ކޯޓުން އަހަރެން ނިކުތީ ކަރުނައިން ފުރިފައިވާ ލޮލަކާއިއެކު އެވެ. ކުރިއަށް ދާނީ ކިހިނެއް ކަމެއް ހުދު އަހަންނަށްވެސް ނޭނގެ އެވެ. އެހެންވެ މަގުމަތީގައި މަޑުޖެހިލެވުނީ ބޭއިހްތިޔާރުގަ އެވެ. ފަސް އެނބުރި ބަލައިލީމެވެ. އިސްޖަހައިގެން ހުރެ މާސިހު ކޯޓުން ނިކުމެގެން އާދެ އެވެ. މާސިހު ހިނގަމުން އައެވެ. އަހަރެންނާ ދިމާއަށެވެ. އެވަގުތު އަހަރެންނަށް އިހުސާސް ކުރެވުނެވެ. ހާދަ ލޯތްބެއް ވެއެވެ. އެކީގައި އުޅެން ހާދަ ބޭނުންވެ އެވެ. މާސިހު އައިސް އަހަރެންގެ ކުރިމަތީގައި ހުއްޓުނެވެ. އަދި އަހަރެންނާ ހަތަރުކަޅި ހަމަކުރި އެވެ. އެވަގުތުވެސް އިންތިޒާރު ކުރެވުނީ މާސިހުގެ ދުލުން އަހަރެންދެކެ ލޯބިވެޔޭ ބުނެލާނެ ކަމަށެވެ. އޯގާތެރި ބަސްތަކަކަށެވެ.
"ދެން މިކަންވެސް މިނިމުނީނުން. ގުޑް ލަކް ދެން. ގޭގަ ހުރި އެއްޗެހި ފޮނުވަދޭނަން. ޝަނާ ދެން އުފަލުގަ އުޅޭތި" މާސިހު ބުންޏެވެ. ހިނިތުންވުމަކާއެކު އެވެ. އަހަރެންގެ ލޮލުން ކަރުނަ ފޫއްދާލި އެވެ. މާސިހުގެ ހިތުގައި އަހަރެންނަށް ކުޑަވެސް ލޯތްބެއް ނެތީހެއްޔެވެ؟ މިދިޔަ ފަސް އަހަރު ދެމީހުން އެކުގައި ހޭދަކުރި ވަގުތުތަކުގެ އެއްވެސް މާނައެއް ނެތީ ހެއްޔެވެ؟ މާސިހު ހިނގައިގަތެވެ. ހުއްޓުވަން ވަރަށް ބޭނުންވި އެވެ. އެކަމަކު ހުއްޓުވުމުގެ ބޭނުމެއް އެބަ އޮތް ހެއްޔެވެ؟ ސައިކަލަށް އަރައިގެން މާސިހު ދަންދެން އަހަރެން ހުރީ ބަލަހައްޓައިގެންނެވެ. އޭރުވެސް ހިތާ ހިތުން އެދެވުނީ އިތުރު ފުރުސަތަކަށެވެ.
އިސްޖަހައިގެން ހުރެ، ކާރާ ދިމާއަށް އަހަރެން ހިނގައިގަތީމެވެ. އަދި ކާރަށް އަރައި އިށީންދެލީމެވެ. އަހަރެންގެ ބަޑި ފަޅައިގެން ދިޔައީ ދެނެވެ. އަޑުން އަޑު ނަގާފައި ރޯން ފެށީމެވެ. ހިތް ފުރެންދެން ރުއީމެވެ. ހޭވެރިކަން ވީ މަންމަ ގުޅަން ފެށުމުންނެވެ. ކަރުނަތައް ފޮހެލަމުން ފޯނަށް ޖަވާބު ދިނީމެވެ. އަހަރެންނާ މާސިހުގެ އެއްވެސް ވާހަކައެއް މަންމަ ނާހަ އެވެ. އިތުރަށް އަހަރެން ހިތުގައި ޖައްސަން ބޭނުން ނުވާތީ އެވެ. މަންމަ ގުޅީ ކާން އަންނަންތޯ އަހާށެވެ. ޖަވާބުގައި ނޫނެކޭ ބުނެ އަހަރެން ފޯނު ބޭއްވީ އިތުރަށް ވާހަކަ ދައްކަން ބޭނުން ނުވާތީއެއް ނޫނެވެ. އެކަމަކު މަންމަ އަހަރެންނަށްޓަކައި ދެރަވާނެވަރު އެނގޭތީ އެވެ.
*******
އަހަރެން މާސިހުއާއި ކައިވެނި ކުރީ މީގެ ފަސް އަހަރު ކުރިންނެވެ. އޭރު އަހަރެންގެ އުމުރުން 25 އަހަރެވެ. މާސިހުއަށް 30 އަހަރެވެ. އަހަރުމެން ކައިވެނި ކުރީ ލޯބީގެ ގޮތުން ގުޅިގެން އުޅޭތާ 7 އަހަރު ފަހުންނެވެ. ދެމީހުންވެސް އެކަކު އަނެކަކު ދެކެ ލޯބި ވެއެވެ. ދެފަރާތުގެ އާއިލާވެސް އެހާމެ ގުޅެ އެވެ. އަހަރެންނަކީ މާލޭގެ މަޝްހޫރު ވިޔަފާރިވެރިއެއްގެ ހުރި ހަމައެކަނި ދަރިފުޅެވެ. މާސިހުއަކީ އަތޮޅުތެރެއަށް ނިސްބަތްވާ އާއިލާއަކަށް އުފަން ކުއްޖެއް ނަމަވެސް މާސިހުވެސް އުޅެ ބޮޑުވީ މާލޭގަ އެވެ. މާސިހުގެ އާއިލާއަކީވެސް ފުދިގެން އުޅޭ އާއިލާ އެކެވެ. މާސިހުގެ ދޮއްޓަށް އެއްބަނޑު އެއްބަފާ ތިން ކުދިން ތިބެ އެވެ. އެމީހުންނާ އެއްވެސް އިރެއްގައި އަހަރެން މާ ގާތް ގުޅުމެއް ނުބާއްވަމެވެ.
