ބޮލީވުޑް އެކްޓަރު ރަންބީރު ކަޕޫރު ލީޑް ރޯލު ކުޅެން ހަަމަޖެހިފައިވާ "ބައިޖޫ ބާވްރާ" އޭނާ ދޫކޮށްލަފާނެ ކަމަށް މީޑިއާތަކުން ރިޕޯޓުކޮށްފި އެވެ.
ސަންޖޭ ލީލާ ބަންސާލީ ޑައިރެކްޓުކޮށް އުފައްދާ "ބައިޖޫ ބާވްރާ" އަކީ މިހާރު މަސައްކަތްތައް މުޅިންހެން ނިންމައި ރިލިޒް ކުރަން ތައްޔާރުވެފައިވާ "ގަންގޫބާއީ ކަތިއަވަޑީ" އަށްފަހު އޭނާ މަސައްކަތް ކުރާނެ ބޮޑު ޕްރޮޖެކްޓެވެ. އެފިލްމަކީ ކުރީގެ ހިންދީ ކްލަސިކެއްގެ ރީމޭކް އެކެވެ.
ކުރިން މީޑިއާތަކުން ރިޕޯޓު ކުރި ގޮތުގަިއ "ބައިޖޫ ބާވްރާ" ގެ މުހިންމު ރޯލުތައް ހުށަހަޅާފައިވަނީ ރަންބީރުގެ އިތުރުން ދިޕިކާ ޕަޑުކޯން، އާލިއާ ބަޓްއަށާއި އަޖޭ ދޭވްގަންއަށެވެ. މިއިން އެއްވެސް ތަރިއަކާއިއެކު ރަސްމީކޮށް ސޮއިކޮށްފައެއް ނުވެ އެވެ. އެހެންނަމަވެސް ރަންބީރު ފިޔަވައި އަނެއް ތިން ތަރިންވެސް ފިލްމު ކުޅެން އަނގަބަހުން އެއްބަސްވެފައިވާކަމަށް ރިޕޯޓުތައް ބުނެ އެވެ.
ބަންސާލީއަކީ ރަންބީރު ބޮލީވުޑަށް ލޯންޗުކޮށްދިން ޑައިރެކްޓަރެވެ. ރަންބީރުގެ ފުރަތަމަ ފިލްމު "ސާވަރިޔާ" އަކީ އޭނާގެ ކެރިއަރުގައިވެސް ކުޅުނު އެންމެ ބޮޑު ބޮކްސް އޮފީސް ފްލޮޕެވެ. އެހެންނަމަވެސް ކްރިޓީކްސްގެ ގޮތުން ފިލްމަށް ރަނގަޅު ފީޑްބެކެއް ލިބުނެވެ. ރަންބީރާއިއެކު އެފިލްމުން އަލަށް ތައާރަފުވީ ސޯނަމް ކަޕޫރެވެ.
ރިޕޯޓުތައް ބުނާގޮތުން "ބައިޖޫ ބާވްރާ" ކުޅުމާއިމެދު ރަންބީރުގެ ހިޔާލު ތަފާތުވެފައިވާކަން ބަންސާލީއަށްވެސް މިހާރު ވަނީ އަންގައިފަ އެވެ. އެފިލްމު ޝޫޓުކުރަން ބުނެފައިވާ ދުވަސްވަރު ރަންބީރަށް ވަނީ ކަރަން ޖޯހަރުގެ ފިލްމެއްވެސް ލިބިފަ އެވެ. ރަންބީރު ބޭނުންވަނީ ކަރަންގެ ފިލްމު ނަގާށެވެ.
މައުލޫމާތު ލިބޭ ގޮތުގައި "ސާވަރިޔާ" އަށް ފަހު ރަންބީރު ބަންސާލީއާއި އެކީގައި މަސައްކަތް ކުރާކަށް ބޭނުމެއް ނުވެ އެވެ. މީގެ ކުރިންވެސް ބަންސާލީ ރަންބީރަށް ފިލްމެއް ހުށަހެޅުމުން އޭނާ އެފިލްމު ނަގަން ބޭނުމެއް ނުވި އެވެ.
ރިޕޯޓުތައް މީގެ ކުރިން ބުނީ ރަންބީރު "ބައިޖޫ ބާވްރާ" ގައި ކުޅެން ހަމަޖެހިފައިވާ ރޯލު އެކްޓަރު ކާރްތިކް އާރްޔާންއަށް ހުށަހަޅާފައިވާ ކަމަށެވެ. އެހެންނަމަވެސް ފަހުގެ ރިޕޯޓުތައް ބުނާ ގޮތުން ކާރްތިކްއަށް އެ ރޯލު ހުށަހެޅުމުގެ ފުރުސަތު ކުޑަ އެވެ. މީގެ ކުރިން ކާރްތިކް އާއި ސާރާ އަލީ ހާން ބަންސާލީގެ ފިލްމަކުން ފެންނާނެކަމަށްވެސް ރިޕޯޓު ކުރި އެވެ. އެހެންނަމަވެސް ކާރްތިކްއަށާއި ސާރާއަށްވެސް އަދި ބަންސާލީގެ ފިލްމެއް ހުށަހަޅާފައި ނުވާކަން ބޮލީވުޑް ހަންގާމާއިން ވަނީ ކަށަވަރުކޮށްދީފަ އެވެ.
ބަންސާލީގެ ދެން އެންމެ އަވަހަށް ރިލީޒް ވާނީ އާލިއާ ލީޑް ރޯލުން ފެންނަ "ގަންގޫބާއީ ކަތިއަވަޑީ" އެވެ. އޭގެ ފަހުން އޭނާގެ ފުރަތަމަ ވެބް ސީރީޒްގެ މަސައްކަތް ފަށާނެ އެވެ. "ބައިޖޫ ބާވްރާ" ގެ މަސައްކަތް ފަށާނީ ސީރީޒްއަށް ފަހު އެވެ.
އަނެއްކޮޅުން ރަންބީރުގެ ބޮޑު ތިން މަސައްކަތެއް ކުރިއަށް އެބަ އޮތެވެ. އެއީ ދަރްމާގެ "ބްރައްމާސްތްރަ" އާއި "ޝަމްޝޭރާ" ގެ އިތުރުން ލަވް ރާންޖަންގެ ކުރިއަށް އޮތް ފިލްމެވެ.
