ބެއްޔާއަށް އުމުރުން 79 އަހަރެވެ. އަސްލު ނަމަކީ އާދަމް އިސްމާއިލްފުޅެވެ. އެކަމަކު ރަށު މީހުން ކިޔައި އުޅެނީ ބެއްޔާ އެވެ. ގިނަ މީހުންނަށް ބެއްޔާގެ އަސްލު ނަން އެނގޭނެހެން ހިއެއް ނުވެ އެވެ. ބެއްޔާގެ ރަށުގައި އުޅެނީ ގާތްގަނޑަކަށް 900 އެއްހާ މީހުންނެވެ.
ބެއްޔާއަކީ ރަށު މީހުން ނިކަން ރުޅިއަންނަ މީހެކެވެ. މީހުންނާއި މާ ގުޅިގެން އުޅޭ މީހެއްވެސް ނޫނެވެ. އަބަދުވެސް ކޮންމެވެސް ކަމަކާ ހުންނަނީ ރުޅި އައިސްފަ އެވެ. ގިނަ ވަގުތު ހޭދަ ކުރަނީ ކޮންމެވެސް ކަމަކާ ޝަކުވާއެއް ކުރާށެވެ.
އުމުރުން ދުވަސްވަމުން ދިޔަ ވަރަކަށް ބެއްޔާގެ ރުޅި ދިޔައީ ގަދަވަމުންނެވެ. ބަސްތައް އިތުރަށް ވިހަވާން ފެށި އެވެ. ޝަކުވާތައްވެސް އިތުރުވާން ފެށި އެވެ. ރަށު މީހުން ދިޔައީ ބެއްޔާއާ އިތުރަށް ދުރުވަމުންނެވެ. އެއީ ބެއްޔާގެ ކައިރީގައި އެހެން މީހަކަށްވެސް ހިތްހަމަޖެހިގެން ނުހުރެވޭތީ އެވެ. ބެއްޔާގެ ސަބަބުން އެހެން މީހުންނަށްވެސް ނުތަނަވަސްކަމާ ކުރިމަތިލާން ޖެހެ އެވެ.
ބެއްޔާއަށް 80 އަހަރު ވީ ދުވަހެވެ. އާދަޔާ ހިލާފު ކަމެއް ހިނގައިފި އެވެ. ކުއްލިއަކަށް ޝަކުވާ ކުރުން ހުއްޓާލައިފި އެވެ. މޫނުމަތީގައި ހުރި ރުޅިވެރިކަންވެސް ފިލައިފި އެވެ. ރަށު މީހުން އެކަކު އަނެކެއް ކައިރީ މިވާހަކަ ދައްކަމުން ދައްކަމުން މުޅި ރަށަށް އެ ހަބަރު ފެތުރިއްޖެ އެވެ.
ހަވީރު ބެއްޔާ އަބަދުވެސް ހޮޅުއައްޓަށް ގޮސް އުޅެ އެވެ. އެހެންވެގެން ރަށުގެ ގިނަ ބަޔަކު ހޮޅު އައްޓަށް އެއްވެއްޖެ އެވެ. ބެއްޔާއަށް މި ވީގޮތެއް އޮޅުން ފިލުވާށެވެ. ހަތަރެއް ޖަހައިފި އެވެ. ބެއްޔާއެއް ނާދެ އެވެ. އެކަކު އަނެކަކާ ސުވާލު ކުރަމުން ދިޔައީ ބެއްޔާއަށް އައިސްފައި ހުރީ ކޮން ބަދަލެއްތޯއާއި ވީ ކިހިނެއްތޯ އެވެ. އެކަކު ބުންޏެވެ.
މިއަދު ބެއްޔާ ފެނުނުއިރު ހުރީ ނިކަން އުފަލުންނެވެ. ޝަކުވާއެއް ނުކުރެ އެވެ. ހުރީ ހިނިތުންވެފަ އެވެ މޫނުމަތިން އެހެންކަހަލަ އުފާވެރިކަމެއް ފެނުނެވެ.
ގަބޫލު ކުރަންވެސް އުނދަގުލެވެ. ގެއިން ނިކުންނައިރު ގޭގެ ދޮރުމަތީގައި ފަތެއް އޮތަސް އެކަމާ ޝަކުވާ ކުރާ މީހަކު މިއަދު އެއްވެސް ޝަކުވާއެއް ނުކުރީ ކީއްވެ ހެއްޔެވެ؟ މީހަކު ޖޯލީގައި އިށީންނަ ގޮތަކުންވެސް ބެއްޔާ ރުޅި އައިސްދާނެ އެވެ. ސުވާލެއް ކޮށްލާ ގޮތަކުން ހިތްހަމަ ނުޖެހިދާނެ އެވެ. އެކަމަކު މިއަދު ހުރީ ހިނިތުންވުމަކާއެކު އެވެ.
މާގިނަ އިރެއް ނުވެ ބެއްޔާ އަތުވެއްޖެ އެވެ. ކިހިނެއްތޯ ވީ އެންމެންވެސް ސުވާލު ކުރި އެވެ.
ބެއްޔާ ބުންޏެވެ.
މާ ބޮޑު ކަމެއް ނުވެ އެވެ. 80 އަހަރު ފާއިތުވެގެން މި ދިޔައީ އުފާވެރިކަން ހޯދުމަށެވެ. އެކަމަކު އެއީ ބޭނުމެއް ނެތް ބޭކާރު ކަމެކެވެ. އުފަލެއް ނުލިބުނެވެ. އެހެންވެ މިއަދު އަހަރެން ނިންމީ އެކަމާ ނޫޅޭށެވެ. އުފާވެރިކަން ހޯދުން ހުއްޓައިލާށެވެ. އަދި ހަމައެކަނި ދިރިއުޅޭށެވެ. އަހަރެންގެ އުފާވެރިކަމުގެ ސިއްރަކީ މިއީ އެވެ.
އާއެކެވެ. އުފާވެރިކަމަކީ، އެ ހޯދަން އުޅެގެން ނޫނީ ވަކި ކަމެއްގެ، ވަކި މީހެއްގެ ފަހަތުން ދުވެގެން ލިބޭނެ އެއްޗެއް ނޫނެވެ. އޭގެ ބަދަލުގައި ލިބިފައިވާ ދިރިއުޅުން ރަނގަޅު ގޮތުގައި ވޭތު ކުރާށެވެ. ލިބިފައިވާ މިންވަރަށް ޝުކުރު ކުރާށެވެ. ކޮންމެ ކަމެއްވެސް މެދުވެރިވާ ގޮތަކަށް އަދި ހާލަތަކަށް ބޯލަނބާށެވެ. ހޭނޭށެވެ. އަމިއްލަ ނަފުސަށް އިތުބާރު ކުރާށެވެ. އުފާވެރިކަން ލިބޭނީ އޭރުންނެވެ.
ނޯޓް: މިއީ މަޝްހޫރު އިނގިރޭސި ކުރު ވާހަކަ "އޭން އޯލްޑް މޭން ލިވްޑް އިން ދަ ވިލެޖް" ގެ ތަރުޖަމާއެކެވެ. ތަރުޖަމާގައި ކުދި ކުދި ބަދަލު ގެނެވިފައި ވާނެ އެވެ.
