ސަލްމާން ހާން ލީޑް ރޯލުން ފެނިގެންދާ ފިލްމު "ބައިޖާން" އަންނަ ޖުލައި މަހު ބައްދަލުކުރާ އަޟްހާ އީދާއި ދިމާކޮށް އިއުލާން ކުރަން ނިންމާފައިވާކަމަށް ރިޕޯޓުތައް ބުނެފި އެވެ.
މިވަގުތުވެސް ގިނަ ފިލްމުތަކެއްގެ މަސައްކަތް ސަލްމާން ކުރަމުން ދާއިރު އަންނަ ޖުލައި މަހުގެ ތެރޭގައި އިތުރު ދެ ފިލްމެއް އިއުލާން ކުރާނެ ކަމަށް އޮތީ ބެލެވިފަ އެވެ. މިދިޔަ ފިތުރު އީދާއި ދިމާކޮށް ޑިޖިޓަލްކޮށް ރިލީޒް ކުރި ސަލްމާންގެ "ރާދޭ: ޔުއަރ މޮސްޓް ވޯންޓެޑް ބާއީ" ވެގެން ގޮސްފައިވަނީ ރެކޯޑުތަކެއް މުގުރާލި ކާމިޔާބު ފިލްމަކަށެވެ.
މީޑިއާ ރިޕޯޓުތައް ބުނާ ގޮތުން އަންނަ ޖުލައި މަހުގެ 21 ވަނަ ދުވަހު "ބައިޖާން" އިއުލާން ކުރާނެ އެވެ. އަދި އެފިލްމުގެ ފުރަތަމަ ލުކްވެސް އެދުވަހު ދައްކައިލާނެ ކަމަށް އޮތީ ބެލެވިފަ އެވެ. "ބައިޖާން" އަށް ކުރިން ކިޔަން ނިންމާފައި ވަނީ "ކަބީ އީދު ކަބީ ދިވާލީ" އެވެ.
"ބައިޖާން" އަކީ ތަމިލް ފިލްމެއްގެ ރީމޭކެކެވެ. އެފިލްމުގައި ސަލްމާން ހަދާކުރާނީ ހަތަރު ބެއިން ތިބި އާއިލާއެއްގެ ދޮށީ ފިރިހެން މީހެއްގެ ރޯލެވެ. ސަލްމާގެ ކޮއްކޮއިންގެ ރޯލު އަދާކުރާނީ އޭނާގެ ޅިޔަނު އާޔޫޝް ޝަރުމާގެ އިތުރުން އާސިމް ރިއާޒް އާއި ޒަހީރް އިގްބާލް އެވެ. ފިލްމުގައި ސަލްމާން އުޅޭނީ ކައިވެނި ނުކުރާށެވެ. އެހެންނަމަވެސް އަނެއް ތިން ފިރިހެން ކުދިން ސަލްމާން ކައިވެނި ކުރުވަން މަސައްކަތް ކުރާނެ އެވެ. މިފިލްމުގައި ސަލްމާއާއެކު ލޯބީގެ ރޯލުން ފެންނާނީ ޕޫޖާ ހޭގްޑޭ އެވެ.
ސައުތުގެ ފިލްމު "މާސްޓާ" ގެ ހިންދީ ރީމޭކުންވެސް ސަލްމާން ފެންނާނެ ކަމަށް އޮތީ ބެލެވިފަ އެވެ. މިއަހަރުގެ ޖެނުއަރީގައި ރިލީޒްކުރި ތަމިލް ފިލްމުގައި ލީޑް ރޯލުން ފެނުނީ ވެޖޭގެ އިތުރުން ވިޖޭ ސޭތުޕަތީ އެވެ. ހިންދީ ރީމޭކުގައި ސަލްމާން އަދާކުރާނީ ވިޖޭގެ ރޯލެވެ. ވިޖޭ ސޭތުޕަތީގެ ރޯލުން ފެންނާނީ ކޮން ފަންނާނެއްކަމެއް އަދި ނޭނގެ އެވެ.
ސަލްމާންގެ ކުރިއަށް ހުރި ފިލްމުތަކުގެ ތެރޭގައި "އަންތިމް- ދަ ފައިނަލް ޓްރުތު"، "ޓައިގާ 3" ގެ އިތުރުން "ކިކް 2" ހިމެނެ އެވެ.
