މިމަހުގެ ތެރޭގައި ޓީޒާ ދައްކައިލި ކްރައިމް ތްރިލާ "މަޒްލޫމް" މިމަހުގެ 26 ވާ މިނިވަން ދުވަހު ބައިސްކޯފުގައި ރިލީޒް ކުރަން ނިންމައި އެކަން އިއުލާންކޮށްފި އެވެ.
އިއްޔެ ވަނީ "މަޒްލޫމް" ގެ ފުރަތަމަ ޗެޕްޓާގެ ޓްރެއިލާ ސޯޝަލް މީޑިއާގައި އާންމުކޮށްފަ އެވެ.
އެކި ޗެޕްޓާތަކަށް ބަހާލައިގެން ރިލީޒްކުރާ ކުރު ފިލްމު ސީރީޒްގެ ފުރަތަމަ ޗެޕްޓާގައި ކިޔައިދެނީ ރޭޕް ކޭސްތަކެއްގެ ވާހަކަ އެވެ. ފުރަތަމަ ޗެޕްޓާގައި ލީޑް ރޯލުން ފެންނަނީ ނުޒުހަތު ޝުއައިބު، އަހުމަދު އިފްނާޒު ފިރާގު، ޝަރަފް އަބްދުﷲ، އަހުމަދު ޝާރިފްގެ އިތުރުން ވާޝިޔާ މުހައްމަދު އެވެ.
ބައިސްކޯފު އޮރިޖިނަލްއެއްގެ ގޮތުގައި ރިލީޒް ކުރާ މި ސީރީޒް އުފައްދާފައިވަނީ އައިފިލްމްސް އާއި ކަޒްމިކް އިންޓަނޭޝަނަލް ގުޅިގެންނެވެ. ލިޔެ ޑައިރެކްޓު ކޮށްފައިވަނީ މަޝްހޫރު ޑައިރެކްޓަރު އިލިޔާސް ވަހީދު އެވެ.
އިލިޔާސް އަކީ 2019 ވަނަ އަހަރުގެ އެންމެ ކާމިޔާބު ދިވެހި ފިލްމު "ބަވަތި" ގެ ޑައިރެކްޓަރެވެ. އެފިލްމަށްފަހު އިލިޔާސް ވަނީ "ނީނާ" ކިޔާ ފިލްމެއްވެސް އިއުލާން ކޮށްފަ އެވެ. މިހާރު މުޅިންހެން ޝޫޓިންތައް ނިންމާލާފައިވާ އެ ފިލްމު ރިލީޒް ނުކޮށް ލަސްވަނީ ކޮވިޑް-19 ގެ ސަބަބުން ސިނަމާތައް ނުހުޅުވިގެންނެވެ.
"މަޒްލޫމް" އަކީ އޯޓީޓީ ޕްލެޓްފޯމަކަށް އިލިޔާސް އުފައްދާ ފުރަތަމަ ސީރީޒް އެވެ. ކަޒްމިކް އިންޓަނޭޝަނަލްގެ ސޯޝަލް މީޑިއާގައި މީގެ ކުރިން ވަނީ މި ސީރީޒްގެ ދެވަނަ ޗެޕްޓާގެ ޝޫޓިންތައްވެސް ނިންމާލާފައިވާކަމަށް ބުނެފަ އެވެ. އިތުރު ތަފްސީލެއް މިހާތަނަށް އާންމެއް ނުކުރެ އެވެ.
