ދަރިފުޅު ތައިމޫރު އަލީ ހާންއާއިއެކު ފިލްމެއްގައި މަސައްކަތް ނުކުރެވޭނެ ކަމަށް އެކްޓަރު ސައިފް އަލީ ހާން ބުނެފި އެވެ.
ތައިމޫރަކީ ސައިފް އާއި އަންހެނުން ކަރީނާ ކަޕޫރު ހާންގެ ދޮށީ ދަރިފުޅެވެ. ތައިމޫރާއިއެކު ސައިފްގެ ގުޅުން ވަރަށް ގިނަ ބަޔަކު ފާހަގަ ކުރެ އެވެ. އެގޮތުން ދެމީހުން އެކީގައި ފެންނަ ކޮންމެ ފަހަރަކު ދެމީހުންގެ ދެމެދުގައިވާ ގާތް ގުޅުން ފޮޓޯތަކުންނާއި ވީޑިއޯތަކުން ފެނެ އެވެ.
ދާދި ފަހުން ސައިފް ބައިވެރިވި ޓޯކް ޝޯއެއްގައި ފޭންއަކު ސައިފް ކައިރީ ބުނެފައިވަނީ "ބޭބީ ޑޭ އައުޓް" ފަދަ ފިލްމެއްގެ ރީމޭކުން ސައިފް އާއި ތައިމޫރު އެކީގައި ފެންނަން ބޭނުންވާ ކަމަށެވެ. އަދި ތައިމޫރާއިއެކު ފިލްމެއް ކުޅެފާނެތޯވެސް ސައިފްއާއި ސުވާލު ކުރި އެވެ.
މިސުވާލުގެ ޖަވާބުގައި ސައިފް ބުނީ ކުޑަކުދިންނާއިއެކު ފިލްމުތަކުގައި މަސައްކަތް ކުރުމަކީ ވަރަށް އުނދަގޫ ކަމެއް ކަމަށެވެ. އަދި ހާއްސަކޮށް ތައިމޫރާއިއެކު މަސައްކަތް ކުރުމަކީ އެއަށްވުރެއް އުނދަގޫކަމަކަށް ވާނެ ކަމަށް ސައިފް ބުންޏެވެ.
"ޝޫޓިންގެ މެދުތެރެއިން ތައިމޫރު ބުނެފާނެ ދެން ޝޫޓު ކުރަން ބޭނުމެއް ނުވެޔޭ. އަމިއްލަ ދަރިންނާއެކު ސްކްރީންގައި މަސައްކަތް ކުރުމަކީ ވަރަށް އުނދަގޫކަމަކަށް ވާނެ" ސައިފް ބުންޏެވެ.
ސައިފްއާއި ކަރީނާއަށް ތައިމޫރުގެ އިތުރުންވެސް ވަނީ ކުއްޖަކު ލިބިފަ އެވެ. އަދި އަހަރުވެސް ނުފުރޭ އެންމެ ކުޑަ ކުއްޖާ މިހާތަނަށް ފޮޓޯއަކުންވެސް ވީޑިއޯއަކުންވެސް މީޑިއާތަކަށް ފެނިފައެއް ނުވެ އެވެ. އެކުއްޖާގެ ނަންވެސް މިހާތަނަށް އާންމުކޮށްފައި ނުވާއިރު ގޭތެރޭގައި އޭނާއަށް ކިޔަނީ ޖޭ ކަމަށް ކަރީނާގެ ބައްޕަ ރަންދީރު ކަޕޫރު ވަނީ ބުނެފަ އެވެ.
ސައިފްގެ އަލަތު ކައިވެންޏަށްވެސް ދެ ކުދިން ތިބެ އެވެ. ދޮށީ ދަރިފުޅު ސާރާ އަލީ ހާން އަކީ ބޮލީވުޑްގެ މިހާރުގެ އެންމެ ޑިމާންޑިންގް އެއް ބަތަލާ އެވެ. ދެން ހުންނަނީ އިބްރާހިމް އަލީ ހާން އެވެ. އޭނާގެ އުމުރުން 20 އަހަރެވެ. މޮޑެލިންގް ދާއިރާގައި މިހާރު ކޮންމެވެސް ވަރަކަށް ހަރަކާތްތެރިވަމުން އަންނަ އިބްރާހިމް އަދި ދަނީ ކިޔަވަމުންނެވެ. ބެލެވޭ ގޮތުގައި ވަރަށް އަވަހަށް އޭނާވެސް ބޮލީވުޑަށް ނިކުންނާނެ އެވެ.
