ބޮލީވުޑް ބަތަލާ ކަންގަނާ ރަނައުތު ފުރަތަމަ ފަހަރަށް ޑިޖިޓަލް ފިލްމެއް އުފެއްދުމުގެ މަސައްކަތް ފަށައިފި އެވެ.
"ޓީކު ވެޑްސް ޝޭރު" ގެ ނަމުގައި އުފައްދާ މި ފިލްމަކީ ލޯބީގެ އަދި ސިޔާސީ ކަންތައްތަކެއް ދައްކައިދޭ ފިލްމެކެވެ. މިފިލްމުގެ މެއިން އެއް ކާސްޓެއްގެ ގޮތުގައި ނަވާޒުއްދީން ސިއްދީކީ ފެނިގެން ދާނެކަމަށް ރިޕޯޓުތައް ބުނެ އެވެ.
ކަންގަނާގެ ޕްރޮޑަކްޝަން ހައުސް، މަނިކަރްނިކާ ފިލްމްސްއިން މިއަދު ވަނީ ނަވާޒުއްދީން އެ ފިލްމުގެ ޓީމާއި ގުޅުނުކަށް ސޯޝަލް މީޑިއާ މެދުވެރިކޮށް ކަށަވަރުވެސް ކޮށްދީފަ އެވެ.
ނަވާޒުއްދީން އަކީ ބޮލީވުޑްގައި މިވަގުތު ހުރި އެންމެ ހުނަރުވެރި އެއް ފަންނާނެވެ. އޭނާގެ ފިލްމުތަކަކީ ކްރިޓީކްސްގެ ގޮތުން ބޮޑު މަގްބޫލުކަމެއް ލިބިގެންދާ ފިލްމުތަކެކެވެ.
"ޓީކޫ ވެޑްސް ޝޭރޫ" ގެ އިތުރުން ނޭހާ ޝަރްމާ އާއިއެކު "ޖޯގިރާ ސާރާ ރާ ރާ" އިންވެސް ނަވާޒުއްދީން ފެނިގެން ދާނެ އެވެ.
ކަންގަނާވެސް މިވަގުތު ދަނީ ބައެއް ފިލްމުތަކެއްގެ މަސައްކަތް ކުރަމުންނެވެ. އެގޮތުން "ދާކަޑް"، "ތަލައިވީ"، "ތޭޖާސް"، "އެމަޖެންސީ" ގެ އިތުރުން "މަނިކަރްނިކާ ރިޓާންސް: ދަ ލެޖެންޑް އޮފް ދިއްދާ" ގެ މަސައްކަތް ފާހަގަކޮށްލެވެ އެވެ.
