ބޮލީވުޑް ބަތަލާ ޔަމީ ގޯތަމްގެ މައްޗަށް ކުރެވޭ މަނީ ލޯންޑަރިންގެ ތުހުމަތުތަކާއި ގުޅިގެން ސުވާލު ކުރުމަށް އޭނާ ހާޒިރުކޮށްފި އެވެ.
ބޮލީވުޑް ހަންގާމާއިން ބުނީ ޔަމީއާއި ސުވާލު ކުރުމަށް އިންޑިއާގެ އިންފޮމޭޝަން ޑިރެކްޓޮރޭޓަށް ހާޒިރު ކުރި މިއަދުގެ ވަގުތެއްގަ އެވެ.
ޔަމީގެ މައްޗަށް ކުރަނީ 1.5 ކްރޯރް ރުޕީސް ލޯންޑަރ ކުރިކަމުގެ ތުހުމަތެވެ. އެގޮތުން އޭނާގެ އަމިއްލަ އެކައުންޓަށް ގޮތް ނޭނގޭ ފައިސާތަކެއް ޖަމާވެފައިވާތީ އެމައްސަލަ ވަނީ ބަލަން ފަށައިފަ އެވެ.
މިމަހުގެ 7 ވަނަ ދުވަހު ޔަމީ ތަހުގީގަށް ހާޒިރުވުމަށް އޭނާއަށް މީގެ ކުރިންވެސް ޗިޓު ފޮނުވި އެވެ. ބެލެވޭ ގޮތުގައު އެއީވެސް މަނީ ލޯންޑަރިންގެ ތަހުގީގެކެވެ.
ޔަމީގެ މަނީ ލޯންޑަރިން މައްސަލަ ފެންމަތިވީ އެކަމާއި ގުޅުންހުރި އެހެން އެކައުންޓުތަކެއް ބެލުމުން ތަހުގީގަށް ފާހަގަވި ކަންތައްތަކެއްގެ ތެރެއިންނެވެ. މީޑިއާ ރިޕޯޓުތައް ބުނާ ގޮތުން ޔަމީގެ އިތުރުން ބޮލީވުޑް ފިލްމުތައް އުފައްދާ ބައެއް ކުންފުނިތަކަށްވެސް މަނީ ލޯންޑަރިންގެ ތުހުމަތު ކުރެވެ އެވެ. އެހެންނަމަވެސް އެ ކުންފުނިތަކުގެ ތަފްސީލު މީޑިއާތަކަށް އަދި ތިލައެއް ނުވެ އެވެ.
ޔަމީ ދާދި ފަހުން ވަނީ ބޮލީވުޑް ފިލްމުތައް އުފައްދާ އަދިއްތިޔަ ދާރް އާއި ކައިވެނީގެ ގޮތުން ގުޅިފަ އެވެ. އޭނާ ކައިވެނި ކުރީ އިންޑިއާގަ އެވެ.
ޔަމީގެ ބައެއް މަޝްހޫރު ފިލްމުތަކުގެ ތެރޭގައި "ކާބިލް"، "އޫރީ: ދަ ސާޖިކަލް ސްޓްރައިކް"، "ބާލާ" ގެ އިތުރުން "ސަނަމް ރޭ" ހިމެނެ އެވެ. އޭނާ މިހާރު މަސައްކަތް ކުރަމުން ދަނީ ތްރިލާ ފިލްމު "އަ ތާޒްޑޭ" ގަ އެވެ.
