އިންޑިއާގެ މަޝްހޫރު ވިޔަފާރިވެރިޔާ ރާޖް ކުންދުރަގެ މައްޗަށް ކުރާ އޮރިޔާން ކާޑު އުފެއްދުމާއި ގެންގުޅުނުކަމުގެ ތުހުމަތުތަކާއި ގުޅިގެން އަނބިމީހާ އަދި މަޝްހޫރު ފިލްމީ ތަރި ޝިލްޕާ ޝެއްޓީ ފުލުހުންނަށް ބަޔާން ދީފި އެވެ.
މިދިޔަ ފެބުރުއަރީ މަހު ތަހުގީގު ކުރަން ފެށި ބަރަހަނާ މަންޒަރުތަކެއް އިންޓަނެޓުގައި އާންމު ކުރާ މައްސަލައިގައި ކުންދުރަ ހައްޔަރު ކުރީ މިމަހުގެ 19 ވަނަ ދުވަހު އެވެ. އިންޓަނެޓުގައި ވައިރަލް ކުރަމުންދާ އެ ވީޑިއޯތަކުގެ މައްސަލައިގައި އެންމެ އިސްކޮށް ހުރީ ކުންދުރަކަން ތަހުގީގުތަކަށް ސާބިތުވެފައިވާއިރު މިހާރު ފުލުހުން ބަލަމުން ދަނީ އެކަމުގައި ޝިލްޕާގެ އެއްވެސް ބައިވެރިވުމެއް ވޭތޯ އެވެ.
ފުލުހުން އިއްޔެ ވަނީ ޖޫހޫގައި ހުންނަ ޝިލްޕާއާއި ކުންދުރަގެ ގެއަށްވެެސް ވަދެފަ އެވެ. ގެއިން އެއްވެސް ހެއްކެއް ފެނުނުކަމެއް މިހާތަނަށް ސާފެއް ނުވެ އެވެ. ޝިލްޕާގެ ބަޔާނާއި ގުޅޭ ތަފްސީލެއްވެސް ފުލުހުން އާންމެއް ނުކުރެ އެވެ.
ކުންދުރަ އަކީ ވިއާން ކިޔާ ކުންފުންޏެއްގެ އޯނަރެވެ. އެކުންފުނީގެ ފައިސާގެ ކަންކަން ބަލަހައްޓަނީ އިނގިރޭސިވިލާތުގައި ރަޖިސްޓްރީކޮށްފައިވާ ކަރނިން ކިޔާ ފާމެއް މެދުވެރިކޮށެވެ. އެއީވެސް ކުންދުރަގެ ފާމެކެވެ. ފުލުހުން ދަނީ މި ދެ ކުންފުނީގެ ދެމެދުގައި ހިނގާފައިވާ ފައިސާގެ މުއާމަލާތްތައްވެސް ބަލަމުންނެވެ.
ކުންދުރަ އިއްޔެ ވަނީ ކޯޓަށް ހާޒިރުކޮށްފަ އެވެ. އިއްޔެގެ ޝަރީއަތުގައި ފުލުހުން ވަނީ ކުންދުރަގެ ދެ ބޭންކް އެކައުންޓެއް ބަލާފައިވާ ކަމަށް ބުނެފަ އެވެ. އެއީ ޔުނައިޓެޑް ބޭންކް އޮފް އެފްރިކާގައި އިން އެކައުންޓަކާއި ޔެސް ބޭންކުގައި އިން އޭނާގެ އެކައުންޓެކެވެ. މި ދެ އެކައުންޓުގައި ހިނގާފައިވާ މުއާމަލާތްތަކަށް ބަލާއިރު ބަރަހަނާ ވީޑިއޯތައް އުފައްދައިގެން ކުންދުރައަށް ލިބޭ ފައިސާ އޮންލައިންކޮށް ޖުވާ ކުޅެން އޭނަ ހޭދަކޮށްފައިވާކަމަށް ބެލެވޭކަމަށް ފުލުހުން ބުނެ އެވެ.
ކުންދުރަ ހައްޔަރުކުރި މައްސަލައިގައި އޭނާގެ ލޯޔަރުން ވަނީ ބޮމްބޭ ހައި ކޯޓުގައި ދައުވާކޮށްފަ އެވެ. ކުންދުރަގެ ލޯޔަރުން ބުނާ ގޮތުގައި އޭނާ ހައްޔަރު ކުރީ ގާނޫނާއި ހިލާފަށެވެ.
ބަރަހަނާ ވީޑިއޯތަކާއި ގުޅިގެން މިހާތަނަށް ވަނީ ކުންދުރަގެ އިތުރުން ދެ މީހަކު ހައްޔަރުކޮށްފަ އެވެ. އޭގެ ތެރެއިން އެކަކީ ކުންދުރަގެ ކުންފުނީގެ އައިޓީ ހެޑު ރަޔާން ތޯޕޭ އެވެ. އޭނާ ބަންދުގައި ބަހައްޓަން ކޯޓުން އަމުރުކޮށްފައިވަނީ މިމަހުގެ 27 ވަނަ ދުވަހުގެ ނިޔަލަށެވެ. ދެވަނަ މީހާގެ މައުލޫމާތު މިހާތަނަށް ހާމަކޮށްފައެއް ނުވެ އެވެ.
