މަޝްހޫރު ޕްރޮޑިއުސަރު އަދި ޑައިރެކްޓަރު ސަންޖޭ ލީލާ ބަންސާލީ އުފައްދައި ޑައިރެކްޓު ކުރަން ތައްޔާރުވަމުންދާ ފިލްމު "ބައިޖޫ ބާވްރާ" ގެ ލީޑް ރޯލު ރަންވީރް ސިންގް އަށް ހުށަހަޅައިފި އެވެ.
"ބައިޖޫ ބާވްރާ" ގެ ލީޑް ރޯލު އެންމެ ފުރަތަމަ ހުށަހެޅީ ރަންބީރް ކަޕޫރަށެވެ. އެހެންނަމަވެސް އޭނާ އެފިލްމު ކުޅުމާއިމެދު ދެ ހިޔާލެއްގައި ހުއްޓައި ބަންސާލީ ވަނީ އެރޯލު އޭނާ އަތުން ނަގަން ނިންމައިފަ އެވެ.
ފަހުން ރިޕޯޓުތައް ބުނި ގޮތުގައި "ބައިޖޫ ބާވްރާ" އެކްޓަރު ކާރްތިކް އާރްޔާންއަށްވެސް ހުށަހެޅި އެވެ. އެގޮތުން ބަންސާލީގެ ގޭގައި ކާރްތިކް އާއިއެކު ބަންދަލުވުންތަކެއްވެސް ބޭއްވިކަމަށް ވާހަކަ ދެކެވުނެވެ. އެހެންނަމަވެސް އެ ރިޕޯޓުތައް ދޮގުކޮށް ކާރްތިކްއާއެކު ބޭއްވި ބައްދަލުވުންތަކާއި އެއްވެސް ފިލްމެއްގެ ކާސްޓިންއާއި ގުޅުމެއް ނެތްކަމަށް މިދިޔަ ހަފްތާގައި ރިޕޯޓު ކުރި އެވެ.
އެންމެ ފަހުގެ ރިޕޯޓުތައް ބުނާ ގޮތުން ރަންވީރަށް "ބައިޖޫ ބާވްރާ" ވަނީ ހުށަހަޅައިފަ އެވެ. އެހެންނަމަވެސް ރަސްމީކޮށް އެއްވެސް ނިންމުމެއް ނުނިންމާކަމަށް މައުލޫމާތު ލިބެ އެވެ.
"ބައިޖޫ ބާވްރާ" އަކީ މިއުޒިކަލް ލަވް ސްޓޯރީ އެކެވެ. އިތުރު ތަފްސީލެއް މިހާތަނަށް އާންމު ކޮށްފައެއް ނުވެ އެވެ. މިފިލްމުގެ ސްކްރީންޕްލޭ ނިންމި ނަމަވެސް މަސައްކަތް ފަށާނެ ކަމަށް ބެލެވެނީ މިހާރު މަސައްކަތް ނިންމާލާފައިވާ "ގަންގޫބާއީ ކަތިއަވަޑީ" އެޅުވުމަށްފަހު، އިތުރު ވެބް ސީރީޒްއެއްގެ މަސައްކަތްވެސް ފުރިހަމަކުރެވުމުންނެވެ. 12 އަންހެން އެކްޓަރުން ލީޑު ކުރާ ވެބް ސީރީޒް "ހީރާ މަންޑީ" ގެ މަސައްކަތް ބަންސާލީ މިހާރު ވަނީ ފަށައިފަ އެވެ.