ކައިވެނި ކޮށްގެން އަހަރުމެން ދެމީހުން އުޅެން ބޭނުންވީ ވަކިން އެޕާޓްމެންޓެއް ހިފައިގެންނެވެ. އެހެންވެ ބައްޕަ އަހަރެންނަށް ހުޅުމާލެއިން ލަގްޝަރީ އެޕާޓްމެންޓެއް ގަނެދިނެވެ. ދެމީހުން ކައިވެނި ކޮށްގެން ބަދަލުވީ އެތަނަށެވެ. އެޕާޓްމެންޓުގައި ތިން ކޮޓަރި ހުއްޓަސް ދެ ކޮޓަރި ހުންނަނީ ހުހަށެވެ. އެހެންވެ އަހަރެއްހާ ދުވަސް ފަހުން އެތަނުން އެއް ކޮޓަރިއަށް މާސިހުގެ ދޮއްޓަށް ހުންނަ ބޭބެ ކައިވެނިކޮށްގެން އޭނަގެ އަންހެނުންނާއެކު ބަދަލުވި އެވެ. އަހަރެންނަކަށް އެއީ މައްސަލައެއް ނޫނެވެ. މާސިހު އެކަމަށް އެހުމުން ވިސްނާވެސް ނުލައި އަހަރެން ރުހުނީމެވެ. އަހަރެން ދެކެނީ މާސިހުގެ އާއިލާއަކީ އަހަރެންގެވެސް އާއިލާ ކަމަށެވެ.
އެކަމަކު މައްސަލަ ޖެހެން ފެށީ އެހާހިސާބުންނެވެ. މާސިހުގެ ފަހަރިއަކީ ވަރަށް ވާހަކަ ގިނަ މީހެކެވެ. ފަހަރުގައި އޭނާގެ ނިޔަތަކީ އަހަރުމެން ދެމީހުން މައްސަލަ ޖެއްސުން ކަމަށް ނުވެދާނެ އެވެ. އެކަމަކު ފަހަރި ދެއްކި ވާހަކަތަކުގެ ސަބަބުން މާސިހު އަހަރެންނާމެދު ދެކެމުން އައި ގޮތަށް ބަދަލު އަންނަން ފެށި އެވެ. އެންމެ ފުރަތަމަ އެދުނީ އެޕާޓްމެންޓުގެ ރަޖިސްޓްރީން މާސިހުއަށްވެސް ބައި އެޅުމަށެވެ. އަހަރެން ދެކޭ ގޮތުގައި އެއީ މައްސަލައެއް ނޫނެވެ. އެކަމަކު މާސިހު އެކަމަށް އެދުނީ އަހަރެން މާ ރުހޭ ގޮތަކަށް ނޫނެވެ. އެހެންވެ އެއީ ބައްޕަ އަހަރެންނަށް ދިން އެޕާޓްމެންޓެއް ކަމަށާއި އެތަނުން އެހެން މީހަކަށް ބައި ނޭޅޭނެކަމަށް އަހަރެން ބުނީމެވެ. މާސިހުއަށް އަހަރެންގެ އެ ޖަވާބު މާ ކަމުދިޔަހެންނެއް ހިއެއް ނުވެ އެވެ. އެކަމަކު އެކަމާ މާސިހުވެސް އެއްބަސްވި އެވެ. އަހަރުމެން ދެމީހުންވެސް ވަޒީފާ އަދާކުރަމެވެ. ކޮންމެ މީހަކަށްވެސް 30،000 އަށްވުރެއް ބޮޑު މުސާރައެއް ލިބެ އެވެ. ދެމީހުން ބޭނުންވިނަމަ ބޭންކު ލޯނަށް ވަދެގެންވެސް އެޕާޓްމެންޓެއް ގަނެވުނީހެވެ. ދެމީހުންގެ ނަމުގަ އެވެ. އެކަމަކު އުޅޭނެ ތަނެއް ހުރުމުން އަހަރެން އެކަން ކުރަން ބޭނުން ނުވީ އެވެ.
މިމައްސަލަ ޖެހުނު ފަހުން އެޕާޓްމެންޓަކީ އަހަރެންގެ އެކަނި ތަނަކަށް ވެއްޖެ އެވެ. މާސިހުގެ ވާހަކަތަކުން އެތަނުގައި އޭނާ އުޅެނީ އަހަރެން ހުއްދަ ދީގެން ކަމަށް ވެއްޖެ އެވެ. މާސިހުގެ ބަސްތަކުން އަހަރެންނަށް އުނދަގޫ ވާން ފަށައިފި އެވެ. އެކަމަކު އެއްޗެކޭ ނުބުނެ ހުރެވޭތޯ ބެލީމެވެ. އެއީ އަހަރެންނަށް ހެދުނު ވަރަށް ބޮޑު ގޯހެކެވެ. ކަމެއް ގޯސްވާކަން އެނގިހުރެ އެވާހަކަ ނުދައްކައި ހުރުމުން ލާފައިވާ ރެނދު ދިޔައީ އިތުރަށް ބޮޑުވަމުންނެވެ. މާ ގިނަ ދުވަހެއް ނުވެ އެވެ. މާސިހު އެދުނީ އެހެން ތަނަކަށް ބަދަލުވާށެވެ. ކުއްޔަށް ތަނެއް ހިފައިގެންނެވެ. އަހަރެންގެ ބައްޕަ ދިން އެޕާޓްމެންޓެއް ވީމައި އެތަނުގައި އުޅެން ބޭނުން ނުވީކަން މާސިހުގެ ވާހަކައިން އަހަރެންނަށް އެނގުނެވެ. އެކަމަކު މާސިހު ބުނީ މާލެ ބަދަލުވާން ބޭނުންވާތީ އާ އެޕާޓްމެންޓެއް ނަގަނީ ކަމަށެވެ. ފަހަރިއާ މާސިހު އެވާހަކަ ދައްކާފައި އޮތްކަން އަހަރެންނަށް އެނގުނީ ދެ ކޮޓަރީގެ އެޕާޓްމެންޓެއް ނެގުމުންނެވެ. އަދި ދެވަނަ ކޮޓަރިއަށް ބޭބެއާ ފަހަރިވެސް ބަދަލުވާން އުޅޭތީ އެވެ.
