ފަރްހާން އަކްތަރު ލީޑް ރޯލުން ފެންނަ "ތޫފާން" އަންނަ ޖުލައި މަހުގެ 16 ވަނަ ދުވަހު އެމަޒޯން ޕްރައިމް ގައި ރިލީޒްކުރަން ނިންމައިފި އެވެ.
މިފިލްމު ކުރިން ރިލީޒް ކުރަން ނިންމީ މިދިޔަ މެއި މަހުގެ ތެރޭގަ އެވެ. އެހެންނަމަވެސް އިންޑިއާގައި ކޮވިޑްގެ ހާލަތު ގޯސްވުމާއި ގުޅިގެން ފިލްމުގެ ބައެއް މަސައްކަތްތަކަށް ބުރޫ އެރުމާއި ގުޅިގެން ފިލްމު ރިލީޒްކުރުން ލަސްކުރި އެވެ.
އެމަޒޯން ޕްރައިމް އިން ވަނީ "ތޫފާން" ރިލީޒް ސްޓްރީމް ކުރަން ފަށާނެ ތާރީހު އިއްޔެ އިއުލާން ކޮށްފަ އެވެ. އިންޑިއާ ހިމެނޭހެން ދުނިޔޭގެ 240 ގައުމެއްގައި މި ފިލްމު ޖުލައި 16 ވަނަ ދުވަހުން ފެށިގެން ސްޓްރީމް ކުރެވޭނެ ކަމަށް އެމަޒޯން ޕްރައިމް އިން ބުންޏެވެ.
"ތޫފާން" އަކީ ސްޕޯޓްސް ޑްރާމާ އެކެވެ. ފިލްމު ޑައިރެކްޓު ކުރީ ރާކޭޝް އޯމްޕްރަކާޝް މެހެރާ އެވެ. ޕްރޮޑިއުސް ކުރީ އެކްސެލް އެންޓަޓެއިންމެންޓުގެ ފަރާތުން ރިތޭޝް ސިދްވާނީ އާއި ފަރްހާން އެވެ. އަދި ޑައިރެކްޓަރު ރާކޭޝްގެ ރޮމްޕް ޕިކްޗާސް އިންނެވެ.
ފަރްހާން އާއި ރާކޭޝް މީގެ ކުރިންވެސް ވަނީ އެކީގައި މަސައްކަތް ކޮށްފަ އެވެ. އެއީ ވެސް ސްޕޯޓްސް ޑްރާމާ އެކެވެ. "ބާގް މިލްކާ ބާގް" އަކީވެސް ބޮކްސް އޮފީހުގެ އިތުރުން ކްރިޓީކްސްގެ ގޮތުންވެސް ރަނގަޅު ކާމިޔާބެއް ހޯދި ފިލްމެކެވެ.
"ތޫފާން" ގައި ފަރްހާންގެ އިތުރުން ޕަރޭޝް ރާވަލް އާއި މްރުނާލް ޓާކުރް ވެސް މުހިންމު ރޯލުތަކުން ފެންނާނެ އެވެ.
