ބޮލީވުޑް އަދި ހޮލީވުޑް ބަތަލާ ޕްރިޔަންކާ ޗޯޕްރާ ޖޯނަސް ހިމެނޭހެން 7 އަންހެނަކަށް ހާއްސަ އިންކްލޫސިވް ކަލެކްޝަންއެއް ހަދަން، މަޝްހޫރު ފެޝަން ބްރޭންޑް ވިކްޓޯރިއާޒް ސީކްރެޓް (ވީއެސް) އިން ތައްޔާރުވެއްޖެ އެވެ.
ވީއެސްއަކީ މީގެ ކުރިން ވަކި ވައްތަރަކަށް ހާއްސަކޮށް އެކްސްކްލޫސިވް ކަލެކްޝަންސް އުފައްދާ ބްރޭންޑެކެވެ. އެގޮތުން ހަށިގަނޑުގެ ބައްޓަން ވަކި ގޮތަކަށް ހުރުމާއިއެކު ވަރަށް ހިކި ކުދިންނަށް ވީއެސްގެ ކަލެޝަން ހާއްސަ ކުރެ އެވެ. މީގެ ސަބަބުން ވޭތުވެދިޔަ އަހަރުތަކުގައި އެ ބްރޭންޑަށް ފާޑުކިޔުންވެސް އަމާޒުވި އެވެ.
ވީއެސްއިން މިވަނީ މުޅިން އަލަށް އިންކްލޫސިވް ކަލެކްޝަންއެއް ހެދުމަށް މަސައްކަތް ފަށައިފަ އެވެ. އެގޮތުން ހުރިހާ ވައްތަރެއްގެ ހަށިގަނޑަކަށް ހެޔޮވަރު އުފެއްދުންތައް މި ކަލެކްޝަންގައި ނެރޭނެ އެވެ.
މަޝްހޫރު 7 މޫނެއް މި ކަލެކްޝަނަށް ވަނީ ހާއްސަ ކޮށްފަ އެވެ. ބަތަލާ ޕްރިޔަންކާ ހިމެނޭހެން މިކަލެއްޝަން ހާއްސަ ކުރަނީ ސޫދާނުގެ މޮޑެލް އެދުތް އެކެޗް، ފޮޓޯގްރަފާ އަމާންޑާ ޑީ ކޭޑެނެޓް، ޗައިނާގެ ފްރީސްޓައިލް ސްކިއަރ އެއިލީން ގޫ، އެމެރިކާގެ ސޮކާ ކުޅުންތެރިޔާ މޭގަން ރެޕިނޯ، އިނގިރޭސިވިލާތުގެ ޕްލަސް ސައިޒް މޮޑެލް ޕެލޯމާ އެލްސެސާގެ އިތުރުން ބްރެޒިލްގެ އެކްޓްރެސް ވެލެންޓީނާ ސެމްޕިއޯ އަށެވެ.
މިއީ ވީއެސްގެ ކަލެކްޝަންއެއް ޕްލަސް ސައިޒް މޮޑެލްއަކަށް ހާއްސަ ކުރާ ފުރަތަމަ ފަހަރެވެ.
ކަލެކްޝަންއާއި ގުޅޭގޮތުން ވާހަކަ ދައްކަމުން ޕްރިޔަންކާ ބުނީ ވީއެސްގެ ކަސްޓަމަރުންނަށް މިއީ ވަރަށް އުފާވެރި ހަބަރެއް ކަމަށެވެ. އަދި ހާއްސަކޮށް ހަށިގަނޑު ބޮޑުކޮށް ހުރުމުގެ ސަބަބުން ވީއެސްގެ އަންނައުނު ބޭނުން ނުކުރެވި ތިބި ފަރާތްތަކުގެ ދިގު އިންތިޒާރަށް މި ކަލެކްޝަނާއެކު ނިމުމެއް އަންނަނާނެ ކަމަށް ޕްރިޔަންކާ ބުންޏެވެ.
ވީއެސްގެ އޭންޖަލްސްގެ ގޮތުގައި މަޝްހޫރު އެ ބްރޭންޑުގެ މޮޑެލްސް އިން ތިބެން ޖެހެނީ ވަކި ސައިޒަކަށެވެ. ވަކި ވަރަކަށް ބަރުދަން އިތުރުވުމާއި ވަކި ވަރަކަށްވުރެއް ހަށިގަނޑު ބޮޑުވެއްޖެ ނަމަ ވީއެސްގެ މޮޑެލްއެއްގެ ގޮތުގައި ނުހުރެވެ އެވެ. މިކަލެކްޝަނާއިއެކު އެކަމަށްވެސް ނިމުމެއް އަންނާނެ ކަމަށް ބެލެވެ އެވެ.
އިންކްލޫސިވް ކަލެކްޝަން ނެރުނު ނަމަވެސް ކުރިންވެސް ވީއެސްއިން އުފައްދާ އެކްސްކްލޫސިވް ކަލެކްޝަންތައް ނެރޭނެ އެވެ.