އެކަމަކާ އަހަރެންނަކަށް ނުރުހެވުނެވެ. ކަންތައް ވަމުން ދިޔަ ގޮތުން އަހަރެންނާ މާސިހު މައްސަލަ ޖެހެނީ ފަހަރިއާ އެކު އުޅޭތީކަން އަހަރެންނަށް ވިސްނެން ފެށުމުންނެވެ. އެވާހަކަ މާ ތަފްސީލުކޮށް ދެއްކިފައި ނެތުމުން އަހަރެން ދެކެ މާސިހު ހިތްހަމަނުޖެހުނެވެ. އަދި އާއިލާއާއި ނުގުޅޭ މީހަކަށް އަހަރެން ވެއްޖެ އެވެ. މާސިހުގެ އާއިލާއާއި އޮތް ގުޅުން މުޅިންހެން ކެނޑުނީ ދެނެވެ. ކައިވެންޏަށް ދެ އަހަރު ވީއިރު އަހަރުމެން ދެމީހުން އެއްކޮށް އުޅުނަސް އެކީގައި ނުވާ ފަދަ އެވެ. އަންބަކާއި ފިރިއަކާއި ދެމެދު އޮންނަންޖެހޭ ގުޅުމެއް ނޯންނަތާވެސް ދުވަސްތަކެއް ވެއްޖެ އެވެ. އެ ވާހަކަތައް ދެންވެސް ނުދައްކައި ހުރުމުން ލިބުނު ގެއްލުން މާ ބޮޑެވެ. މާސިހު އަހަރެންނާ ހަތަރުކަޅި ހަމަކުރަނީވެސް މަދު ފަހަރަކު އެވެ. އަހަރެން ގިނަ ވަގުތު އޮފީހުގައި ހޭދަކުރަން ފެށީ ދެނެވެ. ހެނދުނު އަށެއް ޖަހާއިރު ދާގޮތަށް ގެއަށް އަންނަނީ ފަހެއް ޖަހައި ބޮޑުވާ ފަހުންނެވެ. މާސިހުވެސް ގެއަށް އަންނަނީ އިރު އޮއްސޭ ފަހުންނެވެ. އަނެއްކާ ރޭގަނޑު ރައްޓެހިންނާއެކު ބޭރަށް ދެއެވެ. އަހަރެން އޮންނަނީ ގޭގަ އެވެ. ދިހައެއް އެގާރަ ޖަހަންދެން ނެޓްފްލިކްސްގައި އޮންނަމެވެ. ދެތިން މަހެއް މިގޮތުގައި ދިޔައިރު އެއީ އާންމު ދިރިއުޅުމަށް ވެއްޖެ އެވެ. އަދި އެ ދިރިއުޅުމުގައި އެއްވެސް މައްސަލައެއް ނެތޭ ހީވެއްޖެ އެވެ.
އެ އަހަރު ދެމީހުންވެސް ޗުއްޓީ ނެގީ އެއްކޮށެވެ. މާސިހުގެ ބޭބެވެސް ޗުއްޓީ ނެގީ އެދުވަސްވަރު އެވެ. ފަހަރިއަކީ ވަޒީފާއަށް ދާ މީހެއް ނޫނެވެ. ހަތަރު މީހުން އެކީގައި ޗުއްޓީއަށް ތަނަކަށް ދާން ރޭވީ ފަހަރި އެވެ. އަހަރެންވެސް އެކަމަށް އެއްބަސްވީމެވެ. ދެ ހަފްތާއަށް ޖަރުމަނުގެ ބާލިންއަށް ދިޔައީމެވެ. އެ ޗުއްޓީ ވެގެން ދިޔައީ އަހަރެންނާ މާސިހުގެ ލޯބީގެ އާ ބާބެއް ފެށުނު ޗުއްޓީއަކަށެވެ. ދެމީހުންގެ ގުޅުން މަޑުމަޑުން ރަނގަޅުވި އެވެ. އެކަކު އަނެކަކަށް އޮތް ލޯބި އަލުން ހިއްސާ ކުރެވުނެވެ. އަނބުރާ މާލެ އައިއިރު ދެމީހުންގެވެސް ދިރިއުޅުން ބަދަލުވެއްޖެ އެވެ. ގިނަ ވަގުތު އެކީގައި ހޭދަކުރަން ފެށީމެވެ. ރޭގަނޑު ޑޭޓުތަކަށް ދާން ފެށީމެވެ. އެކުގައި ކައްކައި ހީ ސަކަރާތް ޖަހާ ހެދީމެވެ. މިގޮތަށް ތިން މަހެއްހާ ދުވަސް ވޭތުވީ އެވެ. އަހަރެން ބަނޑުބޮޑުކަން އެނގުނީ ދެނެވެ. މާސިހު ވަރަށް އުފާވި އެވެ. ކައިވެންޏަށް ތިން އަހަރުވިއިރު އަހަރެންވެސް ހުރި ދަރިއަކު ބޭނުންވެފަ އެވެ. އަހަރެން ބަނޑަށް ހަތަރުމަސް ވިއިރު ދެމީހުން އަނެއްކާވެސް ދިރިއުޅުން ޕްލޭން ކުރަން ފެށީމެވެ. ބޭބެއާ ފަހަރި އެހެން ތަނަކަށް ބަދަލުވާން އެދުނީ ހުދު މާސިހު އެވެ. ބޭބެވެސް އެކަމަށް ރުހުނެވެ. އަދި އެމީހުން ގެއިން ބަދަލުވި އެވެ.
އަހަރެން ދިޔައީ ބަރާބަރަށް ޑޮކްޓަރަށް ދައްކަމުންނެވެ. ހުރިހާ ކަމެއްވެސް ރަނގަޅެވެ. އެކަމަކު ފަސް މަސް ފުރި ހަ މަހަށް އެޅިއިރު އަހަރެންނަށް އުނދަގޫ ވާން ފަށައިފި އެވެ. އަހަރެންގެ ކޮމްޕްލިކޭޝަންސްތަކެއް ހުރިކަން އެނގުނީވެސް ދެނެވެ. ހޮސްޕިޓަލުގައި އެޑްމިޓުވާން ޖެހުނެވެ. ހަ މަސް ފުރުމުގެ ކުރިން އަހަރެން ވިހައިފި އެވެ. ދަރިފުޅު ސަލާމަތެއް ނުކުރެވުނެވެ. މާސިހުއަށް ނުއުފުލޭ ވަރުގެ ހިތާމައެއް ލިބުނު ފަދަ އެވެ. އަހަރެންނަށް ލިބުނު ހިތާމަ އެއަށްވުރެއް މާ ބޮޑެވެ. ޑޮކްޓަރު ވަރަށް ނަސޭހަތް ދިނެވެ. އަދިވެސް ދަރިއަކު ހޯދިދާނެ ކަމަށާއި ދެވަނަ ފަހަރު ކުރިއަށްވުރެއް ބޮޑަށް ސަމާލުވެވޭނެ ކަމަށް ޑޮކްޓަރު ބުންޏެވެ.
