ސައުތުގެ މަޝްހޫރު ޑައިރެކްޓަރު އަތުލީގެ ފިލްމަކުން އެކްޓަރު ޝާހުރުކް ހާން އާއި ސައުތުގެ ބަތަލާ ނަޔަންތަރާ ފެނިގެން ހިނގައިދާނެ ކަމަށް މީޑިއާ ރިޕޯޓުތައް ބުނެފި އެވެ.
އަތުލީގެ ފިލްމެއް ޝާހުއަށް ހުށަހަޅާފައިވާކަމުގެ އަޑުތައް މީގެ އަހަރެއްހާ ދުވަސް ކުރިން ފެތުރުނެވެ. ކޮވިޑުގެ ސަބަބުން ފިލްމުގެ މަސައްކަތްތައް މަޑުޖެހިފައި އޮތުމަށްފަހު ރިޕޯޓުތައް ބުނާ ގޮތުން އަތުލީ މިހާާރު ވަނީ ޕްރީ ޕްރޮޑަކްޝަން މަސައްކަތްތައް ފަށައިފަ އެވެ.
ސައުތު އިންޑިއާގެ ސުޕަ ހިޓް ފިލްމުތައް ކަމަށްވާ "ތެރީ"، "ބިގިލް" އަދި "މާސަލް" ފަދަ ފިލްމުތައް ޑައިރެކްޓު ކޮށްފައިވާ އަތުލީ ހިންދީ ފިލްމެއްގެ މަސައްކަތް ކުރަން ޝާހުއާއެކު ސޮއިކޮށްފައިވާއިރު އެފިލްމުގެ ބަތަލާގެ ރޯލު ހުށަހެޅީ ނަޔަންތަރާއަށް ކަމަށް ރިޕޯޓުތައް ބުނެ އެވެ. ނަޔަންތަރާ ފިލްމަށް ސޮއި ނުކުރި ނަމަވެސް އެފިލްމު ކުޅެން އޭނާ އެއްބަސްވެފައިވާ ކަމަށް ރިޕޯޓުތައް ބުނެ އެވެ.
ނަޔަންތަރާ މީގެ ކުރިން ވަނީ އަތުލީގެ "ބިގިލް" ގައި މަސައްކަތް ކޮށްފަ އެވެ. ލީޑް ރޯލުން ވިޖޭ ފެނިގެން ދިޔަ ތެލެގޫ ފިލްމަކީ ބޮކްސް އޮފީހުގައި ވަރަށް ކާމިޔާބު ފިލްމެކެވެ.
އަތުލީގެ ފިލްމުގެ ޝޫޓިންތައް ފަށާނެ ތާރީހެއް މުޅިން ކަށަވަރެއް ނުވެ އެވެ. ބެލެވޭ ގޮތުގައި ޝާހު މިހާރު ކުރަމުންދާ ޔަޝް ރާޖް ފިލްމްސްގެ "ޕަތާން" ގެ މަސައްކަތް ނިންމަައިލުމަށްފަހު އެފިލްމު ފަށާނެ އެވެ.
އަންނަ އަހަރުގެ އީދާއި ދިމާކޮށް ރިލީޒްކުރަން ތައްޔާރުވަމުންދާ "ޕަތާން" ގައި ޝާހުގެ އިތުރުން ފެންނާނީ ދިޕިކާ ޕަދުކޯން، ޖޯން އަބްރަހަމްގެ އިތުރުން ޑިމްޕަލް ކަޕާޑިއާ އެވެ.
ނަޔަންތަރާގެ ކުރިއަށް އޮތީ ރަޖްނިކާންތު އަދި ކީރްތީ ސުރޭޝް އާއިއެކު "އަންނާއްތޭ" ކިޔާ ތެލެގޫ ފިލްމެކެވެ.
