ބޮލީވުޑް އެކްޓަރު އަޖޭ ދޭވްގަން އޭނާގެ ފުރަތަމަ ވެބް ސީރީޒް ކުޅެދޭ އަގަކީ އެޕިސޯޑަކަށް 2 ކްރޯރް ރުޕީޒް ކަމަށް މީޑިއާ ރިޕޯޓުތައް ބުނެފި އެވެ.
ސްޓާ ނެޓްވޯކް އާއިއެކު ހަދާފައިވާ ޑީލްއެއްގެ ދަށުން ޑިޒްނީ+ހޮޓްސްޓާ ގައި ސްޓްރީމް ކުރަން އުފައްދާ "ރޫދްރަ" އަކީ އިނގިރޭސިވިލާތުގެ މަޝްހޫރު ސީރީޒް "ލޫތާ" ގެ ރީމޭކް އެކެވެ. އަންނަ ޖުލައި މަހު ޝޫޓިން ފަށަން ހަމަޖެހިފައިވާ މި ސީރީޒްގެ މަސައްކަތް ދެ މަސްދުވަހުގެ ތެރޭގައި ނިންމައިލަން ވަނީ ތާވަލުކޮށްފަ އެވެ.
މި ސީރީޒް އަޖޭ ކުޅެދޭ އަގަކީ އެޕިސޯޑަކަށް 2 ކްރޯޑް ރުޕީޒްގެ މަގުންނެވެ. ޕްރޮމޯޝަންތަކާއިއެކު މުޅި ޖުމްލަ 125 ކްރޯރް ރުޕީޒް އަޖޭ ނަގާނެ އެވެ. މިއީ ޑިޖިޓަލް ޕްލެޓްފޯމުތަކުގެ އުފެއްދުމަކަށް މިހާ ބޮޑު އަގެއް ދީގެން ފަންނާނުން ލައްވައި ކުޅުއްވާ ފުރަތަމަ ފަހަރެވެ.
އިންޑިއާގެ އެކި ސްޓްރީމިންގް ޕްލެޓްފޯމުތަކުގެ އުފެއްދުންތަކުގައި މީގެ ކުރިން ފެނިގެން ގޮސްފައިވަނީ ސީ ލިސްޓުގެ ފަންނާނުންނެވެ. އެހެންނަމަވެސް ސްޓްރީމިން ޕްލެޓްފޯމުތަކަށް ވިއުވާޒް އިތުރު ކުރުމުގެ ގޮތުން އެތަންތަނުން ދަނީ ބޮލީވުޑްގެ އޭ ލިސްޓުގެ ތަރިން ލައްވައި ސީރީޒް އަދި ފިލްމުތައް ހަދަމުންނެވެ. މީގެ އިތުރުން ބޮޑެތި ފިލްމުތައް އެ ޕްލެޓްފޯމުތަކަށް ގަންނަމުން ދާކަންވެސް ފާހަގަކޮށްލެވެ އެވެ.
އަޖޭގެ އިތުރުން ރިތިކު ރޯޝަން އާއި އަކްޝޭ ކުމާރުވެސް ވަނީ ޑިޖިޓަލް ސީރީޒް އަކަށް އެއްބަސްވެފަ އެވެ. މައުލޫމާތު ލިބޭ ގޮތުގައި އޭ ލިސްޓުގެ މި ދެ ތަރިންނަށްވެސް އަޖޭ އާއި އެއްވަރުގެ އަގެއް ދޭނެ އެވެ.
އަޖޭގެ އެންމެ ފަހުން ރިލީޒްވި "ތަނާޖީ: ދަ އަންސަންގް ވޯރިއޯ" ގެ ކާމިޔާބީއަށްފަހު އޭނާއަކީ މިވަގުތު ބޮލީވުޑްގައި ހުރި އެންމެ އަގުބޮޑު އެއް ތަރި އެވެ. އޭނާގެ ކުރިއަށް އޮތް ފިލްމު "ބުޖް" ވެސް ރިލީޒްކުރަން ތައްޔާރު ވެފައިވާއިރު އެ ފިލްމު ރިލީޒް ކުރާނީ ޑިޖިޓަލްކޮށް ކަމަށް ވަނީ އިއުލާން ކޮށްފަ އެވެ.
އަޖޭގެ ފުރަތަމަ ވެބް ސީރީޒް "ރޫދްރަ" ޑައިރެކްޓު ކުރާނީ ރާޖޭޝް މަޕުސްކާރް އެވެ. މި އަހަރު ނިމުމުގެ ކުރިން އެ ވެބް ސީރީޒް ސްޓްރީމް ކުރަން ފަށާނެ އެވެ.