އަހަރެން ހޮސްޕިޓަލުން ގެއަށް ބަދަލުކުރި އެވެ. ލިބުނު ހިތާމައާއިއެކު ދެމީހުންގެ ދޫވެސް ބަންދުވި އެވެ. އަނެއްކާވެސް ގުޅުން މަޑުމަޑުން ހީނަރުވާން ފެށި އެވެ. މާސިހުވެސް ގިނަ ވަގުތު ބޭރުގައި ހޭދަކުރަން ފެށި އެވެ. މަސް ދުވަސް ވޭތުވެގެން ދިޔައީ އަހަރެން ގޭގައި އިނދެ އެކަމާ ހިތާމަ ކުރާށެވެ. ވަޒީފާއަށް އަލުން ނިކުތީ ދެނެވެ. އެއްވެސް ކަމެއް ކުރާ ހިތެއް ނުވެއެވެ. އެކަމަކުވެސް ކުރަން ޖެހުމުން ކުރަނީ އެވެ. ގިނަވަގުތު ހޭދަކުރަނީ އޮފީހުގަ އެވެ. ގެއަށް ގޮސްފިނަމަ މާސިހުގެ މޫނު ފެންނާނެކަން އެނގޭތީ އެވެ. އަދި މާސިހުގެ ހިތާމަ އޭނާގެ ލޮލުން ފެންނާނެކަން އެނގޭތީ އެވެ. ދެމީހުން ބޭނުންވިނަމަ ވާހަކަ ދައްކައިގެން އެކަން ހައްލު ކުރެވުނީހެވެ. ދެމީހުންގެ ހިތާމަ އެކަކު އަނެކަކާ ހިއްސާވެސް ކުރެވުނީހެވެ. ހިމޭނުން ތިބެން ބޭނުންވީ ކީއްވެކަމެއް ނޭނގެ އެވެ.
މާސިހުގެ ފަރާތުން ބަދަލުތަކެއް ފެންނަން ފެށީ އޭގެ ދެތިން މަހެއް ފަހުންނެވެ. ރޭގަނޑު މާ ލަސްވަންދެން ބޭރުގައި އުޅުމާއި ބައެއް ރޭރޭ ނިދަންވެސް ނާންނަކަން އަހަރެންނަށް ފާހަގަކުރެވުނެވެ. ގެއަށް އަންނަނީ ހެނދުނު 7 ވެސް ޖަހާ ފަހުންނެވެ. އަހަރެން ފެންވަރައިގެން ނިކުމެ އޮފީހަށް ދާން ތައްޔާރުވާން ހުއްޓާ ގެއަށް އައިސް ފެންވަރައިގެން މާސިހު އޮފީހަށް ދާ ދުވަސްތައް ގިނަ ވާން ފަށައިފި އެވެ. ކޮންތާކުތޯ އުޅެނީ ދެތިން ފަހަރަކު ސުވާލުވެސް ކުރީމެވެ. ކޮންމެވެސް ރައްޓެއްސެއްގެ ގޭގައޭ ބުނެ މާސިހު ދިޔައީ ފަރު ޖައްސަމުންނެވެ. އެކަމަކު މާސިހު ހަދަނީ ދޮގުކަން އަހަރެންނަށް އެނގެ އެވެ. ނިދަން އަންނަ ރޭރޭ އަބަދު ފޯނުގައި އޮންނަކަން އަހަރެންނަށް ފާހަގަ ކުރެވުނެވެ. ފޯނަށް އަބަދު މެސެޖު އަންނަކަންވެސް ފާހަގަ ކުރެވުނެވެ. އެކަމަކު ދުވަހަކުވެސް މެސެޖު ކުރަނީ ކާކުތޯއެއް ނާހަމެވެ. އަދި ފޯނު ބަލާކަށްވެސް ނޫޅެމެވެ. އެއީ ފަހަރުގައި އަހަރެންނަށް ހެދުނު ގޯހެއްކަމަށް ވެދާނެ އެވެ. އެކަމަކު އަހަރެން މާސިހުއަށް އިތުބާރު ކުރަމެވެ.
ކައިވެންޏަށް ހަތަރު އަހަރުވެގެން ދިޔައީ އެވެ. ދަރިއަކު ހޯދަން އަހަރެން ވަރަށް ބޭނުންވި އެވެ. އެކަމަކު މާސިހު އެކަމަށް މަސައްކަތެއް ނުކުރި އެވެ. މަސައްކަތް ކުރަންވެސް ބޭނުމެއް ނުވި އެވެ. އެހެންވެސް އަހަރެންވެސް އެކަމަކަށް ނޭދެމެވެ. ދެތިން މަސް ފާއިތުވެއްޖެ އެވެ. ފޯނަށް އަންނަ މެސެޖުތައް ހުއްޓިއްޖެ އެވެ. ރޭގަނޑު ބޭރުގައި އުޅުންވެސް ހުއްޓިއްޖެ އެވެ. އަހަރެންނަށް ހިތް ހަމަޖެހުމެއް ލިބުނެވެ. އެހެން ހުއްޓައި މާސިހު ވަޒީފާއިން ކަނޑާލައިފި އެވެ. ކީއްވެތޯ އަހަރެން ސުވާލު ކުރީމެވެ. ސްޓާފުން މަދުކުރީކަމަށް މާސިހު ބުންޏެވެ. އަހަރެންނަށް އެކަން ގަބޫލުކުރަން އުނދަގޫ ވިއެވެ. މާސިހު އަކީ އެ އޮފީހުގެ އެންމެ ސީނިއާ އެކަކެވެ. ސްޓާފުން މަދުކުރަން މީހުން ކަނޑާނަމަ އެންމެ ފަހުން ކަނޑާނެ މީހަކަށް މާސިހު ވާނެކަން އަހަރެންނަށް އެނގެ އެވެ. ވަޒީފާއިން ކަނޑައިލުމުން ގިނަ ވަގުތުތަކެއް މާސިހު ގޭގައި ހޭދަކުރަން ފެށި އެވެ. ނެޓްފްލިކްސްގަ އެވެ. ނޫނީ ނިދުމުގަ އެވެ. ބޭރަށް ދަނީ މަދު ފަހަރަކު އެވެ. ގޭގެ ހުރިހާ ހަރަދުތަކެއް ބަލަހައްޓަމުން ދިޔައީ އަހަރެންނެވެ. މާސިހުގެ އެއްވެސް ހަރަދެއް އަހަރެންނަކަށް ކުރާކަށް ނުޖެހުނެވެ. މާސިހުގެ ސޭވިންގްސްއިން މަޑުމަޑުން ނަގަމުން ދިޔަ އެވެ.
