އަޔާން މުކަރްޖީ ޑައިރެކްޓު ކުރާ ދަރްމާ ޕްރޮޑަކްޝަންގެ ފިލްމު "ބްރައްމާސްތްރަ" ގެ ފަހު ޝޫޓިންއަށް ހަންގަރީގެ ވެރިރަށް ބުދާޕެސްތްއަށް ދާން ތާވަލުކޮށްފި އެވެ.
މިދިޔަ 2018 ވަނަ އަހަރު ޝޫޓިން ފަށައި ތިން އަހަރު ދުވަހަށް ދިގު ދެމިގެން ގޮސްފައިވާ މި ފިލްމުގެ ގާތްގަނޑަކަށް 85 އިންސައްތަ ޝޫޓިން މިހާރު ވަނީ ނިންމާލައިފަ އެވެ. މިދިޔަ އަހަރު ބޮޑު ބައެއް ޝޫޓުކޮށް ނިންމާލައި އިންޑިއާގައި ނަގާ ހުރިހާ މަންޒަރެއް ނަގަން ތާވަލުކޮށްފައި އޮއްވައި ފިލްމުގެ ލީޑްރޯލުން ފެންނަ ރަންބީރް ކަޕޫރާއި އާލިއާ ބަޓް ކޮވިޑް-19 އަށް ޕޮޒިޓިވްވެ ޝޫޓިން މެދުކަނޑައިލި އެވެ. އޭގެ ފަހުން މުމްބާއީގެ މަހަރާސްތްރަ ލޮކްޑައުން ކުރުމުގެ ސަބަބުން ޝޫޓިން ލަސްކުރަން ޖެހުނެވެ.
އަލުން ޝޫޓިންތައް ފެށީ މިމަހު 1 ގަ އެވެ. މިހާރު މަހަރާތްރަގައި ނަގަންޖެހޭ ބޮޑު ބައެއް ވަނީ ނިންމާލައިފަ އެވެ.
ރިޕޯޓުތައް ބުނާ ގޮތުން ފިލްމުގެ ޝޫޓު ނުކޮށް އޮތް މަންޒަރުތައް ނަގަން ޖެހެނީ ހަންގަރީގެ ބުދާޕެސްޓުގަ އެވެ. އެހެންނަމަވެސް ދަތުރު ކުރުމުގައި ހުރި ހުރަސްތަކުގެ ސަބަބުން ފިލްމުގެ ކްރޫ ޝޫޓިންއަށް ފުރާނީ ކޮވިޑް ދިފާއު ވެކްސިން ފުރިހަމަ ކޮށްގެންނެވެ.
ހަންގަރީއަށް ފުރަން ތާވަލުކޮށްފައިވަނީ އަންނަ އޯގަސްޓު މަހަށެވެ.
ރަންބީރާއި އާލިއާގެ އިތުރުން މި ފިލްމުގެ މުހިންމު ރޯލުތަކުން އަމީތާބް ބައްޗަން އާއި މޯނީ ރޯއީގެ އިތުރުން ނާގަރްޖުނާ ވެސް ފެނިގެން ދާނެ އެވެ.
"ބްރައްމާސްތްރަ" ރިލީޒް ކުރަން ފުރަތަމަ ނިންމީ މިދިޔަ 2020 ވަނަ އަހަރު އެވެ. އެހެންނަމަވެސް ކޮވިޑުގެ ސަބަބުން ޝޫޓިންތައް ލަސްވުމާއި ގުޅިގެން މި އަހަރަށް ރިލީޒްކުރުން ފަސްކުރި އެވެ. މިހާރު މަސައްކަތްތައް ދާ ދުވެއްޔަށް ބަލާނަމަ ފިލްމު ރިލީޒް ވާނެ ކަމަށް ބެލެވެނީ އަންނަ 2022 ވަނަ އަހަރު އެވެ.
ޓްރިލޮޖީއެއް ގޮތަށް ހަދާ މި ފިލްމުގެ އަދި ކުރިއަށް ދަނީ ފުރަރަމަ ފިލްމުގެ މަސައްކަތެވެ. "ބްރައްމާސްތްރަ" ވެގެންދާނީ ރަންބީރް އާއި އާލިއާ އެކީގައި ފެނިގެންދާ ފުރަތަމަ ފިލްމަށެވެ.
