ބެލުންތެރިންގެ ބޮޑު މަގުބޫލުކަމެއް ހޯދި ތަމަޅަ ފިލްމު "ވިކްރަމް ވޭދާ" ގެ ހިންދީ ރީމޭކަށް ރިތިކު ރޯޝަން އާއި ސައިފް އަލީ ހާން ސޮއިކޮށްފި އެވެ.
"ވިކްރަމް ވޭދާ" ގެ ހިންދީ ރީމޭކެއް ހަދަން އުޅޭ ކަމާއި އެ ފިލްމު ރިތިކްއަށް ހުށަހަޅާފައިވާކަމަށް މި އަހަރުގެ ކުރީކޮޅު މީޑިއާތަކުން ރިޕޯޓު ކުރިއެވެ. އެެހެންނަމަވެސް އެފިލްމު ކުޅެން ރިތިކު އެއްބަސްވިކަމެއް އޭރު ކަށަވަރެއް ނުވެ އެވެ.
ބޮލީވުޑް ހަންގާމާއިން ރިޕޯޓު ކުރި ގޮތުގައި ރިތިކްއާއި ސައިފް މިހާރު ވަނީ ފިލްމަށް ސޮއިކޮށްފަ އެވެ. އަދި ފިލްމު ރިލީޒްކުރުން އަންނަ އަހަރުގެ ސެޕްޓެމްބަރު މަހުގެ 30 ވަނަ ދުވަހަށް ވަނީ ތާވަލުވެސް ކޮށްފަ އެވެ.
މީގެ ކުރިން ވާހަކަ ދެކެވުނު ގޮތުންނަމަ އެ ތާރީހުގައި ރިލީޒް ކުރާނީ ރިތިކް އާއި ދީޕިކާ ލީޑް ރޯލުން ފެންނަ "ފައިޓާ" އެވެ. އެ ފިލްމުގެ ޝޫޓިންތައް މިހާރު ފަށާފައިވާއިރު ބެލެވޭ ގޮތުގައި "ވިކްރަމް ވޭދާ" ރީމޭކްގެ ކުރިން އެ ފިލްމު ރިލީޒް ކުރާނެ އެވެ.
2017 ވަނަ އަހަރު ނިކުތް "ވިކްރަމް ވޭދާ" ގައި ލީޑް ރޯލުން ފެނިގެން ދިޔައީ އާރު މާދަވަންގެ އިތުރުން ވިޖޭ ސޭތުޕަތީ އެވެ. އެއީ ކްރައިމް ޑްރާމާ އެކެވެ.
ހިންދީ ރީމޭކްވެސް ޑައިރެކްޓު ކުރާނީ އޮރިޖިނަލް ފިލްމު ޑައިރެކްޓު ކުރި ގާޔަތުރީ އާއި ޕުޝްކަރް އެވެ.