އޭގެ މަހެއްހާ ދުވަސް ފަހުން ކުއްލިއަކަށް އެއްދުވަހު މާސިހު އެދުނީ އެހެން އެޕާޓްމެންޓަކަށް ބަދަލުވާށެވެ. މާލެއަށް ބަދަލުވާށެވެ. މާސިހު ހުރީ ވަޒީފާއަކަށްވެސް ނުގޮހެވެ. އެހެންވެސް އަހަރެން އެކަމަށް އިންކާރު ކުރީމެވެ. އެކަމަކު ވަޒީފާއަށް ނުދިޔަސް މާސިހުގެ ސޭވިންގްސްއިން އަހަރެއްހާ ދުވަހު ކުލި ދެއްކޭނެ ކަމަށް ބުންޏެވެ. ފައިސާތަކެއް ބޭކާރު ގޮތުގައި ހަރަދު ކުރަނީ ކީއްވެތޯ އަހަރެން ސުވާލު ކުރީމެވެ. މާސިހު ގޮތް ދުލެއް ނުކުރި އެވެ. އަހަރެންނަށް ވިސްނުނު ގޮތުގައި އަހަރެންގެ އެޕާޓްމެންޓެއްގައި މާސިހު އުޅެން ޖެހި، ގޭގެ ހުރިހާ ހަރަދެއްވެސް އަހަރެން ބަލަހައްޓާތީ މާސިހުއަށް އުނދަގޫ ވީއެވެ. އެހެންވެ އިތުރަށް ދެބަސްވާން ނުހަދައި މާލެއަށް ބަދަލުވާން އަހަރެންވެސް އެއްބަސްވީމެވެ.
އަހަރުމެން ބަދަލުވީ އެއް ކޮޓަރީގެ އެޕާޓްމެންޓަކަށެވެ. 15،000 ރުފިޔާ މަހަކު ދައްކަން ޖެހޭއިރު އެތަނަކީ ވަރަށް ތަނަވަސް ތަނެކެވެ. ކުލި ދައްކަނީ މާސިހު އެވެ. ގޭގެ ހަރަދުތައް ހަމަޖައްސަނީ އަހަރެންނެވެ. މާސިހު ދިޔައީ އެހެން ވަޒީފާއެއް ހޯދަން ވަރަށް މަސައްކަތް ކުރަމުންނެވެ. އަހަރެންނަކީ އޮފީސް މީހުންނާއެކު ބޭރަށް ކާން ގޮސްއުޅޭ މީހެއް ނޫނެވެ. އެކަމަކު އަހަރެން ވަޒީފާގައި އުޅޭތާ ހަތް އަހަރު ވި ދުވަހު ޑިޕާޓްމެންޓުގައި އުޅޭ ހަތަރު ކުދިންނާއެކު މެންދުރުގެ ކެއުމަކަށް ދިޔައީމެވެ. ކާން ދިޔައީ މާލޭގެ މަޝްހޫރު ރެސްޓޯރެންޓަކަށެވެ. ކާއެއްޗެއްސަށް އޯޑަރު ދީގެން ތިއްބާ އެތަނަށް އައީ މާސިހު ކުރިން އުޅުނު އޮފީހުގެ ސްޓާފެކެވެ. ނަވީންއާ އަހަރެން ދިމާވީ ކައިވެނި ޕާޓީންނެވެ. އޭގެ ފަހުންވެސް ދެފަހަރަކު ދިމާވި އެވެ. އެހެންވެ ނަވީން ފެނުމުން އަހަރެން ސަލާން ކޮށްލައި ވާހަކަ ދައްކަން ފެށީމެވެ. މާސިހުގެ ވާހަކަ ނަވީން އެހި އެވެ. އަދި އެހެން ވަޒީފާއަކަށް ދޭތޯވެސް އެހި އެވެ. ނަވީންއަކީ މާސިހުއަށްވުރެއް ފަހުން އެ އޮފީހަށް ވަން މީހެކެވެ. ނަވީން އަދިވެސް އުޅެނީ އެ އޮފީހުގައިކަން އެނގުމުން އަހަރެންނަށް ކުރިން ކުރެވުނު ޝައްކު ޔަގީނަށް ވެއްޖެ އެވެ. އެކަމަކު އެވަގުތު އެވާހަކައެއް ނުދައްކަމެވެ.
އެދުވަހު އޮފީސް ނިންމާފައި ގެއަށް އައިސް އަހަރެން ނަވީންއާއި ވާހަކަ ދެއްކީ މެސެންޖާއިންނެވެ. އަދި ދިމާވާން ހިނގާށޭވެސް ބުނީމެވެ. އެ ރޭ ދެމީހުން ދިމާވާން ނިންމީމެވެ. މާސިހު އޮފީހުން ކެނޑުނު ސަބަބެއް އޮޅުން ފިލުވަން އަހަރެން ބޭނުންވާތީ އެވެ. އަހަރެންނަކީ މަސީހުގެ އަމިއްލަ ކަންކަމާއި އޮތަށް ބެހޭ މީހެއް ނޫނެވެ. އެކަމަކު 9 އަހަރު އުޅުނު އޮފީހުން މަސީހު ކުއްލިއަކަށް ވަކިވީ ކީއްވެތޯ އަހަރެން ބަލަން ބޭނުންވި އެވެ. އެނގޭ ކަމަކީ މާސިހުގެ އަނގައިން އެވާހަކަ އަހަރެންނަށް ކިޔާ ނުދޭނެ ކަމެވެ. ކިޔާދޭނެ ނަމަ އެންމެ ފުރަތަމަ ދުވަހު ދޮގެއް ނުހެދީހެވެ. މާސިހުއަށް އަންނަމުންދިޔަ މެސެޖުތައް މެދުކެނޑުމާއި އޮފީހުން ކެނޑުމާއި ކޮންމެވެސް ގުޅުމެއް އެބަ އޮތޭ އަހަރެންގެ ހިތް އޭރުވެސް ބުނަމުން ދިޔަ އެވެ. އެހެންވެ ހިތުގައި އުފެދުނު ނުތަނަވަސްކަން ފިލުވައިލަން އަހަރެން ބޭނުންވި އެވެ.
