ސަންޖޭ ލީލާ ބަންސާލީގެ ކުރިއަށް އޮތް ފިލްމު "ގަންގޫބާއީ ކަތިއަވަޑީ" އޯޓީޓީ ޕްލެޓްފޯމެއްގައި ޑިޖިޓަލްކޮށް ރިލީޒް ނުކުރަން ނިންމައިފި އެވެ.
މި ފިލްމުގެ ޓީޒާއެއް ވަނީ ރިލީޒްކޮށްފަ އެވެ. މިއަހަރުގެ ކުރީކޮޅު ރިލީޒްކުރި އެ ޓީޒާއާއިއެކު ބަންސާލީ ވަނީ މިމަހު 31 ވަނަ ދުވަހު ފިލްމު ރިލީޒް ކުރަން ނިންމައިފަ އެވެ. ތާރީހު އިއުލާންވެސް ކުރި އެވެ.
ތާރީހު އިއުލާން ކުރިއިރު އެހާތަނަށް އިންޑިއާ ސިނަމާތައް ހުޅުވާނެ ކަމަށް އޮތީ ބެލެވިފަ އެވެ. އެހެންނަމަވެސް ކޮވިޑުގެ ހާލަތު ގޯސްވުމުން ސިނަމާތައް ހުޅުވަން އިތުރު ދުވަސް ނަގާނެކަމަށް މިހާރު ލަފާ ކުރެވެ އެވެ.
ބޮލީވުޑްގެ ގިނަ ފިލްމުތަކެއް ދަނީ އޯޓީޓީ ޕްލެޓްފޯމުތަކުގައި މިހާރު ރިލީޒް ކުރަމުންނެވެ. އެގޮތުން 2019 ވަނަ އަހަރުގެ ފަހުން ނިންމާފައި ހުރި ފިލްމުތައް ނެޓްފްލިކްސް، ޑިޒްނީ ޕްލަސް ހޮޓްސްޓާ އަދި އެމަޒޯން ޕްރައިމް ގައި ދަނީ ރިލީޒް ކުރަމުންނެވެ.
އެހެންނަމަވެސް ބަންސާލީގެ ވިސްނުން ތަފާތެވެ. އޭނާ ބުނާ ގޮތުގައި ބޮޑު ހަރަދު ކޮށްގެން ކުރާ ވަރުގަދަ މަސައްކަތެއް ރިލީޒް ކުރަންޖެހޭނީ ސިނަމާގަ އެވެ. ހާއްސަކޮށް "ގަންގޫބާއީ ކަތިއަވަޑީ" އަކީ ސީދާ ބޮޑު ސްކްރީނަށް ހެދި ފިލްމެއް ކަމުން ސިނަމާތައް ހުޅުވަންދެން އޭނާ މަޑުކުރާނެ ކަމަށް ވަނީ ބުނެފަ އެވެ.
އާލިއާ ބަޓް ލީޑް ރޯލުން ފެންނަ މި ފިލްމަކީ އިންޑިއާގެ އަންހެން ގޭންގްސްޓާ ލީޑަރެއްގެ ވާހަކަ ކިޔައިދޭ ފިލްމެކެވެ. މިއީ ހަގީގީ ހާދިސާއެއްގެ މައްޗަށް އުފައްދާފައިވާ ފިލްމެކެވެ. ފިލްމުގެ ޝޫޓިން މުޅިން ނިންމާލާފައިވާއިރު މިހާރު ޕޯސްޓް ޕްރޮޑަކްޝަން މަސައްކަތްތައްވެސް އޮތީ ފަހު މަރުހަލާގަ އެވެ.
