ސައުތު ކޮރިއާގެ ސުޕަސްޓާ ޕާކް ސިއޯ ޖޫން، މާވެލް ސިނެމެޓިކް ޔުނިވާސްގެ "ކެޕްޓަން މާވެލް" ގެ ދެވަނަ ބައިން ފެންނާނެ ކަމަށް ރިޕޯޓުތައް ބުނެފި އެވެ.
"ދަ މާވެލް" ގެ ނަން ދީފައިވާ މި ފިލްމުގެ ކާސްޓުންގެ ލިސްޓަށް ޕާކްގެ ނަން އިތުރުވެފައިވާކަން ގިނަ މީޑިއާތަކެއްގައި ވަނީ ކަށަވަރުކޮށްދީފަ އެވެ. އެހެންނަމަވެސް މި ފިލްމުގައި ޕާކް ފެނިގެންދާނެކަން ރަސްމީކޮށް އެއްވެސް ފަރާތަކުން އިއުލާން ކޮށްފައެއް ނުވެ އެވެ.
"ދަ މާވެލް" ގައިވެސް ކެޕްޓަން މާވެލްގެ ރޯލުން ފެންނާނީ ބަތަލާ ބްރީ ލާސަން އެވެ. މީގެ އިތުރުން މޯނިކާ ރޭމްބޯގެ ރޯލުން ޓެޔޯނާ ޕެރިސް އަދި ކަމަލާ ހާންގެ ރޯލުން އިމާން ވެލާނީ ފެނިގެންދާނެ އެވެ. ފިލްމުގެ މަސައްކަތް މިހާރު ވަނީ ފަށައިފަ އެވެ.
"ދަ މާވެލް" ރިލީޒް ކުރަން ނިންމާފައިވަނީ އަންނަ 2022 ވަނަ އަހަރުގެ 11 ވަނަ ދުވަހު އެވެ.
ޕާކް ސިއޯ ޖޫން އަކީ ކޮރިއަން ޑްރާމާ ސީރީޒްތަކުން ފެންނަމުން އައިސްފައިވާ އެކްޓަރެކެވެ. 2019 ވަނަ އަހަރުގެ އެކެޑަމީ އެވޯޑު (އޮސްކާ) ގައި އެންމެ މޮޅު ފިލްމުގެ އެވޯޑު ލިބުނު "ޕެރެސައިޓް" ގައިވެސް ޕާކް މުހިންމު ރޯލަކުން ފެނިގެން ދިޔަ އެވެ.
ޕާކް މިވަގުތު މަސައްކަތް ކުރަމުން ދަނީ "ޑްރީމް" ނަމަކަށް ކިޔާ ކޮރިއަށް ފިލްމެއްގަ އެވެ. އެފިލްމުގައި އޭނާ ފެންނާނީ ކޮރިއާގެ ލަވަޔިތުންތެރިޔާ އައިޔޫ އާއިއެކު އެވެ.