ނަވީންއާއި ދިމާވި އެވެ. ދުރު ދުރުން އޮފީހުން ސްޓާފުން މަދުކުރީތޯ އަހަރެން އޮޅުން ފިލުވީމެވެ. އެހެންނަމަވެސް އެކަހަލަ އެއްވެސް ކަމެއް ނުހިނގާކަން ނަވީންގެ ވާހަކައިން އެނގުނެވެ. މާސިހު ހެދީ ދޮގުކަން އަހަރެންނަށް ޔަގީން ވުމުން ވަރަށް ސީދާކޮށް ނަވީންއާ ސުވާލު ކުރީމެވެ. މާސިހު ވަޒީފާއިން ކެނޑުނީ ކީއްވެ ހެއްޔެވެ؟ ނަވީންއަށް ލިބުނީ ހައިރާން ކަމެކެވެ. އަހަރެންނަށް އެއްވެސް ކަމެއް ނޭނގޭކަން ނަވީންއަށް އެނގުނީ އެހިސާބުންނެވެ. ވާހަކައިން ރެކެން ނަވީން ވަރަށް މަސައްކަތް ކުރި އެވެ. އެކަމަކު ނަވީން ދިޔަ ނުދީ އަހަރެން ހިފެހެއްޓީމެވެ. އަދި ތަކުރާރުކޮށް ސުވާލު ކުރީމެވެ. އެންމެ ފަހުން ވީގޮތް ނަވީން ކިޔައިދިނެވެ.
އެރޭ އަހަރެން ގެއަށް ދިޔައީ ބަރު ހިތަކާއެކު އެވެ. ދެން ހަދާނީ ކިހިނެއްކަން ހުދު އަހަންނަށްވެސް ނޭނގޭ ހާލުގަ އެވެ. ގެއަށް ދިޔައިރު މާސިހު އޮތީ ކޮޓަރީގައި ނެޓްފްލިކްސް އިން ފިލްމެއް ބަލާށެވެ. ގެއަށް ގޮސް ހެދުން ބަދަލުކޮށްގެން އެނދަށް އެރީމެވެ. އަދި މާސިހުއަށް ބަލަން އޮވެވުނެވެ. އެވަގުތު އަހަރެންނަށް އިހުސާސް ކުރެވުނީ ރުޅިކަމެއް ނޫނީ ހިތާމައެއް ކަމެއް އަދިވެސް ބުނަން އުނދަގުލެވެ. އެކަމަކު މާސިހުއާ ވާހަކަ ދައްކަން އަހަރެން ބޭނުންވި އެވެ. ވޭތުވެދިޔަ ދެ އަހަރެއްހާ ދުވަހު ދެމީހުން ރަނގަޅަށް ވާހަކަ ނުދައްކާ ހުރެވުނުކަމުން ނިކުތް ނަތީޖާ މާ ފޮންޏެއް ނޫނެވެ.
"މާސިހު ޖޮބުން ކެނޑުނީ ކީއްވެ" އަހަރެން ސުވާލު ކުރީމެވެ. މާސިހު އަހަރެންގެ މޫނަށް ބަލައިލި އެވެ. އަދި އަހަރެންނަށް ކޮންމެވެސް ކަމެއް އެނގިއްޖެއޭ މާސިހުއަށްވެސް ހީވި އެވެ. އެހެންވެ ފިލްމު ސްޓޮޕްކޮށްލައި އަހަރެންނާ ވާހަކަ ދައްކަން ފެށި އެވެ. މާސިހުގެ ވާހަކަ ފެށީ ރުޅި އައިސް ހުރެ އެވެ. އަހަރެން ޖާސޫސު ކުރަނީއޭ ދޭހަވާފަދަ ގޮތަކަށް ވާހަކަ ފެށިނަމަވެސް މާ ގިނަ އިރެއް ނުވެ ރާގު ބަދަލުވާން ފެށި އެވެ. މާސިހު ރޯން ފެށި އެވެ. އަދި ކުރެވުނީ ކުށެއް ކަމަށް އިއުތިރާފުވި އެވެ. އަހަރެން އެދުނީ ހުރިހާ ވާހަކައެއް ތެދު ތެދަށް ކިޔައިދޭށެވެ.
އަހަރެން ހޮސްޕިޓަލުން ދޫކޮށްލިތާ މާ ގިނަ ދުވަހެއް ނުވެ މާސިހު އެހެން އަންހެނަކާ ވާހަކަ ދައްކަން ފެށި އެވެ. އޭނާއާއެކު ލޯބީގެ ސޮފްހާތައް ގުނަންފެށީ ދެމީހުން ގައިގޯޅިވާން ފެށިތާ ދުވަސްތަކެއް ފަހުންނެވެ. އިސާހިތަކު އެކަން އާދައަކަށް ބަދަލުވެ ދުރުވާން އުނދާގުވާ މިންވަރަށް ގުޅުން ވަރުގަދަވެއްޖެ އެވެ. ގެއަށް ނާންނަ ރޭތައް އޭނާ ކައިރީގައި ހޭދަކުރާ ކަމަށާއި ދެމީހުން ރޭ ހޭދަކުރަން ކުލީ ކޮޓަރިތައް ހިފައިގެން ދާކަމަށް މާސިހު އެއްބަސްވި އެވެ. އޭނާ ކައިވެންޏަށް އެދެން މާ ގިނަ ދުވަހެއް ނުނެގި އެވެ. އެހެންނަމަވެސް މިކަން އެހާ ފަސޭހައެއް ނުވި އެވެ. މާސިހު ލޯބީގެ ގުޅުން ބާއްވަމުން އައީ މާސިހުގެ ޑިޕާޓްމެންޓުގެ ވެރިމީހާގެ އަންހެނުންނާ އެވެ. އެ އަންހެން މީހާ ހުރީ ވަރިވެގެން މާސިހުއާ އިންނަން ތައްޔާރަށެވެ. އެކަމަކު މާސިހު އަހަރެން ވަރިކުރަން ބޭނުން ނުވީ އެވެ. މާސިހު ބުނާ ގޮތުންނަމަ އަހަރެން ދެކެ ވަރަށް ލޯބި ވެއެވެ. އަދި އެހެން އަންހެނަކާ ގުޅުން ބޭއްވުނީ އޮޅުމަކުން ކަމަށް ބުންޏެވެ. ވަޒީފާއިން ކެނޑުނީ އެކަން އޭނާގެ ފިރިމީހާއަށް އެނގި އޮފީހުގައި މައްސަލަ ޖެހެން ފެށުމުންނެވެ.
