އާނަންދު އެލް ރާއީ ޕްރޮޑިއުސް ކުރާ "އަތުރަންގީ ރޭ" ގެ މަސައްކަތް ބަތަލާ ސާރާ އަލީ ހާން ނިންމާލައިފި އެވެ.
ސާރާގެ އިތުރުން އެ ފިލްމުގައި ފެންނާނީ ދަނުޝް އާއި އަކްޝޭ ކުމާރް އެވެ. މިއީ އާނަންދުގެ ކަލާ ޔެލޯ ޕްރޮޑަކްޝަން އާއިއެކު ސާރާ ކުރި ފުރަތަމަ މަސައްކަތެވެ.
އެފިލްމަށްފަހު ކަލާ ޔެލޯ ޕްރޮޑަކްޝަންގެ ކުރިއަށް އޮތް މަސައްކަތް ވެސް ވަނީ ސާރާއަށް ހުށަހަޅައިފަ އެވެ. "ނަކްރޭވާލީ" ނަމަކަށް ކިޔާ އެފިލްމުގެ މަސައްކަތް ފަށާނެ ސީދާ ތާރީހެއް އަދި އިއުލާނެއް ނުކުރެ އެވެ.
ސާރާ އާއިއެކު "ނަކްރޭވާލީ" ގައި ފެންނާނީ ވިކީ ކައުޝާލްގެ ކޮއްކޮ ސަނީ ކައުޝާލް ކަމަށް ރިޕޯޓުތައް ބުނެ އެވެ. އެހެންނަމަވެސް އެކަން ކަށަވަރެއް ނުވެ އެވެ. ފިލްމު ޑައިރެކްޓު ކުރާނީ ރާހުލް ޝަންކަލްޔާ އެވެ.
މިއަހަރުގެ ފަހުކޮޅު މަސައްކަތް ފަށާނެކަމަށް ބެލެވޭ "ނަކްރޭވާލީ" އަކީ އިޖުތިމާއީ މައްސަަލަތަކެއްގެ މައްޗަށް ތައްޔާރު ކުރާ ފިލްމެކެވެ.
ސާރާ ދެން އެންމެ އަވަހަށް މަސައްކަތް ފަށާނީ ވިކީ ކައުޝާލް އާއިއެކު އޭނާ ފެންނަ ފުރަތަމަ ފިލްމު "އަޝްވައްތަމާ" ގެ އެވެ.
