މުމްބާއީގެ ފިލްމް ސިޓީ ސްޓޫޑިއޯގައި ޝޫޓު ކުރަމުން ދިޔަ "އިންސްޕެކްޓާ އަވިނާޝް" ގެ ސެޓުގައި އަލިފާން ރޯވެއްޖެ އެވެ.
އިއްޔެ ހިނގާދިޔަ މިހާދިސާގައި އެއްވެސް މީހަކަށް ގެއްލުން ލިބުނުކަން މިހާތަނަށް ކަށަވަރު ވެފައެއް ނުވެ އެވެ. ހާދިސާ ހިނގައިދިޔައީ ޝޫޓު ކުރަމުން ދަނިކޮށް ބޯކޮށް ވާރޭ ވެހުމުގެ ސަބަބުން ޝޯޓް ސާކަޓެއް ވެގެންނެވެ.
"އިންސްޕެކްޓާ އަވިނާޝް" އަކީ ކްރައިމް ތްރިލާ ވެބް ސީރީޒް އެކެވެ. މި ސީރީޒްގައި ލީޑް ރޯލު އަދާކުރާނީ އުރުވަޝީ ރައުޓޭލާގެ އިތުރުން ރަންދީޕް ހޫޑާ އެވެ. އިއްޔެ އަލިފާނުގެ ހާދިސާ ހިނގިއިރު ދެތަރިންވެސް ސެޓުގައި ތިބިކަމަށް މައުލޫމާތު ލިބެ އެވެ.
ނީރަޖް ޕާތަކް ޑައިރެކްޓު ކުރާ މި ވެބް ސީރީޒްގެ ދެ ތާވަލެއް މިހާރު ވަނީ ނިންމާލައިފަ އެވެ. ޝޫޓު ކުރަމުން ދަނީ ތިންވަނަ ތާވަލެވެ.
މިއީ އުރްވަޝީ އަދި ރަންދީޕް އެކީގައި ފެންނަ ފުރަތަމަ ޕްރޮޖެކްޓެވެ. "އިންސްޕެކްޓާ އަވިނާޝް" ސްޓްރީމް ކުރާނީ ކޮން ޕްލެޓްފޯމެއްގައި ކަމެއް އަދި ހާމައެއް ނުކުރެ އެވެ.
މި ވެބް ސީރީޒްގެ އިތުރުން އުރްވަޝީގެ ކުރިއަށް ހުރި މަސައްކަތްތަކުގެ ތެރޭގައި "ބްލެކް ރޯޒް"، "ތިރުޓު ޕަޔާލޭ 2" ހިމެނެ އެވެ. މީގެ އިތުރުން ރަންދީޕްގެ ކުރިއަށް ހުރި މަސައްކަތްތަކުގެ ތެރޭގައި "އަންފެއާ އެންޑް ލަވްލީ" ގެ އިތުރުން "ރެއިޓް އޮން އަ ހައިވޭ" ހިމެނެ އެވެ. ރަންދީޕްގެ ފިލްމެއް މިއަހަރުވެސް ރިލީޒްވި އެވެ. އެއީ އޭނާ ނެގެޓިވް ރޯލުން ފެނުނު ފިިލްމު "ރާދޭ" އެވެ.