މާސިހުގެ ވާހަކަ ނިންމައިލުމުން އަހަރެންނަށް ބުނާނެ އެއްޗެއް ނޭނގުނެވެ. ހަދާނީ ކިހިނެއްކަމެއް ނޭނގުނެވެ. މުޅި ރޭ އިނދެވުނީ އެކަމާ ވިސްނާށެވެ. އަނެއް ދުވަހު އަހަރެން އޮފީހަކަށް ނުދަމެވެ. ސިކް ލީވްއެއް ނަގައި އެދުވަހު ގޭގައި މަޑު ކުރީމެވެ. އިރު އަރައިގެން ދިޔައިރުވެސް އަހަރެންގެ ލޮލަކަށް ނިންޖެއް ނައެވެ. މާސިހުވެސް އަހަރެންގެ ކައިރީގައި ހޭލާ އިނެވެ. މާގިނަ ވާހަކައެއް އަހަރުމެން ނުދައްކަމެވެ. ގަޑިން ހެނދުނު އަށެއް ޖަހައިފި އެވެ. އަހަރެން ވާހަކަ ދައްކަން ފެށީމެވެ. މާސިހު ކައިރީގައި އަހަރެން އެދުނީ ދުވަސްކޮޅަކަށް އަހަރެން ހުޅުމާލެއަށް ބަދަލުވުމުގެ ހުއްދަ ދޭށެވެ. އެކަނި ވަގުތުކޮޅެއް ހޭދަކޮށް ވިސްނާލަން ބޭނުންވާތީ އެވެ. އޭރުވެސް ދެމީހުން ދުރުވުމުގެ ވިސްނުމެއް އަހަރެންގެ ނެތެވެ. ވަރަށް ގިނަ އިރު އެކަމަށް މާސިހު ދެކޮޅު ހެދި އެވެ. އެކަމަކު އެންމެ ފަހުން މާސިހުއަށްވެސް ވިސްނުނީ އެންމެ ރަނގަޅު ގޮތަކީ އަހަރެން ބޭނުންވާ ގޮތަކަށް ކަން ކުރަން ދޫކޮށްލާށެވެ.
ފޮއްޓަށް އެއްޗެއްހި އަޅައިގެން އަހަރެން ހުޅުމާލެ ބަދަލުވީ އެދުވަހު ހަވީރު އެވެ. އަހަރެން ގެއަށް ލައިދިނީ މާސިހު އެވެ. މަޑުކުރަން އޭނާ އެދުނެވެ. އެކަމަކު އަހަރެން އެދުނީ އޭނާ ދާށެވެ. ކަން ހިނގައި ދިޔަ ގޮތާއިމެދު އަހަރެން ވަރަށް ވިސްނީމެވެ. އެހުރިހާ ކަމެއް ހިނގައި ގޮސް އަނެއް އަންހެން މީހާއާއި މާސިހު ގުޅުން ކަނޑައިލުމަށްފަހު މާލެއަށް ބަދަލުވާން އެދުނީ ކީއްވެކަން މާސިހުއަށް ބުނެއެއް ނުދެވުނެވެ. އަހަރެންނަށް ވިސްނުނު ގޮތުގައި މާސިހު އެގޮތަށް ނިންމީ ހުރިހާ ކަމެއް އެނގޭ ދުވަހު އަހަރެންގެ ފަރާތުން މާސިހު ފައިދާ ނެގީއޭ އަހަރެން ބުނެފާނެތީ އެވެ. އެކަހަލަ އެއްވެސް ނިޔަތެއް މާސިހުގެވެސް ނެތީމަ އެވެ. ހަގީގަތަށް ބުނާނަމަ މިވީ ފަސް އަހަރު ދުވަހުގެ ތެރޭގައި އަހަރެންގެ ތަނަވަސްކަމުގެ ފައިދާ ނަގަން މާސިހު ދުވަހަކުވެސް މަސައްކަތެއް ނުކުރެ އެވެ. އަހަރެންވެސް ކުރާ ހަރަދެއް ކުރަނީ އަމިއްލައަށް ބޭނުންވެގެންނެވެ.
އަދިވެސް ޖަވާބު ނުލިބޭ ވަރަށް ގިނަ ސުވާލުތައް އެބަ ހުއްޓެވެ. އަނެއް އަންހެން މީހާ ފަހުން ހެދީ ކިހިނެއްކަމެއް އަހަރެންނަކަށް ނޭނގެ އެވެ. މާސިހު އޮފީހުން ކެނޑުނުއިރު އެދެމީހުން ވަރިވިކަމެއް ނުވަތަ ނޫންކަމެއްވެސް އަހަރެންނަކަށް ނޭނގެ އެވެ. މިސުވާލުތަކުގެ ޖަވާބު އަހަރެންނަށް މުހިންމެއްވެސް ނޫނެވެ. ގާތްގަނޑަކަށް ހަފްތާއެއް ފަހުން އަހަރެން ނިންމީ މާސިހުއަށް މައާފު ކުރާށެވެ. އަދި އަނެއްކާވެސް ދެމީހުން އެކުގައި އުޅެން މަސައްކަތް ކުރާށެވެ. އެކަމަކު މާސިހު އަހަރެންގެ ފަރާތަކުން މައާފަކަށް ނޭދެ އެވެ. އެރޭ ހުރިހާ ވާހަކައެއް ކިޔައިދީ ނިންމައިލިއިރުވެސް މައާފަކަށް ނޭދެ އެވެ.
ކޮންމެއަކަސް ފުރިހަމަ ނުވެ އޮތް ވާހަކަ ފުރިހަމަ ކުރަން އަހަރެން މާސިހު ކައިރީ އެދުނީމެވެ. ދެމީހުން ބައްދަލުވެ ވާހަކަ ދައްކާށެވެ. ކުރިން ވީ ކަންކަމުގެ ވާހަކަ ދައްކާކަށެއް ނޫނެވެ. އެކަމަކު ދެމީހުން އެއްކޮށް އުޅެން ބޭނުންވާ ވާހަކަ ދައްކާށެވެ. އެރޭ އަހަރުމެން ބައްދަލުވީ ދެމީހުންނަށްވެސް އެންމެ ކަމުދާ ރެސްޓޯރެންޓުންނެވެ. އަހަރެން ދިޔައީ ވަރަށް ހެދިލައިގެންނެވެ. އަހަރުމެން ކައިވެނީގެ ކުރިން ޑޭޓަށް ދާއިރު ރީތިވާވަރަށް މޭކަޕްވެސް ކޮށްގެންނެވެ. ރެސްޓޯރެންޓަށް ގޮސް ކާއެއްޗެއްސަށް އޯޑަރު ކުރީމެވެ. މާސިހުގެ މޫނުމަތިން އުފާވެރިކަން ފެނުނެވެ. އަހަރެންވެސް އިނީ ވަރަށް އުފަލުންނެވެ. ކާއެއްޗެހި އައުމުގެ ކުރިން އަހަރެން ވާހަކަ ދައްކަން ފަށަން ބޭނުންވި އެވެ. އެކަމަކު ވާހަކަ ފެށީ މާސިހު އެވެ.
