ސަލްމާން ހާން ލީޑް ރޯލުން ފެނިގެންދާ މަޝްހޫރު ބޮލީވުޑް ފްރެންޗައިޒް "ޓައިގާ" ގެ ތިންވަނަ ސީކުއެންސްގެ ޝޫޓިން އަންނަ މަހު 12 ގައި ފަށަން ތާވަލުކޮށްފި އެވެ.
ބޮލީވުޑް ހަންގާމާއިން ރިޕޯޓު ކުރި ގޮތުގައި ޝޫޓިން މެދުކެނޑުމެއްނެތި 50 ދުވަހަކަށް ކުރިއަށް ދާނެ އެވެ. އަދި ޖުމްލަ 5 ގައުމަކަށް ދަތުރު ކުރާނެ އެެ. އެގޮތުން އޮސްޓްރިއާ، މޮރޮކޯ، ތުރުކީ، ރަޝިޔާގެ އިތުރުން ޔޫއޭއީ އަށްވެސް ދަތުރު ކުރާނެ އެވެ.
ކޮވިޑް-19 ގެ ސަބަބުން ޝޫޓިން ލޮކޭޝަންތަކަށް ކޮންމެވެސް ވަރެއްގެ ބަދަލުތަކެއް ގެނަ އެވެ. އެގޮތުން ކުރިން ހަމަޖައްސާފައި އޮތީ އަޔަރލޭންޑް، ގްރީސް، ސްޕެއިންގެ އިތުރުން ފްރާންސަށް ދަތުރު ކުރާށެވެ. އެހެންނަމަވެސް މި ތަންތަނުގައި ކޮވިޑު ފިޔަވަޅުތައް އަޅާފައި އޮތުމުން ޝޫޓިންއަށް ދަތިވެދާނެތީ ފަހުން ވަނީ ލޮކޭޝަންތައް ބަދަލުކޮށްފަ އެވެ.
ރިޕޯޓުތައް ބުނާ ގޮތުން އޮގަސްޓު 12 ގައި ޝޫޓިންއަށް ދާނީ ސަލްމާން އާއި ކްރޫގެ އެހެން މެމްބަރުންނެވެ. ފިލްމުގައި ނެގެޓިވް ރޯލު ކުޅޭ އިމްރާން ހާޝްމީ އާއި ބަތަލާ ކްރޫއާއި ގުޅޭނީ އޮގަސްޓު މަހުގެ ފަހުކޮޅު ކަމަށްވެސް ރިޕޯޓުތައް ބުންޏެވެ.
"ޓައިގާ 3" އަށް ވަނީ 300 ކްރޯރް ރުޕީޒްގެ ބޮޑު ބަޖެޓެއް ކަނޑައަޅައިފަ އެވެ. ޔަޝް ރާޖް ފިލްމްސް އިން އުފައްދާ މި ފިލްމަކީ ސިނަމާގައި އަޅުވާނެ އެންމެ ވަރުގަދަ އެކްޝަން ފިލްމަށް ހަދަން ޓީމުން ބޭނުންވެ އެވެ.
