މިމަހުގެ 19 ވަނަ ދުވަހު ބަރަހަނާ ފިލްމު އުފެއްދުމާއި އެތަކެތި އިންޓަނެޓުގައި އާންމު ކުރިކަމުގެ ކުށުގައި ހައްޔަރުކުރި ރާޖް ކުންދުރަ އުފެއްދީ ބަރަހަނާ ފިލްމުތަކުގެ ގޮތުގައި ނުބެލެވޭނެ ކަމަށް އޭނާގެ އަންހެނުން އަދި ފިލްމީ ތަރި ޝިލްޕާ ޝެއްޓީ ބުނެފި އެވެ.
އޭނާ މިހެން ބުނީ ފުލުހުންނަށް އިއްޔެ ދިން ބަޔާނުގަ އެވެ. ޝިލްޕާ ފުލުހަށް ހާޒިރު ކުރީ ކުންދުރަ ބަރަހަނާ ފިލްމު އުފެއްދައި ކުރި ވިޔަފާރީގައި ޝިލްޕާގެ އެއްވެސް ބައިވެރިވުމެއް އޮތްތޯ ސުވާލު ކުރާށެވެ.
ކުންދުރަ ބަރަހަނާ ވީޑިއޯއާއި ފޮޓޯ އާންމު ކުރީ "ހޮޓްޝޮޓްސް" ކިޔާ އެޕްލިކޭޝަނެއް މެދުވެރިކޮށެވެ. ޝިލްޕާ ބުނި ގޮތުގައި އެ އެޕްލިކޭޝަނުގެ ވެށި އޭނާއަށް މުޅިން ސާފު ނުވާ ކަމަށެވެ. ޝިލްޕާ ބުނި ގޮތުގައި އެ މަސައްކަތުގައި އިސްކޮށް އުޅުނު ކަމަށް އޭނާ ދެކެނީ ކުންދުރަގެ ކުންފުނި ކަރނިން ގެ ޕްރޮޑަކްޝަން ހެޑް ޕްރަދީޕް ބަކްޝީ އެވެ. މީގެ އިތުރުން ކުންދުރަގެ ޅިޔަނުވެސް އެކަމުގައި ޝާމިލުވި ކަމަށް ޝިލްޕާ ބުންޏެވެ.
އިތުރަށް ޝިލްޕާ ބުނީ ހޮޓްޝޮޓްސްގައި ކުންދުރަ އާންމުކުރި ވީޑިއޯ އާއި ފޮޓޯ އަކީ ބަރަހަނާ ފިލްމުތަކުގެ ގޮތުގައި ނުބެލެވޭނެ ކަމަށާއި އެއީ ހިތްހަމަޖެހުން ހޯދުމަށް އާންމުކޮށްވެސް ބަލާ އެއްޗެހި ކަމަށެވެ. ޝިލްޕާ ބުނީ އެހެން ބައެއް ސްޓްރީމިން ޕްލެޓްފޯމުތަކަށް އުފައްދާ ބޮޑެތި ފިލްމުތަކުގައިވެސް އެފަދަ މަންޒަރުތައް ހުންނަ ކަމަށެވެ.
ޝިލްޕާ ދެކޭ ގޮތުގަައި އޭނާގެ ފިރިމީހާ ކުށެއް ނުކުރެ އެވެ.
ރިޕޯޓުތައް ބުނާ ގޮތުން ޝިލްޕާ ފުލުހަށް ހާޒިރު ކުރީ ކުންދުރަގެ ވިއާން ކުންފުނީގެ ޑިރެކްޓަރުގެ މަގާމުން އޭނާ ވަރަށް ފަހުން އިސްތިއުފާ ދިނުމުންނެވެ. ވިއާން ކުންފުންޏަކީ ކުންދުރަ އުފެއްދި ބަރަހަނާ ވީޑިއޯތައް އިންޓަނެޓުގައި އާންމު ކުރުމުގައި އިސް ދައުރެއް އަދާކުރި ކުންފުންޏެވެ. ފައިސާގެ މުއާމަލާތްތައް ހިންގާފައިވަނީ އެ ކުންފުނި މެދުވެރިކޮށެވެ.
ފުލުހުން މިހާރު ތަހުގީގު ކުރަމުން ދަނީ ވީޑިއޯތައް އުފައްދައި ލިބުނު މާލީ މަންފާއިން ޝިލްޕާއަށް އެއްވެސް ގޮތަކުން ފައިދާ ވެފައިވޭތޯ އެވެ. ކުންދުރަގެ ފޯނާއި، ލެޕްޓޮޕް ފަދަ ތަކެތި ފުލުހުން ހިފަހައްޓާފައިވާއިރު މިހާތަނަށް ޝިލްޕާއާއި ދެކޮޅަށް އެއްވެސް ހެއްކެއް ލިބިފައި ނުވާކަމަށް މައުލޫމާތު ލިބެ އެވެ.
ކުންދުރަ އަކީ އިނގިރޭސިވިލާތުގެ ރަށްވެހިކަން އޮންނަ ފަރާތެކެވެ. އޭނާގެ ވިޔަފާރި އެގައުމުގެ އިތުރުން އިންޑިއާގައިވެސް އޮވެ އެވެ.