"އަހަރެން މިއުޅެނީ މައިޝާއާ މެރީ ކުރަން." މާސިހުގެ އެންމެ ޖުމްލައަކުން އަހަރެންގެ ހިތް ހުއްޓުނުފަދަ އެވެ. އަހަރެންނަށް ބުނާނެ އެއްޗެއް ނޭނގުނެވެ. މާސިހުގެ ވާހަކަ ކުރިއަށް ގެންދިޔަ އެވެ. އަހަރެން ކައިރިން ވަރިވާން ބޭނުންވާ ކަމަށާއި އަލުން އުޅެން ބޭނުންވިޔަސް ވެދިޔަ ކަންކަމާއެކު އަލުން ނޫޅެވޭނެކަމަށް މާސިހު ބުންޏެވެ. އެތައް ވާހަކައެއް ދައްކަން ނިންމައިލިއިރު އަހަރެންނަށް ހަމައެކަނި ބުނެވުނީ އެންމެ ރަނގަޅޭ އެވެ. ހަގީގަތުގައި އަހަންނަކަށް އެގޮތް އެންމެ ރަނގަޅެއް ނޫނެވެ. އަހަރެން މާސިހުއާއެކު އުޅެން ބޭނުމެވެ. ފަހަރުގައި މާސިހު އެބުނީ ތެދެއް ކަމަށްވެސް ވެދާނެ އެވެ. އަހަރެންގެ އިތުބާރު މާސިހުއަށް ގެއްލިއްޖެ އެވެ. އެހެންވެ ކުރިން އުޅުނު ގޮތަށް އަލުން އުޅެން އުނދަގޫ ވެދާނެ އެވެ. ފަހަރުގައި ވަރިވުމަކީ އެންމެ ރަނގަޅު ނިންމުމެވެ. އެކަމަކު އަލުން އުޅެވޭތޯ އެއްވެސް ފުރުސަތެއްވެސް ނުދީ ވަރިވާން ނިންމުމަކީ އެންމެ ރަނގަޅު ގޮތް ހެއްޔެވެ؟
*****
ކޮންމެއަކަސް އެރެއަށްފަހު އަހަރުމެން ދިމައެއް ނުވަމެވެ. އެރެއަށްފަހު އަހަރުމެން ވާހަކައެއް ނުދައްކަމެވެ. ކޯޓަށް ފޯމު ލީ މާސިހު އެވެ. ކޯޓުގައި އަހަރެންވެސް ދެކޮޅެއް ނުހަދަމެވެ. އެންމެ ޝަރީއަތަކުން ވަރީގެ ކަންތައްވެސް ނިމުނީ އެވެ. މާސިހުގެ ކައިވެނި އޮތީ އަންނަ މަހަށް ތާވަލުކޮށްފަ އެވެ. މައިޝާއަކީ އޭނާ ކުރިން ލޯބީގެ ގުޅުން ބޭއްވި މީހާ އެވެ. އޭނާގެ ފަސް އަހަރުގެ ކުއްޖަކުވެސް ހުރެ އެވެ. މާސިހުއަށް ލޯބި ފެނުނީ އާ ގޮތަކަށެވެ. އަހަރުމެން ދެމީހުން ލޯބީގެ ގޮތުން ގުޅިގެން އުޅެ ކައިވެންޏާއެކު 12 އަހަރު ފާއިތުވި އިރުވެސް އަހަރެންގެ ފަރާތުން މާސިހުއަށް ލޯތްބެއް ނުފެނުނެވެ. އެކަމަކު އަހަރެންނަށް މާސިހުގެ ފަރާތުން ލޯބި ނޫން އެއްޗެއްވެސް ނުފެނުނެވެ.
އަހަރެން ނިންމީ ދުވަސްކޮޅަކަށް ރާއްޖެއިން ބޭރަށް ބަދަލުވާށެވެ. ވަރަށް ހާލުން ބައްޕަގެ ރުހުން ހޯދައި އަހަރެން އިނގިރޭސިވިލާތުގެ ލަންޑަނަށް ބަދަލުވާން ހުރިހާ ކަމެއް ހަމަޖެހިއްޖެ އެވެ. އެއް އަހަރު ދުވަހަށް އަހަރެން ދިރިއުޅުން ބަދަލުކުރާތީ އޮފީހުން ދިނީ ނޯޕޭ ލީވް އެކެވެ. އަނބުރާ ރާއްޖެ އައިސް ވަޒީފާއަށް އަލުން ނިކުންނަންވީ އެވެ. އެކަމަކު އަނބުރާ ރާއްޖެ އަންނާނެ ކަމުގެ އެއްވެސް އުއްމީދެއް ނުވަތަ އެފަދަ ގަސްތެއްވެސް އަހަރެންގެ ނެތެވެ. މަންމައާ ބައްޕަ އަހަރެން ކައިރިއަށް ލަންޑަނަށް ބަދަލުވާން ބޭނުންނަމަ އެމީހުން ބަދަލުކުރާނީ އެވެ. އަލުން ދިރިއުޅުމެއް ފެށުމުގެ ވިސްނުމެއް އަދި ލޯބި ވުމުގެ ވިސްނުމެއްވެސް މިވަގުތަކު އަހަރެންގެ ނެތެވެ. ދިރިއުޅުމުގެ އެއް ބާބު ނިންމައި އަނެއް ބާބަށް އަހަރެން ފެށީ ދާނެ މަންޒިލެއް ނިންމައިގެންނެއް ނޫނެވެ. ތަގުދީރުގެ ނިޔާއަށް އިތުބާރުކޮށްގެން ހުރެ އެވެ.
- ނިމުނީ -
