުވިއެވެ.
